ސިޔާސީ ނުތަނަަވަސް ކަމުގެ ތެރޭގައި އުޅުއްވަމުން ވެސް، އާސެނަލްގެ މެޗު ބައްލަވަން ބޮޑު ވަޒީރު ސްޓާމާ ވަޑައިގެންފި
ހޮނިހިރު ދުވަހުގެ ރޭ އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އެވަޓަންއާ ދެކޮޅަށް ކުޅުނު މެޗު ބައްލަވަން ބޮޑު ވަޒީރު ސްޓާމާ ވަނީ ވަޑައިގެންފައި. އަދި މެޗު ބެއްލެވުމުގެ ތެރެއިން ބައެއް ފަރާތްތަކާ ވާހަކަ ދައްކަވައި، ބޮޑު ވަޒީރު ވަނީ މެޗުގެ ފޯރީގައި ބައިވެރިވެ ވަޑައިގެންފައި.
މެޗުގައި އާސެނަލް އިން ލަނޑު ޖެހުމުން، އިނގިރޭސި ބޮޑު ވަޒީރު ސްޓާމާ އުފާ ފާޅު ކުރައްވަނީ | ގެޓީ އިމޭޖަސް
އިނގިރޭސިވިލާތުގެ ސިޔާސީ މަސްރަހުގެ އިތުރުން، މެދު އިރުމަތީގެ މަސްރަހު ވެސް ނުތަނަވަސްވެފައި އޮތް ވަގުތެއްގެ ތެރެއިން ވެސް، އިނގިރޭސި ޕްރިމިއާ ލީގުގައި އާސެނަލް ކުޅުނު މެޗު ބައްލަވަން އިނގިރޭސިވިލާތުގެ ބޮޑު ވަޒީރު ކިއާ ސްޓާމާ ވަޑައިގެންފި އެވެ.
ހޮނިހިރު ދުވަހުގެ ރޭ އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އެވަޓަންއާ ދެކޮޅަށް ކުޅުނު މެޗު ބައްލަވަން ބޮޑު ވަޒީރު ސްޓާމާ ވަނީ ވަޑައިގެންފަ އެވެ. އަދި މެޗު ބެއްލެވުމުގެ ތެރެއިން ބައެއް ފަރާތްތަކާ ވާހަކަ ދައްކަވައި، ބޮޑު ވަޒީރު ވަނީ މެޗުގެ ފޯރީގައި ބައިވެރިވެ ވަޑައިގެންފަ އެވެ.
ފަހު ވަގުތު ދެ ލަނޑު ޖަހައިގެން އާސެނަލް މޮޅުވި އެ މެޗުގައި، އާސެނަލް އަށް ލަނޑު ޖަހަން އެހެން ފުރުސަތު ތަކެއް ވެސް ލިބުނެވެ. އާސެނަލް އަށް ލަނޑު ޖަހަން ލިބުނު ފުރުސަތުތައް ބޭކާރުވި ވަގުތު ތަކުގައި ބޮޑު ވަޒީރުގެ މޫނު މަތިން މާޔޫސްކަން ވެސް ފެނިފައިވެ އެވެ. އަދި މެޗުގެ ފަހު ވަގުތުގައި އާސެނަލް އިން ލަނޑު ޖެހިއިރު، ބޮޑު ވަޒީރު ސްޓާމާ ވަނީ ވަރަށް ބޮޑަށް އުފާ ފާޅު ކުރައްވައިފަ އެވެ.
މެޗު ބައްލަވަން ބޮޑު ވަޒީރު ސްޓާމާ ވަޑައިގެންފައިވާއިރު، މިދިޔަ ދުވަސް ތަކަކީ ބޮޑު ވަޒީރަށް ވަރަށް ޕްރެޝަރު ބޮޑުވެގެން ދިޔަ ދުވަސް ވަރެކެވެ. ޚާއްޞަކޮށް އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގާތް ގުޅުމެއް އޮތް ޕީޓާ މެންޑެލްސަން ސަފީރު ކަމުގެ މަޤާމަށް އައްޔަން ކުރެއްވި މައްސަލައިގައި ބޮޑު ވަޒީރު ވަނީ ހޫނު ފެނަށް ވެސް ވެއްޓިފަ އެވެ. ލޭބާ ޕާޓީގެ އެތެރެއިންނާއި ބޭރުން ކުރިމަތިވި ޕްރެޝަރާ އެކު، ބޮޑު ވަޒީރުގެ އިސްތިއުފާގެ އަޑު ވެސް ގަދަވި އެވެ.
އޭގެ ފަހުން އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގައި ވެސް ބޮޑު ވަޒީރު ސްޓާމާ އަށް ވަނީ ޕްރެޝަރު ބޮޑުވެފަ އެވެ. ޚާއްޞަކޮށް އިނގިރޭސިވިލާތުގައި ހުރި އެމެރިކާގެ ބޭސްތައް ބޭނުން ކުރުމުގެ ހުއްދަ ނުދިނުމާއި، ހަނގުރާމައިގައި އެމެރިކާ އަށް ތާއީދު ނުކުރާތީ ވެސް ބޮޑު ވަޒީރަށް ނުރުހުން އަމާޒުވި އެވެ. އޭގެ ތެރޭގައި އިނގިރޭސިވިލާތުގެ ކުރީގެ ބޮޑު ވަޒީރު ޓޯނީ ބްލޭއާގެ ފަރާތުން ބޮޑު ވަޒީރު ސްޓާމާ އަށް ކުރިމަތިވި ފާޑު ކިޔުންތައް ވެސް ހިމެނެ އެެވެ.
އާސެނަލްގެ މެޗު ބައްލަވަން ބޮޑު ވަޒީރު ސްޓާމާ ވަޑައިގެންނެވިރު، އެމަނިކުފާނަކީ އާސެނަލްގެ ވަރަށް ބޮޑު ސަޕޯޓަރެކެވެ.
