ޓްރަމްޕް އާއެކު ކުރިއަށް ގެންދިޔަ 90 މިނެޓުގެ ފޯނު ކޯލެއްގައި ޕުޓިންގެ ވަރުގަދަ އިންޒާރެއް!

އެމެރިކާގެ ރައީސް ޑޮނަލްޑް ޓްރަމްޕް އާއި، ރަޝިޔާގެ ރައީސް ވްލަޑިމިއަރ ޕުޓިން ފޯނުން ގުޅުއްވައި ގިނަ ކަންތައްތަކާ މެދު މަޝްވަރާ ކުރައްވައިފި އެވެ.

ބުދަ ދުވަހު ޓްރަމްޕް އާއި ޕުޓިން ފޯނުން ގުޅުއްވައި މަޝްވަރާ ކުރައްވާފައިވާއިރު، ރަޝިޔާގެ ރިޔާސީ ގަނޑުވަރު ކްރެމްލިންގެ އޮފިޝަލަކު ވިދާޅުވެފައި ވަނީ އެ ފޯނު ކޯލު 90 މިނެޓަށް ދެމިގެން ދިޔަ ކަމަށެވެ. އަދި އެ ފޯނު ކޯލުގައި ޓްރަމްޕް އާއި ޕުޓިން ގިނަ ވާހަކަ ތަކެއް ދެއްކެވި ކަަމަށް ވެސް ވިދާޅުވެފައިވެ އެވެ. 

މި މަޝްވަރާ ތަކުގައި ޓްރަމްޕް އާއި ޕުޓިން އެންމެ ބޮޑު އިސްކަމެއް ދެއްވީ، އީރާންގެ މަސްރަޙާއި، ގަލްފު ސަރަހައްދުގެ ޙާލަތަށެވެ. އީރާން އާއެކު އޮތް ހަމަލާ ބަދަލު ކުރުން ހުއްޓާލުމުގެ އެއްބަސްވުން އިތުރު ކުރުމަށް ޓްރަމްޕް ނިންމެވި ނިންމުމަށް، ރަޝިޔާގެ ރައީސް ޕުޓިން މަރުޙަބާ ވެސް ވިދާޅުވި އެވެ. ޕުޓިން ޤަބޫލުފުޅު ކުރައްވާ ގޮތުގައި އެއީ މަޝްވަރާ ތަކަށް ފުރުސަތު ދިނުމަށާއި، މަސްރަޙު ހަމައަކަށް އެޅުވުމަށް ނެގުނު ރަނގަޅު ފިޔަވަޅެކެވެ. 

ނަމަވެސް، އެމެރިކާ އާއި އިޒްރޭލް އިން އީރާންއާ ދެކޮޅަށް އަސްކަރީ ފިޔަވަޅެއް އަޅައިފި ނަަމަ، އޭގެ ނަތީޖާ ވަރަށް ނުރައްކާތެރި ވާނެ ކަމުގެ އިންޒާރު ޕުޓިން ދެއްވި އެވެ. އެ ފަދަ ހަމަލާއެއްގެ ސަބަބުން އީރާން އާއި އަވަށްޓެރި ޤައުމު ތަކުގެ އިތުރުން، މުޅި ބައިނަލްއަޤުވާމީ މުޖުތަމައު އަށް ވެސް އިއާދަ ނުކުރެވޭ ފަދަ ބޮޑެތި ގެއްލުން ތަކެއް ލިބޭނެ ކަމަށް ޕުޓިން ވަނީ ފާހަގަ ކުރައްވައިފަ އެވެ. މެދު އިރުމަތީގައި ހަނގުރާމަ ހުއްޓުވުމަށް ކުރެވޭ ޑިޕްލޮމެޓިކް މަސައްކަތް ތަކަށް ރަޝިޔާ އިން ފުރިހަމަ އަށް އެއްބާރުލުން ދޭނެ ކަމުގެ ޔަޤީންކަން ވެސް ޕުޓިން ދެއްވި އެވެ. 

ޕުޓިން އާއެކު ކުރިއަށް ގެންދިޔަ ފޯނު ކޯލާ ގުޅޭ ގޮތުން، އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ޕުޓިން އާއެކު ވަރަށް ކާމިޔާބު ވާހަކަ ތަކެއް ދެކެވުނު ކަމަށެވެ. އެހެން ނަމަވެސް، ޓްރަމްޕް ވިދާޅުވީ ގޮތުގައި އެ މަޝްވަރާ ތަކުގައި އީރާން އަށް ވުރެ ބޮޑަށް ވާހަކަ ދެކެވުނީ ރަޝިޔާ އާއި ޔޫކްރެއިންއާ ދެމެުދ ހިނގަމުން އަންނަ ހަނގުރާމައިގެ ޙާލަތާ ގުޅޭ ގޮތުންނެވެެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމަ ނިމުމަކަށް ގެނައުމަށް އެހީތެރިވުމުގެ ޝައުޤުވެރިކަން ޕުޓިން ފާޅު ކުރެއްވި ކަމަށް ޓްރަމްޕް ވިދާޅުވި އެވެ. އެހެން ނަމަވެސް، އެހެން ކަންކަމަށް އެހީތެރިވުމުގެ ކުރިން ޔޫކްރެއިން އަށް އަރައިގަނެ ކުރަމުންދާ ހަނގުރާމަ ފުރަތަމަ ހުއްޓާލުމަށް ޕުޓިންގެ އަރިހުން އެދިވަޑައިގެންނެވި ކަމަށް ޓްރަމްޕް ވިދާޅުވި އެވެ.