ނަތަންޔާހޫގެ ކޮރަޕްޝަންގެ މައްސަލައިގެ ހެކިބަސް ދިނުން ކެންސަލް ކޮށްފި

އިޒްރޭލްގެ ބޮޑު ވަޒީރު ބެންޖަމިން ނަަތަންޔާހޫގެ މައްޗަށް ކޮށްފައިވާ ކޮރަޕްޝަންގެ ތުހުމަތުގެ މައްސަލައިގެ ހެކިބަސް ދިނުން ކެންސަލް ކުރުމަށް އެދުމުން، ޖެރޫސަލަމްގެ ކޯޓުން އެ އަޑު އެހުން ކެންސަލް ކޮށްފި އެވެ. 

މިކަން ހާމަ ކޮށްފައި ވަނީ އިޒްރޭލްގެ މީޑިއާ ތަކުގަ އެވެ. ބޮޑު ވަޒީރު ނަތަންޔާހޫގެ ޤާނޫނީ ވަކީލުންގެ ފަރާތުން މިފަދައިން އެދިފައި ވަނީ، ސަލާމަތީ ބައެއް ކަންކަމުގެ އިތުރުން، ޑިޕްލޮމެޓިކް ސަބަބުތައް ފާހަގަކޮށެވެ. 

މި މައްސަލައިގައި ހިނގަމުންދާ ޝަރީއަތް މިހާރު އޮތީ، ނަތަންޔާހޫ އަމިއްލަފުޅަށް ދެއްވި ހެކިބަސްސ ކްރޮސް އެގްޒެމިން ކުރުމުގެ މަރުހަލާގަ އެވެ. 

ނަތަންޔާހޫ އަށް ކުރިމަތިލާން ޖެހިފައި ވަނީ ކޮރަޕްޝަންގެ ތިން ދައުވާއަކާ އެވެ. މި ދައުވާތައް އުފުލާފައި ވަނީ 2019 ވަަނ އަހަރުގެ ތެރޭގަ އެވެ. މި މައްސަލައިގައި ނަތަންޔާހޫ ކޯޓަށް ހާޒިރުވާން އެދިފައި ވީ ނަމަވެސް، އެތައް ފަހަރެއްގެ މަތިން އެކަން ފަސްކޮށްފައިވާކަން ވެސް ފާހަގަ ކޮށްފައިވެ އެވެ. 

މީގެ ކުރިން ނަތަންޔާހޫ ކޯޓަށް ހާޒިރުވުމަށް އަންގާފައި ވީ ނަމަވެސް، އިޒްރޭލް އިން ޣައްޒާ އާއި ލުބުނާންގައި ހިންގަމުން އަންނަ ހަނގުރާމައިގެ ސަބަބުން އެކަން ވަނީ ފަސްކޮށްފަ އެވެ. އެގޮތުން ނަތަންޔާހޫގެ ފަރާތުން ވަނީ އެ ހަނގުރާމަތައް ސަބަބެއްގެ ގޮތުގައި ދައްކަވައި، އަޑު އެހުންތައް ފަސް ކުރުމަށް އެދިފަ އެވެ. 

އިޒްރޭލްގެ ބޮޑު ވަޒީރު ކަމުގައި ހުންނަވައި ކޮރަޕްޝަންގެ މައްސަލަތަކާ ކުރިމަތިލާން ޖެހުމުން އެތައް ބައެއްގެ ފާޑު ކިޔުން ވެސް ނަތަންޔާހޫ އަށް އަމާޒުވެފައިވެ އެވެ.