ޓްރަމްޕް ކާމިޔާބީ އިއުލާާން ކޮށްފި ނަމަ، އީރާންގެ އަމަލުތައް ހުންނާނެ ގޮތް އެމެރިކާގެ ޖާސޫސީ އިދާރާ ތަކުން ބަލަނީ

އީރާންއާ ދެކޮޅަށް އެމެރިކާ އިން ކުރަމުން އަންނަ ހަނގުރާމައިގައި، އެމެރިކާގެ ރައީސް ޑޮނަލްޑް ޓްރަމްޕް އަމިއްލަފުޅަށް ކާމިޔާބީ އިއުލާން ކުރައްވައިފި ނަމަ، އީރާން އިން އަމަލު ކުރާނެ ގޮތް ތަކެއް އެމެރިކާގެ ޖާސޫސީ އިދާރާ ތަކުން ދިރާސާ ކުރަން ފަށައިފި އެވެ. 

މި ދިރާސާ ކުރިއަށް މި ގެންދަނީ އެތައް ހާސް ބަޔަކު މަރުވެފައިވާ އަދި އެމެރިކާ އަށް ސިޔާސީ ގޮތުން ބޮޑެތި ގޮންޖެހުން ތަކެއް ކުރިމަތިވަމުންދާތާ ދެ މަސް ދުވަސްވީ ހަނގުރާމައެއްގެ ތެރޭގަ އެވެ. އީރާންގެ ހަނގުރާމައާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް އަށް ވެސް އަންނަނީ ޕްރެޝަރު ބޮޑުވަމުންނެވެ. 

އެމެރިކާ ސަރުކާރުގެ އިސް އޮފިޝަލުންގެ އެދިވަޑައިގެންނެވުމަށް ކުރިއަށް ގެންދާ މި ދިރާސާގެ މައިގަނޑު ބޭނުމަކީ، ހަނގުރާމަ އިން އެމެރިކާ ފަހަތަށް ޖެހިއްޖެ ނަމަ، ނިކުމެދާނެ ނަތީޖާ ތަކެއް ދެނެގަތުމަށެވެ. މިއަހަރުގެ ނޮވެމްބަރު މަހުގެ ތެރޭގައި އޮންނަ އެމެރިކާގެ މިޑް ޓާމް އިންތިޚާބުގައި ވެރިކަން ކުރާ ރިޕަބްލިކަން ޕާޓީ އަށް ބޮޑު ނާކާމިޔާބަކާ ކުރިމަތިލާން ޖެހިދާނެ ކަމުގެ ބިރު އޮތުމާ އެކު، ހަނގުރާމަ އިން ނިކުތުމަށް ބައެއް އެޑްވައިޒަރުން ޓްރަމްޕް އަށް ލަފާ ދެއްވާ ކަމަށް ވެސް ބުނެފައިވެ އެވެ. 

ނަމަވެސް، މިކަމުގައި ވަކި ގޮތެއް މިހާތަނަށް ނިމިފައި ނުވާއިރު، އަސްކަރީ އޮޕަރޭޝަންތައް ވަރުގަދަ ކުރުމުގެ ފުރުސަތު އޮތް ކަމަށް ވެސް ވަނީ ބުނެފަ އެވެ. 

މީގެ ކުރިން ޖާސޫސީ އިދާރާ ތަކުން ކޮށްފައިވާ ދިރާސާ ތަކުން ދައްކާ ގޮތުގައި، އެމެރިކާ އިން ކާމިޔާބީ އިއުލާންކޮށް، ސަރަހައްދުން ސިފައިން މަދު ކޮށްފި ނަމަ، އީރާން އެކަން ދެކޭނީ އެ ޤައުމަށް ލިބުނު ވަރަށް ބޮޑު ކާމިޔާބެއްގެ ގޮތުގަ އެވެ. އަދި އެމެރިކާ ފަހަތަށް ޖެހުމަލީ، އީރާން އަށް ލިބޭ ވަރަށް ބޮޑު ހިތްވަރަކަށް ވެ، އެ ޤައުމުގެ ނިއުކްލިއާ އަދި މިސައިލް ޕްރޮގްރާމްތައް އަލުން ބިނާކޮށް، ސަރަހައްދީ ޤައުމު ތަކަށް ނުރައްކާ ކުރުމުގެ ފުރުސަތު އޮންނާނެ ކަމަށް އިންޒާރު ދީފައިވެ އެވެ. 

މީގެ އިތުރުން އެމެރިކާގެ ސިފައިން އެ ސަރަހައްދުގައި ބައިތިއްބައިގެން ކާމިޔާބީ އިއުލާން ކުރި ނަމަވެސް، އީރާން އެކަން ބަލާނީ ހަމައެކަނި މަޝްވަރާގެ އުކުޅެއްގެ ގޮތުގައި ކަމަށް ޖާސޫސީ އިދާރާގެ ރިޕޯޓުގައި ބުނެފައިވެ އެވެ. 

މި މައްސަލައާ ގުޅިގެން ސީއައިއޭގެ ޕަބްލިކް އެފެއާޒް ޑިރެކްޓަރު ލިޒް ލިޔޯންސް ވިދާޅުވީ، ޖާސޫސީ އިދާރާ ތަކުން މިފަދަ ދިރާސާއެއް ކުރާނެކަން އެނގިވަޑައިގެންފައި ނުވާ ކަމަށެވެ. އަދި އީރާންއާ ގުޅޭ ގޮތުން ކުރަމުންދާ މަސައްކަތް ތަކުގެ ތަފްސީލު ދިނުމަށް އެ އިދާރާ އިން ވަނީ އިންކާރު ކޮށްފަ އެވެ. ހަމަ އެއާ އެކު، އޮފީސް އޮފް ދަ ޑިރެކްޓަރު އޮފް ނޭޝަނަލް އިންޓެލިޖެންސް އިން ވެސް، މިކަމާ ގުޅޭ ގޮތުން އެއްވެސް އެއްޗެއް ބުނާކަށް ބޭނުމެއް ނުވި އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގެ ތަރުޖަމާނު ވިދާޅުވީ އީރާން އާއެކު އަދިވެސް މަޝްވަރާތައް ކުރިއަށްދާ ކަމަށެވެ. ނަމަވެސް، އެމެރިކާ އިން އަވަސް އަރުވާލައިގެން ގޯސް އެއްބަސްވުމަކަށް ނުދާނެ ކަމަށް އޭނާ ވިދާޅުވި އެވެ. ހަމަ އެއާ އެކު، އެމެރިކާގެ ރައީސް ޓްރަމްޕް އިސްކަން ދެއްވާނީ ޤައުމީ ސަލާމަތަށް ކަމަށާއި، އީރާން އަށް ދުވަހަކު ވެސް ނިއުކްލިއާ ހަތިޔާރު އުފެއްދުމުގެ ފުރުސަަތު ނުދެއްވާނެ ކަމަށް އޭނާ ވިދާޅުވި އެވެ.