ބްރެންޓްފޯޑް ބަލިކޮށް، ޔުނައިޓެޑު ތިން ވަނަ އަށް ޖެހިލައިފި

އިނގިރޭސި ޕްރިމިއާ ލީގުގައި ބްރެންޓްފޯޑްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ލީގު ތާވަލްގެ ތިން ވަނަ މަގާމަށް ޖެހިލައިފި އެވެ.

ހޯމަ ދުވަހުގެ ރޭ ޔުނައިޓެޑުގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ޔުނައިޓެޑުން އެ ޓީމުގެ ދެ ލަނޑު ޖެހިއިރު، ދެ ވަނަ ހާފުގައި ބްރެންޓްފޯޑް އިން ވަނީ ލަނޑެއް ޖަހައިފަ އެވެ.

މެޗު ފަށައިގެން 11 ވަނަ މިނެޓުގައި ޔުނައިޓެޑުން ލަނޑު ޖަހައި ލީޑު ނެގި އެވެ. އެ ލަނޑު ޔުނައިޓެޑަށް ޖަހައިދިނީ ކަސެމީރޯ އެވެ. އެއީ ޔުނައިޓެޑުގެ ޑިފެންޑަރު ހެރީ މެގުއާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

އޭގެ ފަހުން މެޗުގެ ފުރަތަމަ ހާާފު ނިމެން ދެ މިނެޓަށް ވެފައި ވަނިކޮށް، ބެންޖަމިން ސެސްކޯ ވަނީ ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޖަހަން ސެސްކޯ އަށް ފުރުސަތު ތަނަވަސްކޮށްދިނީ ޔުނައިޓެޑުގެ ކެޕްޓަން ބްރޫނޯ ފެނާންޑޭސް އެވެ.

މެޗުގެ ދެ ވަނަ ހާފުގައި ވެސް ޔުނައިޓެޑުން ވަނީ ރަނގަޅަށް ކުޅެ ލަނޑު ޖަހަން ފުރުސަތު ތަކެއް ހޯދައިފަ އެވެ. މެޗުގައި ބްރެންޓްފޯޑުގެ ހަމައެކަނި ލަނޑު އެ ޓީމުން ޖެހީ މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށެވެ. އެ ލަނޑު ބްރެންޓްފޯޑް އަށް ޖަހައިދިނީ މަތިއަސް ޖެންސެން އެވެ. 

މި މޮޅާ އެކު ޔުނައިޓެޑުން ވަނީ ލީގު ތާވަލްގެ ތިން ވަނަ މަގާމަށް ޖެހިލައިފަ އެވެ. އެއީ މިހާތަނަށް ލީގުގައި އެ ޓީމުން ކުޅެފައިވާ 34 މެޗުން 61 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ހަތަރު ވަނައިގައި އޮތް ލިވަޕޫލް އަށް ލިބެނީ 58 ޕޮއިންޓެވެ. ފަސް ވަނައިގައި އެސްޓަން ވިލާ އަށް ވެސް ލިބެނީ 58 ޕޮއިންޓެވެ.