އާޓެޓާ ހުރީ ތަށި ކާމިޔާބު ކުރެވޭނެ ކަމުގެ ޔަޤީންކަމާ އެކު!

ކަރަބޯ ކަޕްގެ ފައިނަލްގައި ވާދަވެރި މެންޗެސްޓަރ ސިޓީއާ ދެކޮޅަށް ނިކުންނައިރު، ފައިނަލް މެޗުން މޮޅުވެ މުބާރާތުގެ ތަށި ކާމިޔާބު ކުރެވޭނެ ކަމުގެ އިތުބާރާއި ޔަޤީންކަން އޮތް ކަމަށް، އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާދީއްތަ ދުވަހުގެ ރޭ ކުޅޭ ފައިނަލް މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާޓެޓާ ބުނީ، އޭނާ ބޭނުން ވަނީ ހަަމައެކަނި ތަށި ކާމިޔާބު ކުރަން ކަމަށެވެ. އެގޮތުން ފައިނަލް މެޗުގެ ކުރިން ލިބޭ ވަގުތު ތަކުގައި މެޗަށް ތައްޔާރުވެ، ރަނގަޅު ރޫޙެއް ޓީމުގައި ބޭއްވުމަކީ މުހިންމު ކަަމެއް ކަމަށް އާޓެޓާ ބުންޏެވެ. އާސެނަލް އޮތީ މެޗަށް ތައްޔާރަށްކަން ފާހަގަކޮށް އާޓެޓާ ބުނީ، މުބާރާތް ކާމިޔާބު ކުރެވޭނެ ކަމުގެ ޔަޤީންކަން ވެސް އޮތް ކަމަށެވެ.

މެޗުގެ ކުރިން އެއްވެސް ކަހަލަ ހާސްވުމެއް އޮތްތޯ ސުވާލު ކުރުމުން އާޓެޓާ ބުނީ، އެކަހަލަ އެއްވެސް ކަމެއް ނެތް ކަމަށެވެ. އޭގެ ބަދަލުގައި އޭނާ ހުރީ ވަރަށް ޕޮޒިޓިވްކޮށް ކަމަށާއި، މެޗާ މެދު ވަރަށް އުފާވެރި އިޙުސާސް ތަކެއް ކުރެވޭ ކަމަށް އާޓެޓާ ބުނެފައިވެ އެވެ. އެއާ އެކު އާޓެޓާ ބުނީ، މިއީ ސީޒަންގެ އެންމެ މުހިންމު ވަގުތު ކޮޅު ކަމަށާއި، މިއީ ސީޒަންގެ އެންމެ ވާދަވެރި ވަގުތަށް ވާނެ ކަމަށެވެ. އޭނާ ބުނީ އާސެނަލް އޮތީ ރަނގަޅު ފެންވަރެއްގައިކަން ސާބިތުކޮށްދޭން ޖެހޭނީ ދަނޑު މަތިން ކަމަށެވެ.

އާސެނަލްގެ ޓީމާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، އޭނާގެ ނަޒަރުގައި އަދި ވެސް ވަރަށް ގިނަ ކަންކަން ކުރަން ޖެހިފައިވާ ކަމަށެވެ. އެހެން ނަމަވެސް، މިވަގުތާ ހަމައަށް އައިއިރު އާސެނަލް އޮތް ފެންވަރާ މެދު ހިތްހަމަ ޖެހޭ ކަމަށާއި، މާޒީވި ދުވަސް ތަކުގައި އާސެނަލް އިން ކުރި މަސައްކަތް ކުރިއަށް އޮތް ތަނުގައި ވެސް ކުރާނެ ކަމަށް އޭނާ ބުންޏެވެ. ޚާއްސަކޮށް އެންމެ މުހިންމު ވަގުތުގައި، އެންމެ ރަނގަޅު ކުޅުން ދައްކަން މަސައްކަތް ކުރާނެ ކަމަށް އޭނާ ބުންޏެވެ.

އާދީއްތަ ދުވަހުގެ ރޭ އިނގިރޭސިވިލާތުގެ ވެމްބްލީ ސްޓޭޑިއަމްގައި އާސެނަލް އާއި ސިޓީ ބައްދަލު ކުރާ ފައިނަލް މެޗު ފަށާނީ ރާއްޖެ ގަޑިން 21:30 ގައެވެ. މި ސީޒަންގެ ޕްރިމިއާ ލީގުގައި އާސެނަލް އާއި ސިޓީ ބައްދަލު ކުރިއިރު، އެ މެޗު ނިމުނީ އެއްވަރު ވެގެންނެވެ.