އާސެނަލް ބަލިކޮށް ސިޓީ އިން ކަރަބޯ ކަޕް ކާމިޔާބު ކޮށްފި

ކަރަބޯ ކަޕްގެ ފައިނަލްގައި ވާދަވެރި އާސެނަލްއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން މުބާރާތުގެ ޗެމްޕިއަންކަން ހޯދައިފި އެވެ.

އިނގިރޭސި ވެމްބްލީ ސްޓޭޑިއަމްގައި އާދީއްތަ ދުވަހުގެ ރޭ ކުޅުނު ފައިނަލް މެޗު ސިޓީ އިން ކާމިޔާބު ކުރީ 2-0 އިންނެވެ. މެޗުގައި ސިޓީ އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ދެ ޓީމުން ވަނީ ލަނޑު ޖަހަން މަސައްކަތް ކޮށްފަ އެވެ. ނަމަވެސް އެއްވެސް ޓީމަކަށް ފުރުސަތުގެ ބޭނުން ނުކުރެވުނުއިރު، ފުރަތަމަ ހާފު ނިމުނީ އެއްވެސް ލަނޑެއް ނުފެނި އެވެ.

މެޗުގެ ދެ ވަނަ ހާފުގެ 60 ވަނަ މިނެޓުގައި ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ސިޓީ އަށް ޖަހައިދިނީ އެ ޓީމުގެ ޒުވާން ކުޅުންތެރިޔާ ނިކޯ އޯރައިލީ އެވެ. އެއީ އާސެނަލްގެ ގޯލު ކީޕަރު ކެޕާ އަރިއްޒަބަލާގާ އަށް ހެދުނު ގޯހެއްގައި ލިބުނު ބޯޅަ އަކުން އޭނާ ޖެހި ލަނޑެކެވެ.

ސިޓީ އިން ލީޑު ނެގިތާ ހަތަރު މިނެޓު ފަހުން އެ ޓީމުން ދެ ވަނަ ލަނޑެއް ޖަހައި ލީޑު ފުޅާ ކުރީ ވެސް ނިކޯ އޯރައިލީ ޖެހި ލަނޑުންނެވެ. އެ ލަނޑު އޭނާ ޖެހީ ސިޓީގެ މަތެއުސް ނޫނޭޒް ތަނަވަސްކޮށްދިން ފުރުސަތެއްގައި ލިބުނު ބޯޅަ އަކުންނެވެ. ސިޓީ އިން ދެ ލަނޑު ޖެހި ފަހުން ވެސް، އާސެނަލް އިން ވަނީ ލަނޑު ޖަހަން ވަރަށް ބޮޑަށް މަސައްކަތް ކޮށްފަ އެވެ.

މޮޅާ އެކު ސިޓީ އިން ވަނީ ނުވަ ވަނަ ފަހަރަށް ކަރަބޯ ކަޕްގެ ތަށި އުފުލާލައިފަ އެވެ. މި ކާމިޔާބާ އެކު ސިޓީ އަށް އިރުޝާދު ދެމުން އަންނަ ޕެޕް ގާޑިއޯލާ ވެފައި ވަނީ ކަރަބޯ ކަޕްގެ ޗެމްޕިއަންކަން ފަސް ފަހަރު ހޯދި ފުރަތަމަ ކޯޗަށެވެ.