ސަލާމަތީ ސަބަބު ތަކަށްޓަކައި ނަތަންޔާހޫގެ ބަޔާން ނެގުން ކެންސަލް ކޮށްފި

އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ މައްޗަށް އުފުލާފައިވާ ކޮރަޕްޝަންގެ ދައުވާތަކާ ގުޅިގެން ހޯމަ ދުވަހު ބާއްވަން އޮތް ބަޔާން ދިނުމުގެ ޝަރީއަތް ކެންސަލް ކޮށްފި އެވެ. 

ހޯމަ ދުވަހުގެ ޝަރީއަތް ކެންސަލް ކޮށްފައި ވަނީ، އެ ޝަރީއަތް ފެށެން ކުޑަ ވަގުތު ކޮޅަކަށް ވެފައި ވަނިކޮށެވެ. އިޒްރޭލްގެ މީޑިއާ ތަކުގައި ބުނެފައިވާ ގޮތުން، އެ ޝަރީއަތް ކެންސަލް ކޮށްފައި ވަނީ ސަލާމަތީ ބައެއް ސަބަބު ތަކަށްޓަކައި އެވެ. 

ނަތަންޔާހޫގެ ޤާނޫނީ ވަކީލު އަމިތު ހަދާދު ކޯޓުގައި އެދިވަޑައިގެންފައި ވަނީ، ސަލާމަތީ ގޮތުން މިވަގުތު ހުރި ނުރައްކާ ތަކަށް ބަލައި، ބަޔާން ނެގުން ފަސްކޮށްދިނުމަށެވެ. މިއީ ނަތަންޔާހޫގެ މައްޗަށް އުފުލާފައިވާ ކޮރަޕްޝަންގެ ސީރިއަސް މައްސަލަ ތަކުގެ ތެރެއިން، އޭނާގެ ބަޔާން ނެގުމަށް ތާވަލް ކުރި ފުރަތަމަ ފަހަރެވެ. 

ނަތަންޔާހޫގެ މައްޗަށް ދައުލަތުން އުފުލާފައިވާ ދައުވާ ތަކުގެ ތެރޭގައި ރިޝްވަތު ހިފުމާއި، މަކަރާއި ހީލަތް ހެދުމުގެ އިތުރުން، މަގާމުގެ ނުފޫޒު ބޭނުން ކޮށްގެން އިތުބާރު ނެތް އަމަލުތައް ހިންގުމުގެ ދައުވާތައް ހިމެނެ އެވެ. މި މައްސަލަ ތަކަކީ ގިނަ ދުވަސް ތަކެއް ވަންދެން ދެމިގެން ގޮސްފައިވާ އަދި އެކި ސަބަބުތަކާ ހުރެ ތަކުރާރުކޮށް ލަސްވަމުން އަންނަ މައްސަލަ ތަކެކެވެ. 

މި ޝަރީއަތަކީ އިޒްރޭލްގެ ސިޔާސީ މަސްރަހުގައި ވަރަށް ބޮޑު ސަމާލު ކަމެއް ހުއްޓިފައިވާ މައްސަލަ އެކެވެ. ނަތަންޔާހޫގެ މައްޗަށް ކުރެވޭ މި ތުހުމަތު ތަކަށް އޭނާ އަބަދު ވެސް އިންކާރު ކުރައްވަ އެވެ. ނަމަވެސް، ހަނގުރާމައިގެ ޙާލަތާއި ސަލާމަތީ ސަބަބުތައް ދައްކައިގެން ޝަރީއަތް ލަސްކުރަމުން ދާތީ، އިދިކޮޅު ފަރާތް ތަކުންނާއި އާންމު ރައްޔިތުންގެ މެދުގައި އެކަމާ މެދު ބޮޑެތި ފާޑު ކިޔުންތަކެއް ވަނީ އަމާޒުވެފަ އެވެ.