އީރާން އިން ކުވެއިތުގެ ބައިނަލްއަޤުވާމީ ވައިގެ ބަނދަރަށް ހަމަލާ ތަކެއް ދީފި

ކުވެއިތުގެ ބައިނަލްއަޤުވާމީ ވައިގެ ބަނދަރަށް އީރާން އިން ޑްރޯން ހަމަލާ ތަކެއް ދީފައިވާ ކަމަށާއި، އެ ބަނދަރުގެ ތެޔޮ ރައްކާކުރާ ޓޭންކުތަކެއްގައި އަލިފާން ރޯވެފައިވާ ކަމަށް އެ ޤައުމުގެ ސިވިލް އޭވިއޭޝަން އޮތޯރިޓީ އިން ބުދަ ދުވަހު ބުނެފި އެވެ. 

ކުވެއިތުގެ ރަސްމީ ނިއުސް އެޖެންސީ، ކޫނާ އިން އެ ޤައުމުގެ ޖެނެރަލް ޑައިރެކްޓްރޭޓް އޮފް ސިވިލް އޭވިއޭޝަންގެ ތަރުޖަމާނު ޢަބްދުﷲ އަލް ރާޖީއާ ހަވާލާދީ ރިޕޯޓު ކޮށްފައިވާ ގޮތުގައި، ކުވެއިތުގެ އިންޓަނޭޝަނަލް އެއާޕޯޓަށް މި ހަމަލާ ދީފައި ވަނީ އީރާން އާއި، އެ ޤައުމުން ވާގިވެރިޔާ ހަތިޔާރު އެޅި ޖަމާއަތް ތަކުންނެވެ. މި ހަމަލާގައި އަމާޒު ކޮށްފައި ވަނީ ތެޔޮ ރައްކާ ކުރާ ތަންތަނަށް ކަމަށާއި، އޭގެ ސަބަބުން އެ ސަރަހައްދުގައި ބޮޑު އަލިފާން ގަނޑެއް ރޯވި ނަމަވެސް، އެއްވެސް މީހަކަށް އަނިޔާއެއް ލިބިފައި ނުވާ ކަމަށް ފާހަގަ ކޮށްފައިވެ އެވެ. 

ބުދަ ދުވަހު ގަލްފު ސަރަހައްދުގެ ބައެއް އެހެން ޤައުމު ތަކަށް ވެސް ހަމަލާ އަމާޒުވެފައިވާ ކަމަށް ވަނީ ފާހަގަ ކޮށްފަ އެވެ. ބަހްރެއިންގެ އިންޓީރިއާ މިނިސްޓްރީ އިން ބުނި ގޮތުގައި، އީރާންގެ އުދުވާނީ ހަމަލާ ތަކުގެ ސަބަބުން އެ ޤައުމުގެ ވިޔަފާރި މަރުކަޒެއްގައި ވަނީ އަލިފާން ރޯވެފަ އެވެ. 

ސައުދީ އަރަބިއްޔާގެ ޑިފެންސް މިނިސްޓްރީ އިން ބުނެފައި ވަނީ އެ ޤައުމަށް އަމާޒުކޮށް ފޮނުވާލި ބައެއް ޑްރޯންތައް ދެނެ ގަނެ، ވައިގެ ތެރޭގައި ގޮއްވާލާފައިވާ ކަމަށެވެ. މީގެ އިތުރުން ޤަތަރުގެ އުތުރުން 17 ނޯޓިކަލް މޭލު، ނުވަތަ 31 ކިލޯ މީޓަރު ބޭރުން ދަތުރު ކުރަމުން ދިޔަ ތެޔޮ ޓޭންކަރަކަށް ވެސް ހަމަލާއެއް އަރާފައިވާ ކަމަށް، އިނގިރޭސިވިލާތުގެ މެރިޓައިމް ސެކިއުރިޓީ އެޖެންސީ އިން ވަނީ ރިޕޯޓު ކޮށްފަ އެވެ. 

ޔޫކޭ މެރިޓައިމް ޓްރޭޑް އޮޕަރޭޝަންސް އިން ބުނި ގޮތުގައި، ގޮތް ނޭނގޭ އެއްޗަކުން ދިން މި ހަމަލާގައި ޓޭންކަރުގެ އެއް ފަރާތުން ފެނުން މަތީގައިވާ ބަޔަށް ގެއްލުން ލިބިފައިވާ ކަމަށެވެ. ނަމަވެސް، އުޅަނދުގެ ފަޅުވެރިން ސަލާމަތުން ތިބި ކަމަށާއި، ތިމާވެއްޓަށް އެއްވެސް ނުރައްކަލެއް ކުރިމަތިވެފައި ނުވާ ކަމަށް އެ އިދާރާ އިން ވަނީ ބުނެފަ އެވެ. ކަމާ ގުޅުން ހުރި ފަރާތް ތަކުން ގެންދަނީ މި ހާދިސާ ތަހުގީގު ކުރަމުންނެވެ.