އިޒްރޭލް އިން ހިޒްބުﷲ އަށް ހަމަލާ ދޭއިރު އިމާރާތް ތަކަށް އަމާޒު ކޮށްގެން ނުވާނެ، ގޯސް ވާނީ އިޒްރޭލް: ޓްރަމްޕް

އިޒްރޭލް އިން ލިބުނާންގެ ހިޒްބުﷲ ޖަމާއަތަށް އަމާޒުކޮށް ދެމުން އަންނަ ހަމަލާތައް ދޭއިރު، އިމާރާތް ތަކަށް އަމާޒުކޮށް ހަމަލާ ދީގެން ނުވާނެ ކަމަށް އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫ އަށް އަންގާފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ވިދާޅުވީ އޭނާ، އިޒްރޭލްގެ ބޮޑު ވަޒީރު ނަތަންޔާހޫ އަށް އެކަން އަންގާފައިވާ ކަމަށާއި، އިމާރާތް ތަކަަށް ހަމަލާ ދިނުމަކީ ކޮށްގެން ވާނެ ކަމެއް ނޫން ކަމަށެވެ. އަދި އެކަމުގެ ސަބަބުން އިޒްރޭލް ގޯސް ވާނެ ކަމަށާއި، އިޒްރޭލް އަކީ ގޯސް ބައެއްގެ ގޮތުގައި ސިފަ ވާނެ ކަމަށް ވެސް ޓްރަމްޕް ވިދާޅުވެފައިވެ އެވެ. 

މީގެ އިތުރުން ޓްރަމްޕް ވިދާޅުވީ ހިޒްބުﷲ އާއި އެ ޖަމާއަތަށް އެންމެ ބޮޑު ވާގިވެރި ކަމެއް ދޭ ޤައުމަކީ އީރާން ކަމަށާއި، އީރާން އިން ލުބުނާން ހަލާކު ކޮށްލާފައިވާ ކަމަށެވެ. އެެމެރިކާގެ އެކްސިއޯސް އަށް ދެއްވި ބަޔާނެއްގައި ޓްރަމްޕް ވިދާޅުވީ، އީރާން ނައްތާލުމުން، އޮޓޮމެޓިކުން ހިޒްބުﷲ ވެސް ނައްތާލެވެނޭ ކަމަށެވެ. ޓްރަމްޕް ވިދާޅުވީ ލުބުނާން އާއި، އެ ޤައުމުގެ މިހާރުގެ ސަރުކާރު އަލުން ކުރި އަރަައިގެން ދެވޭނެ ކަމަށް އިތުބާރު ކުރައްވާ ކަަމަށެވެ. 

އެކްސިއޯސް އަށް މައުލޫމާތު ދެމުން އެމެރިކާާގެ އޮފިޝަލަކު ވިދާޅުވީ، އެމެރިކާ އިން ހިޒްބުﷲ ގެ މައްޗަށް ސިޔާސީ ގޮތުން އިތުރު ޕްރެޝަރު ތަކެއް ކުރާނެ ކަމަށާއި، ލުބުނާންގެ އަސްކަރީ ޤާބިލުކަން އިތުރު ކުރެވޭނެ ގޮތް ތަކެއް ވެސް ބަލާނެ ކަމަށެވެ. އެ އޮފިޝަލް އިތުރަށް ވިދާޅުވީ، އެމެރިކާގެ ވިސްނުމަކީ އެކަންކަން ވަރަށް އަވަހަށް ކުރިއަށް ގެންދިޔުން ކަމަށެވެ. 

މި ހަފުތާގެ ކުރީ ކޮޅު އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، ލުބުނާންގެ ސިފައިންގެ ތެރެއިން ޗެކް ކުރެވިފައިވާ ބައި ތަކަށް ތަމްރީން އާއި، ހަތިޔާރާއި، ޤާބިލުކަން ދިނުމަށް އެމެރިކާ އިން މަސައްކަތް ކުރާނެ ކަމަށެވެ. އެއީ ހިޒްބުﷲގެ މައްޗަށް ފިޔަވަޅު އެޅުމަށް ކަމަށް އޭނާ ވިދާޅުވި އެވެ. 

ފޮކްސް ނިއުސް އަށް ދެއްވި އިންޓަވިޔުއެއްގައި ރޫބިއޯ ވިދާޅުވީ، ލުބުނާންގެ ސިފައިންގެ ކިބައިގައި އެކަން ކުރުމުގެ ބޭނުން އޮތް ނަމަވެސް، ފުރިހަމަ ޤާބިލުކަން ނެތް ކަމަށެވެ. ރޫބިއޯ ވަނީ އިޒްރޭލް އާއި ލުބުނާންގެ ތެރޭގައި ދާއިމީ ގޮތެއްގައި ސަލާމަތީ ސަރަހައްދެއް ޤާއިމު ކުރުމުގެ ވިސްނުން ބަލައި ނުގަންނަން ނިންމައިފަ އެވެ. އޭނާ ވިދާޅުވީ އިޒްރޭލް އިން އެކަން ބޭޏުން ވަނީ ދާއިމީ ގޮތެއްގައި ނޫން ކަމަށާއި، އިޒްރޭލް އިން ދާއިމީ ގޮތެއްގައި ލުބުނާންގައި ތިބެން ބޭނުން ނުވާ ކަމަށެވެ.