ބްރައިޓަން އަތުން ބަލިވެ، ލިވަޕޫލް އަށް ހާސްކަން

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން ބަލިވެ، ލިވަޕޫލް އަށް ހާސްކަން ކުރިމަތިވެއްޖެ އެވެ.

ބްރައިޓަންގެ އަމިއްލަ ދަނޑުގައި ކުޅުނު މެޗުގައި އެ ޓީމުން ވަނީ 2-1 އިން ލިވަޕޫލް ބަލިކޮށްފަ އެވެ. މެޗުގައި ބްރައިޓަން އިން ލަނޑު ޖަހައި ކުރި ހޯދާފައި ވަނިކޮށް، ލިވަޕޫލް އިން ނަތީޖާ ހަމަހަމަ ވެސް ކުރި އެވެ. ނަމަވެސް ދެ ވަނަ ހާފުގައި ލަނޑު ޖަހައިގެން ބްރައިޓަން ވަނީ މެޗުން މޮޅުވެފަ އެވެ.

މެޗު ފަށައިގެން 14 ވަނަ މިނެޓުގައި ބްރައިޓަން އިން ލަނޑު ޖަހައި ލީޑު ނެގި އެވެ. އެ ލަނޑު ބްރައިޓަން އަށް ޖަހައިދިނީ ޑެނީ ވެލްބެކް އެވެ. އެއީ ޑިއެގޯ ގޮމޭޒް ތަަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

އޭގެ ފަހުން މެޗުގެ 30 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކޮށްދިނީ މިލޯސް ކާކެޒް އެވެ. މެޗުގައި ލީޑު ނަގަން ލިވަޕޫލް އިން މަސައްކަތް ކުރަމުން ދަނިކޮށް، ބްރައިޓަން އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އެގޮތުން މެޗުގެ 56 ވަނަ މިނެޓުގައި އެ ލަނޑު ވެސް ބްރައިޓަން އަށް ޖަހައިދިނީ ވެލްބެކް އެވެ.

މެޗުން ބަލިވެ ލިވަޕޫލް އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 31 މެޗުން 49 ޕޮއިންޓާ އެކު އެވެ. މި ސީޒަންގައި ލިވަޕޫލްގެ ނަތީޖާތައް ވަރަށް ބޮޑަށް ދަށްވެފައިވާއިރު، އެ ޓީމުން މަސައްކަތް ކުރަމުން އަންނަނީ ލީގުގެ ގަދަ ހަތަރެއްގައި ހިމެނި ޔުއެފާ ޗެމްޕިއަންސް ލީގުގެ ޖާގައެއް ހޯދުމަށެވެ. 

މިދިޔަ ސީޒަންގެ ޗެމްޕިއަންކަން ހޯދި ނަމަވެސް، މިފަހަރުގެ ލީގުގައި ލިވަޕޫލްގެ ނަތީޖާތައް ދަށްވެ، އެ ޓީމުގެ ކޯޗު އާން ސްލޮޓް އަށް އޮންނަ ޕްރެޝަރު ވެސް އަންނަނީ ބޮޑު ވަމުންނެވެ.