އިޒްރޭލުން އެލްބިޓް ސިސްޓަމްސް އަށް 200 މިލިއަން ޑޮލަރުގެ ހަތިޔާރުގެ އޯޑަރެއް ދީފި

އިޒްރޭލްގެ ޑިފެންސް މިނިސްޓްރީ އިން، އެ ޤައުމުގެ ހަތިޔާރު އުފައްދާ އެންމެ ބޮޑު އެއް ކުންފުނި ކަމަށްވާ އެލްބިޓް ސިސްޓަމްސް އަށް 200 މިލިއަން އެމެރިކާ ޑޮލަރަށް ވުރެ ބޮޑު އޯޑަރެއް ދީފި އެވެ. 

މި އޯޑަރަކީ ވައިގެ މަގުން ބޭނުން ކުރާ ހަތިޔާރާއި، ގޮވާ ތަކެތި ހޯދުމަށް ދީފައިވާ އޯޑަރެއް ކަމަށް އެ ޤައުމުގެ ސަރުކާރުން ވަނީ ހާމަ ކޮށްފަ އެވެ. 

އިޒްރޭލްގެ ޑިފެންސް މިނިސްޓްރީ އިން ނެރުނު ބަޔާނެއްގައި ބުނެފައި ވަނީ، އެލްބިޓް ސިސްޓަމްސްއާ އެކު ވެވުނު މި އެއްބަސްވުމުގެ ދަށުން އެކި ބާވަތް ތަކުގެ ވައިގެ އުޅަނދު ތަކުގައި ބޭނުން ކުރާނެ މުހިންމު ހަތިޔާރު ސަޕްލައި ކޮށްދޭނެ ކަމަށެވެ. މީގެ ތެރޭގައި މަތިންދާ ބޯޓު ތަކުން އުކާލާ ބޮމާއި، އެހެނިހެން ޒަމާނީ ހަތިޔާރުތައް ހިމެނޭ ކަމަށް އެ ވުޒާރާ އިން މައުލޫމާތުދެ އެވެ. 

މި އޯޑަރަކީ އިޒްރޭލް އިން މިހާރު ކުރިއަށް ގެންދާ އަސްކަރީ އޮޕަރޭޝަންތަކާ ގުޅިގެން، އެ ޤައުމުގެ ހަތިޔާރުގެ ރިޒާވް އިތުރު ކުރުމަށް އަޅާފައިވާ މުހިންމު ފިޔަވަޅެއް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ. އިޒްރޭލް އިން ޣައްޒާ އާއި ލުބުނާނަށް ދެމުންދާ ހަމަލާ ތަކުގައި ގިނަ އަދަދެއްގެ ހަތިޔާރު ބޭނުން ކުރަމުން ދާތީ، އަމިއްލަ ޤައުމުގެ ކުންފުނި ތަކުން ހަތިޔާރު އުފެއްދުމުގެ މަސައްކަތް ވަނީ ވަރަށް ބޮޑަށް އަވަސް ކޮށްފަ އެވެ.

އެލްބިޓް ސިސްޓަމްސް އަކީ އިޒްރޭލްގެ އަސްކަރިއްޔާ އަށް ބޭނުންވާ ޓެކްނޮލޮޖީ އާއި ހަތިޔާރު ފޯރުކޮށްދިނުމުގައި އެންމެ އިސް ދައުރެއް އަދާ ކުރާ ކުންފުންޏެވެ. މި އައު އެއްބަސްވުމާ އެކު އެ ކުންފުނީގެ އެފެއްދުންތެރިކަން އިތުރުކޮށް، ކުރިއަށް އޮތް މަސް ތަކުގެ ތެރޭގައި ހަތިޔާރުތައް ފޯރުކޮށްދިނުމުގެ މަސައްކަތް ފަށާނެ ކަަމަށް ބެލެވެ އެވެ. 

އިޒްރޭލްގެ ދިފާއީ ބަޖެޓުން ބޮޑު ހޭދައެއް ހަތިޔާރު ގަތުމަށް ކުރަމުންދާއިރު، މީގެ ކުރިން ވެސް އެ ޤައުމުން ވަނީ އެމެރިކާ އާއި އެހެނިހެން ޤައުމު ތަކުން ބިލިއަން ޑޮލަރުގެ ހަތިޔާރު ހޯދުމަށް އެއްބަސްވުންތައް ޤާއިމު ކޮށްފަ އެވެ.