އެންމެ ފަހުން ލިވަޕޫލް ދޫކޮށްލަން ޞަލާޙު ނިންމައިފި

ލިވަޕޫލް އަށް ކުޅެމުން އަންނަ މިޞްރުގެ ފޯވާޑު މުޙައްމަދު ޞަލާޙު، އެ ކުލަބު ދޫކޮށްލަން ނިންމައިފި އެވެ. 

އުމުރުން 33 އަހަރުގެ ކުޅުންތެރިޔާ ލިވަޕޫލް އަށް ބަދަލުވެފައި ވަނީ 2017 ވަނަ އަހަރު އެވެ. އެންމެ ފަހުން ލިވަޕޫލްގެ އެއްބަސްވުން ޞަލާޙު އައު ކޮށްފައި ވަނީ 2025 ވަނަ އަހަރު އެވެ. ދެ އަހަރަށް އައު ކުރި އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރު ކަމަށް ވީ ނަމަވެސް، މިހާރު ކުރިއަށްދާ ސީޒަން ނިމުމުން ލިވަޕޫލް ދޫކޮށްލަން ޞަލާޙު ވަނީ ނިންމައިފަ އެވެ.

އެއްބަސްވުމުގައި ބާކީ އެއް އަހަރު އޮއްވާ ކުލަބު ދޫކޮށްލަން ޞަލާޙު ނިންމީ، ލިވަޕޫލް އާއެކު މަޝްވަރާ ކުރުމަށް ފަހު އެވެ. ލިވަޕޫލް ދޫކޮށްލަން ނިންމާފައިވާކަން ޞަލާޙު ހާމަ ކޮށްފައިވާއިރު، ލިވަޕޫލް އިން ވެސް ވަނީ އެކަން ހާމަ ކޮށްފަ އެވެ. ޞަލާޙު އާއި ލިވަޕޫލްއާ ދެމެދު މަޝްވަރާ ކުރުމަށް ފަހު، ލިވަޕޫލް އިން ވަނީ ހިލޭ ޓްރާންސްފާއެއްގައި ކުލަބު ދޫކޮށްލުމުގެ ފުރުސަތު ޞަލާޙު އަށް ދޭން ނިންމައިފަ އެވެ.

ލިވަޕޫލްގައި ނުވަ އަހަރު ދުވަސް ހޭދަ ކުރުމަށް ފަހު ޞަލާޙު އެ ކުލަބު ދޫކޮށްލަން ނިންމާފައިވާއިރު، ލިވަޕޫލްގެ އައު ކޯޗު އާާން ސްލޮޓް އާއި ޞަލާޙުގެ ގުޅުން ވަނީ ގޯސްވެފަ އެވެ. އެ މައްސަލަ ތަކުގެ ތެރޭގައި ވެސް ޞަލާޙު ކުލަބު ދޫކޮށްލަން އުޅޭ ކަމުގެ އަޑު ތަކެއް ފެތުރުނެވެ. ޞަލާޙު އާއި ސްލޮޓްގެ ގުޅުން ގޯސްވެފައި ވަނީ، ލިވަޕޫލް ކުޅޭ މެޗު ތަކުގައި ޞަލާޙު އަށް ފުރުސަތު ދޭ މިންވަރު މަދުވުމުންނެވެ. 

ޞަލާޙު ވަނީ މިހާތަނަށް ލިވަޕޫލް އަށް ކުޅެދިން 435 މެޗުގައި 255 ލަނޑު ޖަހައިފަ އެވެ. އަދި ލިވަޕޫލް އާއެކު އޭނާ ވަނީ އަށް ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގުގެ އިތުރުން، އެފްއޭ ކަޕާއި، ކަރަބޯ ކަޕާއި، އެފްއޭ ކޮމިއުނިޓީ ޝީލްޑާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ހިމެނެ އެވެ. 

ލިވަޕޫލް ދޫކޮށްލުމަށް ފަހު ޞަލާޙު ބަދަލު ވާނެ ކުލަބެއް މިހާތަނަށް ހާމަ ކޮށްފައި ނެތެވެ. ނަމަވެސް، ބައެއް ކުލަބު ތަކުން އޮތީ އޭނާ ގެންނަން ޝައުޤުވެރި ވެގެން ކަމަށް ރިޕޯޓުތައް ބުނެ އެވެ. ޚާއްސަކޮށް ސައުދީ ޕްރޯ ލީގުގެ ކުލަބު ތަކުން ޞަލާޙު އަށް ފާރަލަމުން އަންނަ ކަމަށް ބުނެފައިވެ އެވެ.