އެހެން ޤައުމު ތަކުގެ ސިޔާސަތު ކަނޑައެޅުމުގެ ބާރު އެމެރިކާ އަކަށް ނެތް: އީރާން

އެހެން ޤައުމު ތަކުން އަމަލު ކުރަންވީ ގޮތް ބުނެދީ، އެ ޤައުމު ތަކުގެ ސިޔާސަތުތައް ކަނޑައެޅުމުގެ ބާރު މިހާރު އެމެރިކާ އަށް ނެތް ކަމަށް، އީރާން އިން ބުނެފި އެވެ. 

އީރާން އިން މިހެން ބުނެފައި ވަނީ، ހޮރްމޫޒް ކަނޑު އޮޅި އަލުން ހުޅުވާލުމާ ގުޅޭ ގޮތުން އީރާން އިން ހުށަހަޅާފައިވާ އައު ހުށަހެޅުމަކަށް އެމެރިކާ އިން މަޝްވަރާ ކުރަމުން އަންނަނިކޮށެވެ. 

އީރާންގެ ދިފާއީ ވުޒާރާގެ ތަރުޖަމާނު ރިޒާ ތަލާއީ ނިކް، އެ ޤައުމުގެ ދައުލަތުގެ މީޑިއާ އަށް ދެއްވި ބަޔާނެއްގައި ވިދާޅުވީ، މިނިވަން މުސްތަޤިއްލު ޤައުމު ތަކަށް އެމެރިކާގެ ސިޔާސަތުތައް މަޖުބޫރު ކުރެވޭނެ ޙާލަތެއްގައި މިހާރު އެ ޤައުމު ނެތް ކަމަށެވެ. އަދި އެމެރިކާ އިން ކުރަމުންދާ ޣައިރު ޤާނޫނީ އަދި ބުއްދި އަށް ޤަބޫލު ނުކުރެވޭ ފަދަ ޑިމާންޑުތައް ދޫކޮށްލަން ޖެހޭކަން އެމެރިކާ އިން ޤަބޫލު ކުރަން ޖެހޭ ކަމަށް ވެސް އޭނާ ވިދާޅުވި އެވެ.

އެމެރިކާ އާއި އިޒްރޭލްއާ ދެކޮޅަށް ކުރަމުންދާ ހަނގުރާމައިގެ ކުރީ ކޮޅުން ފެށިގެން، އީރާން އިން ވަނީ އިސްތިރާތީޖީ ގޮތުން މުހިންމު ސަރަހައްދެއް ކަމަށްވާ ހޮރްމޫޒް ކަނޑު އޮޅި ބަންދު ކޮށްފަ އެވެ. އެކަމުގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުން ތަކެއް އަރާފައިވާއިރު، މި ހަނގުރާމަ ނިމުމަކަށް ގެނައުމަށް ކުރެވޭ މަޝްވަރާ ތަކުގެ މައިގަނޑު އަސާސް އަކަށް ވެފައި ވަނީ ހޮރްމޫޒް ކަނޑުއޮޅި ހުޅުވުމުގެ މައްސަލަ އެވެ. 

އީރާން އާއި އެމެރިކާ އަަދި އިޒްރޭލްއާ ދެމެދު މިހާރު އޮތް ހަމަލާ ބަދަލު ކުރުން ހުއްޓާލުމުގެ އެއްބަސްވުމާ އެކު ހަނގުރާމަ މެދު ކެނޑިފައި ވީ ނަމަވެސް، މި މައްސަލަ އަށް ދާއިމީ ހައްލެއް ހޯދުމަށް ކުރެވޭ މަޝްވަރާ ތަކުން މިހާތަނަށް އެދެވޭ ނަތީޖާއެއް ނިކުމެފައި ނުވެ އެވެ. އެމެރިކާ އިން މިހާރު ދިރާސާ ކުރަމުންދާ ހުށަހެޅުމަކީ ހަނގުރާމައިގެ އެހެނިގހެން ކަންކަމާ ގުޅޭ ގޮތުން މަޝްވަރާ ކުރިއަށްދާއިރު، ދުނިޔޭގެ ތެލާއި ގޭސް އުފުލުމުގެ މުހިންމު ދައުރެއް އަދާ ކުރާ ހޮރްމޫޒް ކަނޑުއޮޅި ހުޅުވާލުމާ ގުޅޭ ހުށަހެޅުމެކެވެ. 

ޝަންހާއީ ކޯޕަރޭޝަން އޯގަނަައިޒޭޝަން (އެސްސީއޯ)ގެ ދިފާއީ ވަޒީރުންގެ ބައްދަލުވުމުގެ ކުރިން ވާހަކަ ދައްކަވަމުން ތަލާއީ ނިކް އިތުރަށް ވިދާޅުވީ، އީރާންގެ ދިފާއީ އަސްކަރީ ޤާބިލުކަން މިނިވަން ޤައުމުތަކާ ހިއްސާ ކުރުމަށް އީރާން އިން އޮތީ ތައްޔާރަށް ކަމަށެވެ. ޚާއްސަކޮށް އެސްސީއޯގެ މެމްބަރު ޤައުމު ތަކަށް އެ އެހީތެރިކަން ފޯރުކޮށްދިނުމަށް އީރާން އިން އިސްކަންދޭނެ ކަމަށް އޭނާ ފާހަގަ ކުރެއްވި އެވެ.