އެވަޓަން ބަލިކޮށް، އާސެނަލް އަށް ނުވަ ޕޮއިންޓުގެ ލީޑެއް

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން އެއް ވަނައިގައި ނުވަ ޕޮއިންޓުގެ ލީޑެއް ނަގައިފި އެވެ. 

އާސެނަލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި އާސެނަލް އިން އެ ޓީމުގެ ދެ ލަނޑު ވެސް ޖެހީ މެޗުގެ ފަހު ވަގުތުގެ ތެރޭގަ އެވެ. 

މެޗުގައި އާސެނަލް އިން ލަނޑު ޖަހަން ގިނަ ފުރުސަތު ތަކެއްް ހޯދި އެވެ. އެގޮތުން އާސެނަލްގެ ބުކަޔޯ ސަކާ ފޮނުވާލި ހަމަލާ ގޯލާ އަމާޒު ނުވެ ދިޔައިރު، އެބްރެޗީ އެޒޭ އަށް ވެސް ވަނީ ލަނޑު ޖަހަން ފުރުސަތު ތަކެއް ލިބިފަ އެވެ. 

މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް އާސެނަލް އަށް ލަނޑު ޖަހައި ލީޑު ނަގައިދިނީ ވިކްޓަ ޔޮކަރޭޝް އެވެ. އެއީ ޕިއޭ ހިކަންޕީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ އިތުރު ވަގުތުގައި އުމުރުން 16 އަހަރުގެ މެކްސް ޑައުމަން ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑާ އެކު، އޭނާ ވެގެން ގޮސްފައި ވަނީ ޕްރިމިއާ ލީގުގައި ލަނޑު ޖެހި އެންމެ ހަގު ކުޅުންތެރިޔާ އަށެވެ.

މި މޮޅާ އެކު އާސެނަލް އެއް ވަނައިގައި އޮތީ މިހާތަނަށް އެ ޓީމު ކުޅެފައިވާ 31 މެޗުން 70 ޕޮއިންޓާ އެކު އެވެ.