އެމެރިކާގެ ތުހުމަތުތަކާ ގުޅިގެން، މެކްސިކޯގެ ސިނަލޯއާ ސްޓޭޓްގެ ގަވަރުނަރު ވަގުތީ ގޮތުން މަގާމުން ދުރަށް ޖެހިލައިފި

އެމެެރިކާގެ ސަރުކާރުން މަސްތުވާ ތަކެތީގެ ނުރައްކާތެރި ކާޓެލްއަކާ ގުޅުން އޮތް ކަމަށް ތުހުމަތު ކުރުމާ ގުޅިގެން، މެކްސިކޯގެ ސިނަލޯއާ ސްޓޭޓްގެ ގަވަރުނަރު ރޫބެން ރޯވާ މަގާމުން ވަގުތީ ގޮތުން އެކަހެރިވެ ވަޑައިގެންފި އެވެ. 

ރޫބެން ރޯޗާ މި ނިންމެވުން އިއުލާން ކުރެއްވީ އޭނާގެ މައްޗަށް ކުރެވޭ ތުހުމަތުތަކާ ގުޅިގެން، މެކްސިކޯގެ ކަމާ ގުޅުން ހުރި އިދާރާ ތަކުން ކުރިއަށް ގެންދާ ތަހުގީގަށް ފުރުސަތު ދެއްވުމުގެ ގޮތުންނެވެ. 

ހުކުރު ދުވަހުގެ ރޭ ޓީވީ މެދުވެރިކޮށް ދެއްވި ބަޔާނެއްގައި ރޯޗާ ވިދާޅުވީ، އޭނާ އަކީ ކުށެއް ނެތް މައުސޫމް ބޭފުޅެއް ކަމަށާއި، މަގާމުން އެކަހެރި ވެވަޑައިގަންނަވަނީ ސާފުތާހިރުކަމާ އެކު ކަަމަށެވެ. އަދި އެމެރިކާ އިން އޭނާގެ މައްޗަށް ކޯށްފައިވާ ތުހުމަތު ތަކަކީ، މެކްސިކޯގައި މިހާރު ވެރިކަން ކުރާ ސިޔާސީ ހަރަކާތަށް އަމާޒުކޮށް ދީފައިވާ ހަމަލާއެއްގެ ގޮތުގައި އޭނާ ސިފަ ކުރެއްވި އެވެ. ރޯޗާގެ އިތުރުން މެކްސިކޯގެ މިހާރުގެ އަދި ކުރީގެ ބައެއް އިސް އޮފިޝަލުން ތަކެއް ސިނަލޯއާ ކާޓެލްއާ ގުޅިގެން އެމެރިކާ އަށް ގިނަ އަދަދެއްގެ މަސްތުވާ ތަކެތި އެތެރެ ކުރަން އުޅުމުގެ ކަމުގެ ދައުވާާ އެމެރިކާގެ ކޯޓަކުން މިދިޔަ ބުދަ ދުވަހު ވަނީ އުފުލައިފަ އެވެ. 

ގަވަރުނަރު ރޯޗާ އަކީ މެކްސިކޯގެ މިހާރުގެ ރައީސް ކްލައުޑިއޯ ޝީންބޯމް ނިސްބަތްވެ ވަޑައިގަންނަވާ މޮރޭނާ ޕާޓީގެ އިސް މެމްބަރެކެވެ. އަދި އޭނާ އަކީ ކުރީގެ ރައީސް އެންޑްރޭސް މެނުއަލް ލޮޕޭޒް އޮބްރަޑޯގެ އަރިސް ބޭފުޅެއް ވެސް މެއެވެ. އެމެރިކާ އިން އުފުލި މި ދައުވާ ތަކުގެ ސަބަބުން ރައީސް ޝީންބޯމްގެ ސަރުކާރަށް ވަނީ ސިޔާސީ ގޮތުން ބޮޑެތި ގޮން ޖެހުން ތަކެއް ކުރިމަތިވެފަ އެވެ. މި މައްސަަލައާ ގުޅިގެން ރައީސް ވިދާޅުވީ، އެމެރިކާ އިން އެ ކުރަތުހުމަތު ތަކުގެ މައްސަލަތައް މެކްސިކޯ އިން ދިރާސާ ކުރާނެ ކަމަށާއި، އެއްވެސް މީހަކު ހައްޔަރު ކުރެވޭނީ ސާފު ހެކި ހުރެގެން ކަމަށެވެ. 

މެކްސިކޯގެ ސިޔާސީ ވެރިންނާއި، ޖިނާއީ ގުރޫޕުތަކާ ދެމެދު އޮންނަ ގުޅުމާ މެދު އެ ޤައުމުގެ ރައްޔިތުންގެ މެދުގައި ބޮޑު ނުރުހުމެއް އޮތް ނަަމަވެސް، އެމެރިކާ އިން މެކްސިކޯގެ ދާޚިލީ ކަންކަމުގެ ތެރެއަށް ވަނުމަކީ މެކްސިކޯގެ ރައްޔިތުން ވަރަށް ނުރުހޭ  ކަމެކެވެ. 

މަގާމުން އެކަހެރިވެ ވަޑައިގަންނަވާކަން އިއުލާން ކުރެއްވި ނަމަވެސް، ރޯޗާ ހުންނެވީ ވަރަށް ސާބިތުކަމާ އެކު އެވެ. އޭނާ ވިދާޅުވީ، އޭނާގެ އާއިލާ އާއި ރައްޔިތުންގެ ކުރިމަތީގައި އިސް އުފުލައިގެން ހުންނެވޭނެ ކަށާއި، އޭނާ އަކީ ޚިޔާނާތްތެރިއެއް ނޫންކަން ޤައުމުގެ އަދުލު އިންސާފުގެ ނިޒާމުގެ ތެރެއިން ސާބިތު ކޮށްދެއްވާނެ ކަމަށެވެ. 

 ރޯޗާ މަގާމުން އެކަހެރިވެ ވަޑައިގަތުމާ ގުޅިގެން، ހޮނިހިރު ދުވަހު ސިނަލޯއާގެ ކޮންގްރެސް އިން ވަނީ އެ ސްޓޭޓްގެ ވަގުތީ ގަވަރުނަރުގެ މަގާމަށް ޔެރަލްޑިން ބޮނީލާ އައްޔަންކޮށްފަ އެވެ.