ނަތަންޔާހޫ އަށް މައާފު ދިނުމުގެ ކުރިން، މަޝްވަރާ ކުރަން އިޒްރޭލްގެ ރައީސް ދައުވަތު ދެއްވައިފި

އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫގެ މައްޗަށް އުފުލާފައިވާ ކޮރަޕްޝަންގެ ދައުވާތަކާ ގުޅިގެން، އޭނާ އަށް މައާފު ދިނުމާ މެދު ގޮތެއް ނިންމުމުގެ ކުރިން މަޝްވަރާ ކުރުމަށް އެ ޤައުމުގެ ރައީސް އިސާކް ހާޒޮގް ދައުވަތު ދެއްވައިފި އެވެ. 

އިޒްރޭލްގެ ރައީސްގެ އޮފީހުން އަންގާރަ ދުވަހު ހާމަ ކޮށްފައިވާ ގޮތުގައި، މި މަޝްވަރާ ތަކަށް ނަތަންޔާހޫގެ ޤާނޫނީ ވަކީލުންނާއި، ދައުލަތުގެ ޕްރޮސެކިއުޓަރުންނަށް ވަނީ ދައުވަތު ދީފަ އެވެ. މި މަޝްވަރާތައް ކުރިއަށް ގެންދިޔުމަށް ނިންމާފައި ވަނީ އިޒްރޭލްގެ ރައީސްގެ ގެކޮޅުގަ އެވެ. 

އިޒްރޭލްގެ ރައީސް ހާޒޮގްގެ ޤާނޫނީ އެޑްވައިޒަރު ސުކް ޝާފިރު ފޮނުއްވި ސިޓީއެއްގައި ވިދާޅުވެފައި ވަނީ، ބޮޑު ވަޒީރަށް މައާފު ދިނުމާ ގުޅޭ ގޮތުން ރައީސް އަށް ލިބިވަޑައިގެންފައިވާ ބާރުގެ ބޭނުން ކުރެއްވުމުގެ ކުރިން، ދެ ފަރާތުގެ ދެ މެދުގައި ވާހަކަ ދައްކައިގެން އެއްބަސްވުމަަކަށް އާދެވޭތޯ ހުރިހާ މަސައްކަތެއް ކުރަން ޖެހޭ ކަމަށް ރައީސް ޤަބޫލުފުޅު ކުރައްވާ ކަމަށެވެ. 

މި ސިޓީ ފޮނުވާފައި ވަނީ ބޮޑު ވަޒީރު ނަތަންޔާހޫގެ ޤާނޫނީ ވަކީލު އަމިތު ހައްދާދު އާއި، ބަންޑާރަ ނައިބު ގާލީ ބަހަވަރް މިއާރާގެ އިތުރުން، ސްޓޭޓް ޕްރޮސެކިއުޓަރު އަމިތު އައިސްމަން އަށެވެ.

އިޒްރޭލްގެ ބޮޑު ވަޒީރު ނަތަންޔާހޫގެ މައްޗަށް މިހާރު ތިން ދައުވާއެއް ކުރިއަށްދެ އެވެ. އޭގެ ތެރޭގައި ހިމެނެނީ އިޒްރޭލްގެ މީޑިއާ ކުންފުނި ތަކުން އޭނާ އަށް ތާއީދުކޮށް ޚަބަރުތައް ފެތުރުމަށް ނުފޫޒު ފޯރުވި ކަމަށް ބުނާ ދެ މައްސަލަ އަކާއި، ބިލިއަނަރުންގެ އަތުން ސިޔާސީ މަންފާގެ ބަދަލުގައި 260،000 އަށް ވުރެ ގިނަ އެމެރިކާ ޑޮލަރުގެ އަގު ބޮޑު ހަދިޔާ ޤަބޫލު ކުރި ކަމަށް ބުނާ މައްސަލަ އެވެ. މީގެ ކުރިން އޭނާގެ މައްޗަށް އުފުލި ކޮރަޕްޝަންގެ ހަތަރު ވަނަ ދައުވާއެއް ވަނީ ބާތިލު ކޮށްފަ އެވެ. 

އިޒްރޭލްގެ ރައީސްގެ އޮފީހުން ބުނެފައިވާ ގޮތުގައި، މި މަޝްވަރާ ތަކަކީ މައާފު ދިނުމުގެ ބާރު ބޭނުން ކުރުމާ މެދު ރައީސް ގޮތެއް ނިންމެވުމުގެ ކުރިން، ކުރިއަށް ގެންދާ އިބްތިދާއީ މަރުހަލާ އެކެވެ. ނަތަންޔާހޫ އަށް މައާފު ދިނުމުގެ މައްސަލަ ފެންމަތިވެފައި ވަނީ، މިދިޔަ އަހަރުގެ އޮކްޓޫބަރު މަހުގެ ތެރޭގައި އެމެރިކާގެ ރައީސް ޑޮނަލްޑް ޓްރަމްޕް އިޒްރޭލްގެ ޤާނޫނު ހަދާ މަޖިލީހުގައި ތަޤުރީރު ކުރައްވަމުން، ނަތަންޔާހޫ އަށް މައާފު ދިނުމަށް ރައީސް ހާޒޮފްގެ ކިބައިން އެދިވަޑައިގެންނެވުމުންނެވެ. އޭގެ ފަހުން ޓްރަމްޕް ވަނީ، އެކަމަށް އެދި ރަސްމީކޮށް ސިޓީއެއް ވެސް ފޮނުއްވައިފަ އެވެ. 

2019 ވަނަ އަހަރުން ފެށިގެން ކުރިއަށްދާ މި ޝަރީއަތް ތަކަކީ ސިޔާސީ މަޤުސަދެއްގައި ކުރިއަށް ގެންދާ ކަމެއް ކަމަށް ބުނެ، ނަތަންޔާހޫ ވަނީ އޭނާއާ ދެކޮޅަށް ކުރާ ހުރިހާ ދައުވާ ތަކަށް އިންކާރު ކުރައްވައިފަ އެވެ. އޭނާ އަކީ އިޒްރޭލްގެ ތާރީޚުގައި ވެސް، މަގާމުގައި ހުންނަވަނިކޮށް ކޮރަޕްޝަންގެ ދައުވާ އުފުލި ފުރަތަމަ ބޮޑު ވަޒީރެވެ.