ސެނެގާލް އަތުން ޗެމްޕިއަންކަން އަތުލަން ނިންމި މައްސަލަ ކާސް އަށް ހުށަޅައިފި

މިއަހަރުގެ ޖަނަވަރީ މަހު ނިމުނު އެފްރިކަން ކަޕް އޮފް ނޭޝަންސްގެ ޗެމްޕިއަންކަން ހޯދި ސެނެގާލް އަތުން ޗެމްޕިއަންކަން އަތުލައި، މޮރޮކޯ އަށް ޗެމްޕިއަންކަން ދިނުމަށް އެފްރިކާގެ ފުޓުބޯޅައިގެ މައި އިދާރާ (ކާފް) އިން ނިންމި ނިންމުން ބާތިލު ކުރުމަށް، ސެނެގާލް އިން ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް މައްސަލަ ހުށަހަޅައިފި އެވެ. 

ކާފްގެ އެޕީލް ކޮމެޓީގެ ބޯޑުން ނިންމާފައި ވަނީ، ފައިނަލް މެޗުގެ ތެރެއިން ސެނެގާލްގެ ކުޅުންތެރިން ދަނޑުން ފޭބި މައްސަލަ ބެލުމަށް ފަހު އެ ޓީމު އަތުން ޗެމްޕިއަންކަން އަތުލުމަށެވެ. ޖަނަވަރީ މަހުގެ 18 ވަނަ ދުވަހު ކުޅުނު ފައިނަލް މެޗުގައި ސެނެގާލް އިން ވަނީ 1-0 އިން މޮރޮކޯގެ މައްޗަށް ކުރި ހޯދައިފަ އެވެ. ކާފް އިން އެ ނިންމުން ނިންމާފައި ވަނީ ފައިނަލް މެޗު ނިމުނުތާ ދެ މަސް ދުވަސް ފަހުންނެވެ. 

މައްސަލަ އިސްތިއުނާާފުކޮށް ސެނެގާލް އިން ކާސް އަށް ހުށަހަޅާފައިވާ އިސްތިއުނާފުގައި އެދިފައި ވަނީ، އެފްރިކަން ކަޕް އޮފް ނޭޝަންސްގެ ޗެމްޕިއަން އަކީ ސެނެގާލް ކަމަށް އަލުން ކަނޑަ އަޅައި ދިނުމަށެވެ. އަދި ކާފްގެ ނިންމުމަކީ ބާތިލު ނިންމުމެއް ކަމަށް ކަނޑަ އަޅައި ދިނުމަށް ވެސް ސެނެގާލް އިން ވަނީ އެދިފަ އެވެ. 

ސެނެގާލްގެ އިސްތިއުނާފް ކާސްގައި ރަޖިސްޓްރީ ކޮށްފައި ވަނީ ބުދަ ދުވަހު އެވެ. ސެނެގާލް އަތުން ޗެމްޕިއަންކަން އަތުލައި، މޮރޮކޯ އަށް ޗެމްޕިއަންކަން ދިނުމަށް ކާފް އިން ނިންމި ހިސާބުން ފެށިގެން، ސެނެގާލް އިން ވަނީ އެކަމާ ދެކޮޅު ހަދައިފަ އެވެ. އަދި ކާސް އަށް މައްސަލަ ހުށަހަޅާނެ ކަމަށް ވެސް ސެނެގާލް އިން އޮތީ ހާމަ ކޮށްފަ އެވެ. 

ސެނެގާލް ފުޓުބޯޅަ ފެޑެރޭޝަންގެ ޤާނޫނީ ވަކީލުން ބުނެފައި ވަނީ، ކާފްގެ ނިންމުމަކީ ފުތުބޯޅައިގެ ޤަވާއިދުތަކާ ޚިލާފު ނިންމުމެއް ކަމަށެވެ. އަދި އެ ނިންމުމަކީ ސެނެގާލް ޓީމުގެ ހައްގު ތަކަށް ބޮޑު ގެއްލުމެއް ލިބޭ ގޮތަށް ނިންމާފައިވާ ނިންމުމެއް ކަމަށް ވެސް، ސެނެގާލް ފުޓުބޯޅަ ފެޑެރޭޝަންގެ ޤާނޫނީ ވަކީލުން ވަނީ ބުނެފަ އެވެ. 

ސެނެގާލް އިން ހުށަހެޅި މައްސަލަ ބެލުމަށް ހަމަޖެހިފައިވާ ތާރީޚެއް ކާސް އިން އިއުލާާން ކޮށްފައި ނުވެ އެވެ. ނަމަވެސް، މި މައްސަލަ އަކީ ވަރަށް އަވަސް މައްސަަލަ އަކަށް ވާތީ، ކާސް އިން މި މައްސަލަ އަވަސް ތާރީޚެއްގައި ނިންމާނެ ކަމަށް ބެލެވެ އެވެ.