ފުރަތަމަ ލެގުގައި އާސެނަލް އިން ސްޕޯޓިން ބަލިކޮށްފި

ޔުއެފާ ޗެމްޕިއަންސް ލީގުގެ ކުއާޓާ ފައިނަލްގެ ފުރަތަމަ ލެގުގައި ސަޕޯޓިންއާ ދެކޮޅަށް ކުޅުނު މެޗުން، ފަހު ވަގުތު އާސެނަލް މޮޅުވެއްޖެ އެވެ. 

ސްޕޯޓިންގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން ލަނޑު ޖަހާފައި ވަނީ ވެސް، މެޗުގެ އެންމެ ފަހު ވަގުތުގެ ތެރޭގަ އެވެ.

މެޗުގެ ފުރަތަމަ ހާފުގައި ވެސް އާސެނަލް އިން ވަނީ ރަނގަޅަށް ކުޅެ ލަނޑު ޖަހަން މަސައްކަތް ކޮށްފަ އެވެ. އާސެނަލް އަށް ލީޑު ނަގައިދޭން އެ ޓީމުގެ ލިއާންޑްރޯ ޓްރޮސާޑް އާއި، ވިކްޓަ ޔޮކަރޭޝް އަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. ސްޕޯޓިން އިން ވެސް ވަނީ އާސެނަލް ކޮޅަށް ލަނޑު ޖަހަން މަސައްކަތް ކޮށްފަ އެވެ.

މެޗުގެ ދެ ވަނަ ހާފުގެ 64 ވަނަ މިނެޓުގައި އާސެނަލްގެ މާޓިން ޒުބިމެންޑީ ލަނޑެއް ޖަހައި އެ ޓީމަށް ކުރި ހޯދައިދިން ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. އޭގެ ފަހުން މެޗު އެއްވަރުވާން ދަނިކޮށް، އާސެނަލް މޮޅުވެފައި ވަނީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު އާސެނަލް އަށް ޖަހައިދިނީ ކައި ހަވާޓްޒް އެވެެ. އެއީ ގެބްރިއެލް މާޓިނެލީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މެޗުން މޮޅުވެ އާސެނަލް އިން މުބާރާތުގެ ސެމީ ފައިނަލްގެ ފުރުސަތު ބޮޑު ކޮށްފައިވާއިރު، ކުއާޓާ ފައިނަލްގެ ދެ ވަނަ ލެގު އޮންނާނީ އާސެނަލްގެ އަމިއްލަ ދަނޑުގަ އެވެ. މިދިޔަ ސީޒަންގައި ވެސް އާސެނަލް ވަނީ ޗެެމްޕިއަންސް ލީގުގެ ސެމީ ފައިނަލްގެ ޖާގަ ހޯދައިފަ އެވެ. ނަމަވެސް ސެމީ ފައިނަލްގައި ޕެރިސް ސެއިންޓް ޖާމަން (ޕީއެސްޖީ) އަތުން ބަލިވެ އާސެނަލް ވަނީ މުބާާރާތުން ކަޓައިފަ އެވެ.