ސިޓީ އަތުން އާސެނަލް ބަލިވި ފައިނަލް މެޗު ބައްލަވަން ވެސް އިނގިރޭސި ބޮޑު ވަޒީރު ސްޓާމާ ވަޑައިގެންނެވި

ކަރަބޯ ކަޕްގެ ފައިނަލްގައި އާސެނަލް އާއި މެންޗެސްޓަރ ސިޓީ ބައްދަލު ކުރި މެޗު ބައްލަވަން ވެސް އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވަޑައިގެންނެވުމުން، އެކަމުގެ ސަމާލުކަން ގިނަ ބަޔަކަށް ލިބިއްޖެ އެވެ.

އާދީއްތަ ދުވަހުގެ ރޭ އިނގިރޭސިވިލާތުގެ ވެމްބްލީ ސްޓޭޑިއަމްގައި ކުޅުނު ފައިނަލް މެޗުގައި ސިޓީ އިން ވަނީ 2-0 އިން އާސެނަލް ބަލިކޮށް ކަރަބޯ ކަޕް ކާމިޔާބު ކޮށްފަ އެވެ. މެޗުގެ ދެ ވަނަ ހާފުގައި ޖެހި ދެ ލަނޑާ އެކު ސިޓީ އިން އާސެނަލް ބަލި ކުރިއިރު، އެ ޓީމުން ވަނީ ނުވަ ވަނަ ފަހަރަށް ކަރަބޯ ކަޕްގެ ތަށި އުފުލާލައިފަ އެވެ.

އެ މެޗު ބައްލަވަން އިނގިރޭސިވިލާތުގެ ބޮޑު ވަޒީރު ސްޓާމާ ވަޑައިގެންނެވިއިރު، ސްޓާމާ އަކީ އާސެނަލްގެ ވަރަށް ބޮޑު ސަޕޯޓަރެކެވެ. އެ މެޗުގެ ކުރިން އިނގިރޭސި ޕްރިމިއާ ލީގުގައި އާސެނަލް ކުޅުނު މެޗު ބައްލަވަން ވެސް ބޮޑު ވަޒީރު ސްޓާމާ ވަޑައިގެންނެވި އެވެ. އެ މެޗާ އެއްގޮތަށް، ކަރަބޯ ކަޕްގެ ފައިނަލް މެޗުގައި ވެސް ބޮޑު ވަޒީރު ވަނީ ބައެއް އާންމުންނާ ބައްދަލު ކުރައްވައި، ވަގުތު ހޭދަ ކުރައްވައިފަ އެވެ.

އެކަމާ ގުޅޭ ގޮތުން ބައެއް ފަރާތް ތަކުން ވަނީ ސޯޝަލް މީޑިއާގައި އެކި ކަހަލަ ޝުއޫރުތައް ފާޅު ކޮށްފަ އެވެ. އެގޮތުން ސިޔާސީ ގޮތުންނާއި، ސަރަހައްދީ ގޮތުން ވެސް ބޮޑު ނުތަނަވަސްކަމެއް އޮތް ދަނޑި ވަޅެއްގައި، ބޮޑު ވަޒީރު ފެންނަނީ ވަރަށް "ކޫލް" ބޭފުޅެއްގެ ގޮތުގައި ކަމަށް ބައެއް ފަރާތް ތަކުން ފާހަގަ ކޮށްފައިވެ އެވެ. އަދި ބޮޑު ވަޒީރު ބޭނުންފުޅުވަނީ ވީހާ ވެސް ގިނައިން އާންމުންގެ ތެރެއިން ފެންނަން ކަމަށް ވެސް ބައެއް މީހުން ބުނެފައިވެ އެވެ. 

މީގެ އިތުރުން ބޮޑު ވަޒީރު ސްޓާމާ އަކީ އަބަދު ވެސް އާސެނަލްގެ ސަޕޯޓަރެއް ކަށާއި، އާސެނަލް ކުޅޭ މެޗުތައް ބައްލަވަން ވަޑައިގެންނެވުމަކީ ސްޓާމާގެ އާދައެއް ކަަމަަށް ބައެއް ފަރާތް ތަކުން ބުނެފައިވެ އެވެ. ޚާއްޞަކޮށް ބޮޑު ވަޒީރުގެ މަގާމުގައި ހުންނެވި ނަމަވެސް، އާސެނަލް އިން ކުޅޭ މުހިންމު މެޗުތައް ބައްލަވަން ވަޑައިގެންނެވުމަށް ސްޓާމާ އިސްކަން ދެއްވާ ކަމަށް ވެސް އާންމުން ވަނީ ފާހަގަ ކޮށްފަ އެވެ. 

މިވަގުތަކީ އެމެރިކާ އާއި އިޒްރޭލް އިން އީރާނާ ދެކޮޅަށް ކުރަމުން އަންނަ ހަނގުރާމައިގެ ސަބަބުން، އިނގިރޭސިވިލާތަށް ވެސް ނުތަނަވަސްކަން ކުރިމަތިވެފައިވާ ވަގުތެކެވެ. ނަަމަވެސް، ބޮޑު ވަޒީރު ސްޓާމާ ވިދާޅުވެފައި ވަނީ އިނގިރޭސިވިލާތަށް އަމާޒުކޮށް ހަމަލާއެއް އަތުވެދާނެ ކަމުގެ އެއްވެސް ނިޝާނެއް ނެތް ކަމަށެވެ.