ވަޔެކާނޯ ބަލިކޮށް، ބާސެލޯނާ އިން އެއް ވަނައިގައި ފޯމު ދަމަހައްޓައިފި

ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއް ވަނައިގައި ފޯމު ދަމަހައްޓައިފި އެވެ.

ބާސެލޯނާގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި ބާސެލޯނާ އިން އެ ޓީމުގެ ހަމައެކަނި ލަނޑު ވެސް ޖެހީ މެޗުގެ ފުރަތަމަ ހާފުގަ އެވެ.

މެޗު ފަށައިގެން ބާސެލޯނާ އިން ވަނީ ރަނގަޅަށް ކުޅެ، ލަނޑު ޖަހަން ފުރުސަތު ތަކެއް ހޯދައިފަ އެވެ. އެގޮތުން މެޗުގެ 24 ވަނަ މިނެޓުގައި ބާސެލޯނާ އިން ލަނޑު ޖަހައި ލީޑު ނެގި އެވެ. ޔާއޯ ކަންސޭލޯ ތަނަވަސްކޮށްދިން ފުުރުސަތެއްގައި ބާސެލޯނާ އަށް އެ ލަނޑު ޖަހައިދިނީ ރޮނާލްޑް އަރައުހޯ އެވެ.

އޭގެ ފަހުން ވެސް މެޗުގައި ބާސެލޯނާ އިން އިތުރު ލަނޑު ޖަހަން ފުރުސަތު ހޯދި ނަމަވެސް، ފުރުސަތުގެ ބޭނުން ކުރެވޭ ގޮތެއް ނުވި އެވެ. ބާސެލޯނާގެ ރޮބާޓް ލެވަންޑޯސްކީ އާއި، ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ފެރާން ޓޮރޭސް އަށް ވެސް ލަނޑު ޖަހަން ފުރުސަތު ލިބުނެވެ.

މޮޅާ އެކު ބާސެލޯނާ އިން އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 29 މެޗުން 73 ޕޮއިންޓާ އެކު އެވެ. ލީގުގައި ދެން ބާސެލޯނާ އަށް އޮންނާނީ ރަށުން ބޭރުގައި އެތުލެޓިކޯ މެޑްރިޑްއާ ދެކޮޅަށް ކުޅޭ މެޗެވެ.