ޓްރަމްޕްގެ ފޮޓޯ ޖަހާފައިވާ ޚާއްސަ ޕާސްޕޯޓެއް އުފައްދަނީ

އެމެރިކާގެ ރައީސް ޑޮނަލްޑް ޓްރަމްޕްގެ ފޮޓޯ ޖަހާފައިވާ ޚާއްސަ ޕާސްޕޯޓެއް އުފައްދަން ނިންމައިފި އެވެ.

އެމެރިކާގެ ސްޓޭޓް ޑިޕާޓްމަންޓް އިން އަންގާރަ ދުވަހު ބުނީ، އެ ޤައުމުގެ ރައީސް ޓްރަމްޕްގެ ފޮޓޯ ޖަހާފައިވާ ޚާއްސަ ޕާސްޕޯޓެއް މަދު އަދަދަކަށް އުފައްދާނެ ކަމަށެވެ. މިއީ އެމެރިކާގެ ރައީސްގެ ނަމާއި ފޮޓޯ، ސަރުކާރުގެ ރަސްމީ ބައެއް ލިޔެ ކިޔުން ތަކުގައި ޖެހުމަށް ކުރަމުން އަންނަ ކަންކަމުގެ އެންމެ ފަހުގެ މިސާލެވެ. 

އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ޓޮމީ ޕިގޮޓްގެ ބަޔާނެއްގައި ބުނީ، މި ޕާސްޕޯޓުތައް ނެރުމަށް ހަމަޖެހިފައި ވަނީ އެމެރިކާގެ 250 ވަނަ މިނިވަން ދުވަހާ ދިމާކޮށެވެ. ޖުލައި މަހުގެ ތެރޭގައި އެ ޕާސްޕޯޓުތައް ނެރޭނެ ކަމަށް ބަޔާނުގައި ބުނެފައި ވީ ނަމަވެސް، އެ ޕާސްޕޯޓުގައި ޓްރަމްޕްގެ ފޮޓޯ ހިމެނޭ ކަމަށް ބުނެފައި ނުވެ އެވެ. 

ސްޓޭޓް ޑިޕާޓްމަންޓް އިން ދެއްކި ނަމޫނާ ތަކުން ފެންނަ ގޮތުގައި، ޕާސްޕޯޓުގެ އެތެރޭގައިވާ ޞަފްހާއެއްގައި ޓްރަމްޕްގެ ފޮޓޯ ޖަހާފައިވާއިރު، އެ ޞަފްހާގެ ކުރިމަތީގައި 1776 ވަނަ އަހަރު މިނިވަންކަން އިއުލާންކޮށް، ސޮއި ކުރި މަންޒަރު ފެންނަ ފޮޓޯ ވެސް ހިމަނާފައިވެ އެވެ. 

ޕިގޮޓް ބުނީ، މި ޕާސްޕޯޓު ތަކުގައި ޚާއްސަ ފަންނީ މަސައްކަތްތަކާއި، ރީތި ފޮޓޯތައް ހިމެނޭނެ ކަމަށާއި، އެއާ އެކު އެމެރިކާގެ ޕާސްޕޯޓު ދުނިޔޭގެ އެންމެ ރައްކާތެރި ލިޔުން ތަކުގެ ގޮތުގައި ބަހައްޓާ ސަލާމަތީ ފީޗާތައް ވެސް ހިމެނޭނެ ކަމަށެވެ.

އެމެރިކާގެ ޕާސްޕޯޓުގައި ޓްރަމްޕްގެ ފޮޓޯ ޖަހަން ނިންމާފައިވާއިރު، އެމެރިކާގެ ޓްރެޒަރީ ޑިޕާޓްމަންޓް އިން މީގެ ކުރިން ބުނެފައި ވަނީ އެމެރިކާގެ ފައިސާގައި ޓްރަމްޕް ސޮއި ކުރައްވާނެ ކަމަށެވެ. މިއީ މަގާމުގައި ހުންނެވި ރައީސް އަކު އެމެރިކާގެ ފައިސާގައި ސޮއި ކުރާނެ ފުރަތަމަ ފަަހަރެވެ.