ތެލުގެ އަގު 100 ޑޮލަރަށްވުރެ މައްޗަށް އުފުލިއްޖެ
އެމެރިކާއާއި އީރާނާ ދެމެދު ކުރެވުނު މަޝްވަރާތައް ނާކާމިޔާބުވުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ފީފާއަކަށް 100 ޑޮލަރަށްވުރެ މައްޗަށް އުފުލިއްޖެ. މި ބަދަލާއެކު ބްރެންޓް ކުރޫޑްގެ އަގު 102.37 ޑޮލަރަށް އަރާފައިވާއިރު، މިއީ ދުނިޔެއަށް ކުރިމަތިވެފައިވާ ހަކަތައިގެ ދަތިކަން އިތުރަށް ގޯސްވެދާނެ ކަމުގެ ބިރު ވަނީ ބޮޑުވެފައި. މީގެ ކުރިން ހަމަލާބަދަލުކުރުން ހުއްޓާލުމުގެ އުންމީދުގައި ތެލުގެ އަގު ދަށަށް ދިޔަ ނަމަވެސް، މަޝްވަރާތައް އެއްބަސްވުމަކާ ނުލައި ނިމުމުން ބާޒާރަށް ވަނީ ބޮޑު ލޮޅުމެއް އަރާފައި.
ތެޔޮ ފީފާތަކެއް. | ގެޓީ އިމޭޖަސް
އެމެރިކާ އާއި އީރާނާ ދެމެދު ކުރެވުނު މަޝްވަރާތައް އެއްބަސްވުމަކަށް ނާދެވި ނިމުމާއި، އީރާނުގެ ބަނދަރުތައް ބަންދުކުރައްވާނެ ކަމަށް ޑޮނަލްޑް ޓްރަމްޕް ވިދާޅުވުމާ ގުޅިގެން، ހޯމަ ދުވަހު އޭޝިއާގެ ހަކަތައިގެ ބާޒާރުތައް ހުޅުވުނުއިރު ތެލުގެ އަގު ފީފާއަކަށް 100 ޑޮލަރަށްވުރެ މައްޗަށް އަރައިފި އެވެ.
ދުނިޔޭގެ ބާޒާރުގައި ތެލުގެ އަގު ހުންނަ މިންގަނޑު ކަމަށްވާ ބްރެންޓް ކުރޫޑްގެ އަގު 8.5 އިންސައްތަ މައްޗަށް ގޮސް، މިހާރު ހުރީ ފީފާއަކަށް 102.37 ޑޮލަރު (77.15 ޕައުންޑް) ގައެވެ. އަދި ވެސްޓް ޓެކްސަސް އިންޓަމީޑިއޭޓްގެ އަގު 9 އިންސައްތަ މައްޗަށް ގޮސް، ފީފާއަކަށް 105.34 ޑޮލަރަށް ވަނީ އުފުލިފަ އެވެ.
ނިމިދިޔަ ހަފުތާ ބަންދުގައި ކުރެވުނު މަޝްވަރާތައް ނާކާމިޔާބުވުމާ ގުޅިގެން، ދުނިޔެއަށް ކުރިމަތިވެފައިވާ ހަކަތައިގެ ކްރައިސިސް ނުވަތަ ދަތިކަން އިތުރަށް ގޯސްވެދާނެ ކަމުގެ ބިރުވެރިކަން މިހާރު ވަނީ ބޮޑުވެފަ އެވެ.
ވޮޝިންޓަނާއި ތެހެރާނާ ދެމެދު ޝަރުތުތަކަކާއެކު ދެ ހަފުތާގެ މުއްދަތަށް ހަމަލާބަދަލުކުރުން ހުއްޓާލުމަށާއި، ވިޔަފާރީގެ މުހިންމު މަގެއް ކަމަށްވާ ހޮރްމޫޒް ކަނޑުއޮޅި ހުޅުވާލުމަށް އެއްބަސްވުމާ ގުޅިގެން، މިދިޔަ ބުދަ ދުވަހު ތެލުގެ އަގު ވަނީ 100 ޑޮލަރަށްވުރެ ދަށަށް ގޮސްފަ އެވެ.
