އެމެރިކާ އިން މަސައްކަތް ކުރަނީ އީރާންގައި ބައިބައިވުން އުފައްދައި، ވެރިކަން ވައްޓާލަން: ޤާނޫނު ހަދާ މަޖިލީހުގެ ރައީސް ޣަލިބާފް

އެމެރިކާ އިން މަސައްކަތް ކުރަނީ އީރާންގެ އެތެރޭގައި ބައިބައިވުން އުފައްދައި، އީރާންގެ ވެރިކަން ވައްޓާލަން ކަމަށް އެ ޤައުމުގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެ އެވެ. 

އީރާންގެ ސިޔާސީ މަސްރަހުގައި ވެސް ނުފޫޒު ގަދަ ބޭފުޅެއްގެ ގޮތުގައި ފާހަަގަ ކުރެވޭ ޣަލިބާފް މިހެން ވިދާޅުވީ، އީރާންގެ ދައުލަތުގެ މީޑިއާ މެދުވެރިކޮށް ބުދަ ދުވަހު ދެއްވި ބަޔާނެއްގަ އެވެ. 

ޣަލިބާފް ވިދާޅުވީ އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ސިޔާސަތަކީ، އީރާންގެ ރައްޔިތުންނާއި، އެ ޤައުމުގެ ސިޔާސީ ފަރާތްތައް އަދި ހަރުކަށި ފިކުރުގެ މީހުންނާ މެދު ބައިބައިވުން އުފެއްދުން ކަމަށެވެ. އަދި އެއަށް ފަހު އިޤްތިޞާދީ ގޮތުން އީރާން އަށް ދަތިކޮށް، ކަނޑުގެ މަގުން ބަނދަރުތައް ބަންދު ކޮށްގެން އީރާން ކުޑަ ކަކޫ ޖެއްސުމަށް މަސައްކަތް ކުރާ ކަމަށް އޭނާ ތުހުމަތު ކުރެއްވި އެވެ. އޭގެ ބޭނުމަކީ ޤައުމުގެ އެތެރޭގައި ހަމަ ނުޖެހުން އުފައްދައި، އީރާންގެ ބާރު ކަނޑުވާލުން ކަމަށް ވެސް އޭނާ ވިދާޅުވި އެވެ. 

އެމެރިކާ އާއި އިޒްރޭލް އިން ދެމުންދާ ހަމަލާ ތަކުގައި އީރާންގެ އެންމެ މަތީވެރިޔާ، އާޔަތުﷲ އަލީ ޚާމަނާއީ އާއި  އެހެން އިސް ލީޑަރުން ތަކެއް އަވަހާރަ ކޮށްލާފައިވާ މި ދަނޑިވަޅުގައި، އީރާންގެ ބާރުވެރިކަން އޮތްގޮތާ މެދު ގިނަ ބަޔަކު ސުވާލު އުފައްދަމުން ގެންދެ އެވެ. މި މަހުގެ ކުރީ ކޮޅު އެމެރިކާގެ ރައީސް ޓްރަމްޕް ވަނީ އީރާންގެ ސަރުކާރު ވަރަށް ބޮޑަށް ބައިބައި ވެފައިވާ ކަމަށާއި، އެއީ ހައިރާން ވާން ޖެހޭ ކަމެއް ނޫން ކަމަށް ވިދާޅުވެފަ އެވެ. 

ނަމަވެސް، އީރާން އިން ފެންނަނީ އެމެރިކާގެ ބިރު ދެއްކުންތަކާއި، ފިއްތުން ތަކުގެ ކުރިމަތީގައި ކުޑަ ކަކޫ ނުޖަހާ މަންޒަރެވެ. އީރާންގެ އައު ރޫހީ ލީޑަރު މުޖުތަބާ ޚާމާނައީ ވެސް ގެންދަވަނީ ބަރާބަރަށް ޤައުމުގެ ކަންކަން ބައްލަވަމުން ކަަމަށާއި، އެމެރިކާ އިން ބޭނުންވާހާ ގޮތަކަށް އީރާން އިން ދޫ ނުދޭނެ ކަމަށް މާހިރުން އަންނަނީ ފާހަގަ ކުރަމުންނެވެ. 

އެމެރިކާ އާއި އީރާާންއާ ދެމެދު ބޭއްވި ފުރަތަމަ ބުރުގެ މަޝްވަރާ ތަކުގައި ވެސް ބައިވެރިވެ ވަޑައިގެންނެވި ޣަލިބާފް އިތުރަށް ވިދާޅުވީ، ދުޝްމަނުން މިހާރު ވަނީ އައު މަރުޙަލާ އަކަށް ފިޔަވަޅު އަޅާފައި ކަމަށެވެ. އެގޮތުން ކަނޑުގެ މަގުން ބަނދަރުތައް ބަންދު ކުރުމާއި، މީޑިއާގެ ވަސީލަތްތައް ބޭނުން ކޮށްގެން ދޮގު ޚަބަރު ފެތުރުމުގެ ބޭނުމަކީ، އީރާންގެ އެތެރޭގެ މަސްރަހު ގަޑު ބަޑު ކޮށްލުން ކަމަށް އޭނާ ފާހަގަ ކުރެއްވި އެވެ. މި ނުރައްކަލުން ސަލާމަތްވުމަށް އޮތް ހަމައެކަނި ޙައްލަކީ ޤައުމީ އެއްބައިވަންތަކަން ދެމެހެއްޓުން ކަމަށް އޭނާ ވިދާޅުވި އެވެ. 

އެމެރިކާ އިން އީރާންގެ ބަނދަރުތައް ބަންދު ކުރަން ފަށާފައި ވަނީ، ދުނިޔޭގެ ތެލާއި ގޭސް އުފުލުމުގައި މުހިންމު ދައުރެއް އަދާ ކުރާ ހޮރްމޫޒް ކަނޑު އޮޅި ބަންދު ކުރާނެ ކަމުގެ އިންޒާރު އީރާން އިން ދިނުމާ ގުޅިގެން އެކަމުގެ ބަދަލު ހިފުމުގެ ގޮތުންނެވެ. މި ފިޔަވަޅު ތަކުގެ ސަބަބުން އީރާންގެ އިޤްތިޞާދަށް ބޮޑެތި ގޮން ޖެހުން ތަކެއް ކުރިމަތިވަމުންދާކަން ފާހަގަ ކުރެވޭ ކަމަށް ރިޕޯޓުތައް ބުނެ އެވެ.