އީރާން ހަނގުރާމަ ނިމިއްޖެ، ކޮންގްރެސްގެ ހުއްދަ ހޯދާކަށް ނުޖެހޭނެ: ޓްރަމްޕް
ހަމަނުޖެހުންތައް ނިމުމަކަށް އައިސްފައިވާ ކަމަށް ޓްރަމްޕް ވިދާޅުވި ނަމަވެސް، މެދު އިރުމަތީގައި ތިބި އެމެރިކާގެ ސިފައިންގެ ޙާލަތު ވަރުގަދަ ކުރަމުންދާ ކަމަށް ޓްރަމްޕް ވިދާޅުވި. އެއީ އީރާން އާއި، އީރާން އަށް ތާއީދު ކުރާ ޖަމާއަތް ތަކުން ކުރިމަތި ވެދާނެ ނުރައްކާތަކުން ސަލާމަތްވުމަށް ކަމަށާއި، އެމެރިކާާގެ އިތުރުން އެ ޤައުމުގެ ބައިވެރިންގެ މަސްލަޙަތު ހިމާޔަތް ކުރުމަށް އަޅާ ފިޔަވަޅެއް ކަމަށް ޓްރަމްޕް ފާހަގަ ކުރައްވާފައިވޭ.
އެމެރިކާާގެ ކޮންގްރެސްގައި ޑޮނަލްޑް ޓްރަމްޕް ތަޤުރީރު ކުރައްވަނީ. | ރޮއިޓާސް
އެމެރިކާ އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިމުމަކަށް އައިސްފައިވާ ކަމަށާއި، އީރާންއާ ދެކޮޅަށް ކުރާ ހަނގުރާމައިގައި މިހާރު ކޮންގްރެސްގެ ހުއްދަ ހޯދަން ނުޖެހޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕް މިހެން ވިދާޅުވެފައި ވަނީ، އެމެރިކާގެ ކޮންގްރެސް އަށް ފޮނުއްވި ސިޓީއެއްގަ އެވެ. އެގޮތުން މިހާރު އީރާން އާއެކު ސުލްޙަ ޤާއިމު ކުރެވިފައިވާ ކަމަށާއި، އެހެންކަމުން ކޮންގްރެސްގެ ހުއްދަ ހޯދަން ނުޖެހޭނެ ކަމަށް އެ ސިޓީގައި ޓްރަމްޕް ވިދާޅުވެފައިވެ އެވެ. މިފަދަ ސިޓީއެއް ޓްރަމްޕް ފޮނުވާފައި މި ވަނީ، ކޮންގްރެސްގެ ހުއްދަ ހޯދަން ނުޖެހޭ ކަމަށް އޭނާގެ ސަރުކާރުން ދެކޭ ކަމަށް ރިޕޯޓު ވެސް ކޮށްފައި ވަނިކޮށެވެ.
އީރާން ހަނގުރާމަ ނިމިއްޖެ ކަމަށް ބުނެ، ކޮންގްރެސްގެ ހުއްދަ ހޯދުމަށް ޓްރަމްޕްގެ ސަރުކާރުން ދެކޮޅު ހަދަނީ
ކޮންގްރެސް އަށް ފޮނުއްވި ސިޓީގައި ޓްރަމްޕް ވިދާޅުވީ، 2026 ވަނަ އަހަރުގެ އޭޕްރީލް މަހުގެ ހަތް ވަނަ ދުވަހުން ފެށިގެން، އެމެރިކާގެ ސިފައިންނާއި އީރާންއާ ދެމެދު އެއްވެސް ކަހަލަ ހަަމަލާ ބަދަލު ކުރެމެއް ހިނގާފައި ނެތް ކަމަށެވެ. އަދި 2026 ފެބްރުވަރީ 28 ވަނަ ދުވަހު ފެށުނު ހަމަނުޖެހުންތައް މިހާރު މުޅިން ނިމުމަކަށް އައިސްފައިވާ ކަމަށް ވެސް ޓްރަމްޕް ވިދާޅުވެފައިވެ އެވެ.
ޓްރަމްޕް މި ސިޓީ ފޮނުއްވާފައި ވަނީ އެމެރިކާގެ "ވޯ ޕަވާސް ރިޒޮލިއުޝަން" ނުވަތަ ހަނގުރާމަ ކުރުމުގެ ބާރުތަކާ ބެހޭ ޤާނޫނުގެ ދަށުންނެވެ. މި ޤާނޫނު ބުނާ ގޮތުން، ކޮންގްރެސްގެ ހުއްދަ ހޯދުމަކާ ނުލައި ރައީސް އަށް ހަނގުރާމައެއް ކުރިއަށް ގެންދެވޭނީ އެންމެ ގިނަ ވެގެން 60 ދުވަހުގެ މުއްދަތަކަށެވެ. އެ މުއްދަތު ހަމަވުމުގެ ކުރިން ޓްރަމްޕް މި ވަނީ، ހަމަނުޖެހުންތައް ނިމުމަަކަށް އައިސްފައިވާ ކަމަށް ކޮންގްރެސް އަށް އަންގަވައިފަ އެވެ.
ހަމަނުޖެހުންތައް ނިމުމަކަށް އައިސްފައިވާ ކަމަށް ޓްރަމްޕް ވިދާޅުވި ނަމަވެސް، މެދު އިރުމަތީގައި ތިބި އެމެރިކާގެ ސިފައިންގެ ޙާލަތު ވަރުގަދަ ކުރަމުންދާ ކަމަށް ޓްރަމްޕް ވިދާޅުވި އެވެ. އެއީ އީރާން އާއި، އީރާން އަށް ތާއީދު ކުރާ ޖަމާއަތް ތަކުން ކުރިމަތި ވެދާނެ ނުރައްކާތަކުން ސަލާމަތްވުމަށް ކަމަށާއި، އެމެރިކާާގެ އިތުރުން އެ ޤައުމުގެ ބައިވެރިންގެ މަސްލަޙަތު ހިމާޔަތް ކުރުމަށް އަޅާ ފިޔަވަޅެއް ކަމަށް ޓްރަމްޕް ފާހަގަ ކުރައްވާފައިވެ އެވެ.
ނިމުނު އޭޕްރީލް މަހުގެ ހަތް ވަނަ ދުވަހު ޓްރަމްޕް ވަނީ، ދެ ހަފުތާގެ މުއްދަތަކަށް ހަމަލާ ބަދަލު ކުރުން ހުއްޓާލާފައިވާ ކަމަށް އިއުލާން ކުރައްވައިފަ އެވެ. އޭގެ ފަހުން ވަނީ މުއްދަތެއް ނެތް ގޮތަށް، އެކަން އިތުރު ކޯށްފަ އެވެ. މިހާތަނަށް އެމެރިކާ އާއި އީރާންއާ ދެމެދު ދާއިމީ ގޮތެއްގައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރެވިފައި ނުވެ އެވެ.
ޓްރަމްޕް ވިދާޅުވީ އީރާން އާއެކު ސިޔާސީ އެއްބަސްވުމަކަށް އާދެވެންދެން، އެ ޤައުމާ ދެކޮޅަށް އެމެރިކާ އިން އަޅާފައިވާ ކަނޑުގެ ބްލޮކޭޑް ނުވަތަ ދަތުރުފަތުރު ހުއްޓުވުމުގެ ފިޔަވަޅުތައް އެގޮތުގައި ދަމަހައްޓާނެ ކަމަށެވެ. މި ފިޔަވަޅަކީ އީރާން އަށް އިޤްތިޞާދީ ގޮތުންނާއި، އަސްކަރީ ގޮތުން ޕްރެޝަރު ކުރުމަށް އެމެރިކާ އިން ކުރިއަށް ގެންދާ ސިޔާސަތެކެވެ.
މަސްދަރު: ރޮއިޓާސް
