އީރާން އިން އެ ޤައުމުގެ މިސައިލް ނިޒާމު ވަރުގަދަ ކުރަމުން އަންނަ ކަމަށް އެމެރިކާ އިން ބުނެފި

އީރާން އިން އެ ޤައުމުގެ މިސައިލްގެ ނިޒާމު ވަރުގަދަ ކުރުމުގެ މަސައްކަތް ކުރަމުން އަންނަ ކަމަށް، އެމެރިކާގެ އިސް އޮފިޝަލުންނާ ހަވާލާދީ މީޑިއާ ތަކުގައި ރިޕޯޓު ކޮށްފި އެވެ. 

އެމެރިކާގެ ނޫސްތަކުން ރިޕޯޓު ކޮށްފައިވާ ގޮތުގައި، އިޒްރޭލް އިން ދިން ހަަމަލާ ތަކުގައި ސުންނާފަތި ވެފައިވާ އިމާރާތް ތަކުގެ ކުނި ތަކުގެ ދަށުގައި ފޮރުވިފައިވާ، ނުވަތަ ވަޅުލެވިފައިވާ މިސައިލް ތަކާއި ގޮވާ ތަކެތި ނެގުމުގެ މަސައްކަތް މިހާރި އީރާން އިން ހަލުވިކަމާ އެކު ކުރަމުން އަންނަ ކަމަށެވެ. 

މިއީ ކުރިއަށް އޮތް ތަނުގައި ކުރިމަތި ވެދާނެ ހަމަލާ އަކުން ދިފާއުވުމަށާއި، ބަދަލު ހިފުމުގެ ހަމަލާއެއް ދިނުމަށްޓަކައި އީރާން އިން ކުރަމުންދާ މަސައްކަތް ތަކެއް ކަމަށް އެމެރިކާގެ އޮފިޝަލުން ޤަބޫލު ކުރެ އެވެ. 

އެމެރިކާގެ ޖާސޫސީ އިދާރާ ތަކުން ހޯދާފައިވާ މައުލޫމާތު ތަކަށް ބިނާކޮށް ރިޕޯޓުތައް ބުނާ ގޮތުގައި، އީރާން އިން މިހާރު ދަނީ އެ ޤައުމުގެ އަސްކަރީ ވަސީލަތްތައް އަލުން ބިނާކޮށް، ހަނގުރާމަ އަށް ތައްޔާރު ވަމުންނެވެ. ޚާއްސަކޮށް އެމެރިކާގެ ރައީސް ޑޮނަލްޑް ޓްރަމްޕް ވެރިކަމާ ހަވާލުވީ ފަހުން، އީރާންއާ މެދު ގެންގުޅޭ ހަރުކަށި ސިޔާސަތުގެ ދަށުން އަސްކަރީ ކުރިމަތިލުމަކަށް ގޮސްދާނެ ކަމުގެ ބިރު އީރާން އަށް އޮތް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ. 

މީގެ އިތުރުން އީރާން އިން މިހާރު ކުރަމުންދާ މަސައްކަތް ތަކުގެ ތެރޭގައި ހަލާކުވެފައިވާ އަސްކަރީ މަރުކަޒު ތަކުން ބޭނުން ކުރެވިދާނެ ހަތިޔާރުތައް ހޯދުމާއި، އެ ތަކެތި މަރާމާތު ކޮށްގެން ބޭނުން ކުރެވޭނެ ގޮތް ހެދުން ހިމެނެ އެވެ. މިއީ އެ ޤައުމުގެ ދިފާއީ ނިޒާމު ވަރުގަދަ ކުރުމަށް އަޅަމުންދާ އަވަސް ފިޔަވަޅެއްގެ ގޮތުގައި އެމެރިކާގެ އޮފިޝަލުން ސިފަ ކުރެ އެވެ. 

ޓްރަމްޕްގެ ރިޔާސީ ފުރަތަމަ ދައުރުގައި އީރާންއާ މެދު ގެންގުޅުނު "މެކްސިމަމް ޕްރެޝަރު" ނުވަތަ އެންމެ މަތީ ދަރަޖައިގެ ފިއްތުންތައް ކުރިމަތި ކުރުމުގެ ސިޔާސަތު އަލުން އިއާދަވެދާނެ ކަމަށް ބެލެވޭތީ، މުޅި މެދު އިރުމަތީގެ މަސްރަހު މިހާރު އޮތީ ވަރަށް ބޮޑަށް ނުތަނަވަސްވެފަ އެވެ. މި ނުތަނަވަސްކަމުގެ ތެރޭގައި އީރާން އަށް އެ ޤައުމުގެ މިސައިލް ޕްރޮގްރާމް އިތުރަށް ހަލުވި ކުުރުމަކީ ސަރަހައްދީ ހަމަޖެހުމަށް އޮތް ބޮޑު ގޮންޖެހުމެއް ކަމަށް ބައިނަލްއަޤުވާމީ މުޖުތަމައުން ދެކެ އެވެ.