ދުބާއީގައި ކުވެއިތުގެ ތެޔޮ ޓޭންކަރަކަށް އީރާން އިން ހަމަލާ ދީފި
31 މާރިޗު 2026 | އަންގާރަ 06:28ކުވެއިތުގެ ސަރުކާރުގެ ތެލުގެ ކުންފުންޏާ ހަވާލާދީ ކުވެއިތުގެ ރަސްމީ ނޫސް އެޖެންސީ، ކޫނާ އިން ރިޕޯޓު ކޮށްފައި ވަނީ ޔޫއޭއީ.ގެ ދުބާއީ ބަނދަރުގައި އޮތް ކުވެއިތުގެ ބޮޑު ތެޔޮ ޓޭންކަރަކަށް އީރާން އިން ސީދާ ހަމަލާ ދީފައިވާ ކަމަށް.
ޕޯޓް ރާޝިދުގައި އުޅަނދު ފަހަރު ބަނދަރުކޮށްފައި އޮތް މަންޒަރާ އެކު، ދުރުން ބުރުޖް ޚަލީފާ ފެންނަން. | ރޮއިޓާސް
ދުބާއީގެ ބަނދަރުގައި އޮތް ކުވެއިތުގެ ބޮޑު ތެޔޮ ޓޭންކަރަކަށް އީރާން އިން ހަމަލާދީ، އެ ބޯޓުގައި އަލިފާން ރޯކޮށްލާފައިވާ ކަމަށް ކުވެއިތު ސަރުކާރުގެ މީޑިއާ އިން ރިޕޯޓު ކޮށްފި އެވެ. މިއީ އެމެރިކާ އާއި އިޒްރޭލް އިން ދިން ހަމަލާ ތަކަށް ރައްދު ދިނުމުގެ ގޮތުން އީރާން އިން ގަލްފުގެ ސަރަހައްދުގައި ހިމެނޭ އަމާޒު ތަކަށް ދެމުން އަންނަ ހަމަލާ ތަކުގެ ތެރެއިން ހަމަލާއެއް ކަމަށް ބުނެފައިވެ އެވެ.
ކުވެއިތުގެ ސަރުކާރު ތެލުގެ ކުންފުންޏާ ހަވާލާދީ ކުވެއިތުގެ ރަސްމީ ނޫސް އެޖެންސީ، ކޫނާ އިން ރިޕޯޓު ކޮށްފައި ވަނީ އެމިރޭޓްސްގެ ދުބާއީ ބަނދަރުގައި އޮތް ކުވެއިތުގެ ބޮޑު ތެޔޮ ޓޭންކަރަކަށް އީރާން އިން ސީދާ ހަމަލާ ދީފައިވާ ކަމަށެވެ. އަދި އެއީ ނުބައި ނިޔަތެއްގައި ދީފައިވާ ހަމަލާއެއް ކަމަށް ވެސް ފާހަގަ ކޮށްފައިވެ އެވެ.
އެ ރިޕޯޓުގައި ބުނެފައިވާ ގޮތުން މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވެ އެވެ. ދުބާއީގެ ކަމާ ގުޅުން ހުރި އިދާރާ ތަކުން ބުނެފައި ވަނީ ބޯޓުގައި ރޯވި އަލިފާންގަނޑު ނިއްވާލާފައިވާ ކަމަށާއި، ބޯޓުގައި ތިބި 25 ފަޅުވެރިން ވެސް ތިބީ ސަލާމަތުން ކަމަށެވެ.
ކޫނާ އިން ރިޕޯޓު ކޮށްފައި ވަނީ ހަމަލާ ދިން ވަގުތު ޓޭންކަރު އޮތީ ތެޔޮ ބަރު ކޮށްގެން ކަމަށާއި، އެ ހަމަލާގެ ސަބަބުން ބޯޓަށް ގެއްލުން ތަކެއް ލިބިފައިވާ ކަމަށެވެ. އަދި އެ ސަރަހައްދުގައި ތެލުގެ ލީކެއް އުޅުމަކީ އެކަށީގެންވާ ކަމެއް ކަމަށް ވެސް ބުނެފައިވެ އެވެ.
މަސްދަރު: އޭއެފްޕީ
