ސީރިއަސްލީ ތަރުޖަމާނު؟ ވަރަށް ސެލެކްޓިވް ދެއްތޯ؟

ތަރުޖަމާން ކަމަށް ސަރުކާރުގެ އާ ތަރުޖަމާނު މުހައްމަދު ހުސެއިން ޝަރީފް (މުންދު) އައްޔަން ކުރައްވައިގެން ނޫސްވެރިންގެ ބައްދަލުވުމަކަށް ރިބަން ކަނޑައިފި އެވެ. ނޫސްވެރިކަން ބަލާލީމަ ލައްކަ ބައިވަރުކަންކަން ފާހަގަކުރެވުނެވެ. ހުރިހާ ވާހަކަ އެއް މިއަދަކު ނުދައްކާނަމެވެ. މިއަދު ދައްކަން ބޭނުމީ ސެލެކްޓިވް ކޮށް ތިމާމެންގެ ސަރުކާރު ވީމަ ވަކި ގޮތެއް، ނޫނީ ވަކި ބަޔަކު ވީމަ ވަކި މޭރުމަކުން ދެއްކި ވާހަކަތަކާއި އެ ނޫނަސް މުޅި ނޫސްވެރިންގެ ބައްދަލުވުމެއްގެ މަލަމައްޗެވެ.

ތަރުޖަމާނަކީ ސުވާލެއްވެސް ނެތް ގޮތުގައި ނިކަން ދޫފަރިތަ، ދޫހެލޭ ބޭފުޅެކެވެ. އަޅުގަނޑަށް ފާހަގަކުރެވުނު ކަންކަން ދަންނަވާލާނަމެވެ. ތަރުޖަމާން ދައްކަވަމުން ދިޔަ ވާހަކަ ބަޔަކު ޤަބޫލު ނުކޮށްފާނެތީ ވަރަށް ބޮޑަށް ޕްރެޝަރގައި ހުންނެވިހެން ބައެއް ފަހަރު ހީވެ އެވެ. ބައެއް ފަހަރު ނޫސްވެރިންނަށް ޗެލެންޖް ކުރައްވާހެން ހީވެއެވެ. ބައެއް ފަހަރު ރިވެތި ބަހުން ނޫސްވެރިންނަށް ހުޝާމަތު ކުރަނީހެން ހީވެ އެވެ. ކައިރި ކައިރީގައި "ކޮންޓްރެޑިކްޓް" ވާފަދަ ސްޓޭޓްމެންޓްތައް ދެއްވި އެވެ. 

ސުވާލެއްވެސް ނެތް ގޮތުގައި އަރުއްވަން ޖެހިވަޑައިގަތް ބޫޓަކީ ކުޑަ ބޫޓެއް ނޫނެވެ. އެހެނީ މި މަނިކުފާނަކީ ސަރުކާރުގެ 3 ވަނަ ތަރުޖަމާނެވެ. މިހާތަނަށް ސަރުކާރުން ފެނުނީ ފޮރުވުމާއި ވަންހަނާކުރުމެވެ. އެކަމަކު ދެ ނޫސްވެރިއަކު ވާހަކަ ދައްކާލާ އިރަށް އެކަމާއި ވެސް ތަރުޖަމާން ބަސް ވިދާޅުވާން ޖެހެ އެވެ. އަޅުގަނޑަށް އެ މަންޒަރު ސިފަވީ މަނިކުފާނު ކުލާސް ޓީޗަރަކަށް ހުންނަވާ ކުލާހުގެ ހަލަނި ދެކުދިން އަނގަ ތަޅާވަރުން ނުރުހުންވެ ބަސް ވިދާޅުވި ވިދާޅުވުމަކާއި އެއްފަދަ ކަމެއްގެ ގޮތުގަ އެވެ.

ކޮންމެއަކަސް ތިން ވަނަ ތަރުޖަމާނާއި އެކު ނޫސްވެރިންގެ ފުރަތަމަ އުއްމީދަކަށް ވީ ތަރުޖަމާނު ކަންކަން ނުފޮރުވާނެ ކަމަށް ވުމެވެ. އެ ވާހަކަ ނޫސްވެރިއަކު ބުނަމުން ދަނިކޮށް ވާހަކަ ކުރިއަށް ގެންދަން ދެން ވެސް ތަރުޖަމާނަށް ކެތްތެރި ވެވަޑައެއް ނުގެންނެވުނެވެ. ދައުލަތެއް ވެއްޖެއްޔާ ފޮރުވަން ވާނެ ކަންކަން ހުންނަން ވާނެ ކަމަށް އަދި އެކަން ޤަބޫލު ކުރަން ވާނެ ކަމަށް ވަރަށް ހަރު އަޑުން ވިދާޅުވި އެވެ. އަދި އެކަން ޤަބޫލުކުރަން ބާރު އެޅުމުގެ ގޮތުން ވަރަށް އަބުއި ރާގެއްގައި "ސީރިއަސްލީ އޭ" މިހެން ވެސް ވިދާޅުވި އެވެ.

ތަރުޖަމާން މަނިކުފާނަށް އެނގިވަޑައި ނުގަންނަވަނީ ނުވަތަ ހަނދުމަފުޅު ނެތީ ކަމަށް ވެދާނެ އެވެ. ދައުލަތެއްގައި ފޮރުވާނެ ކަންކަން ހުރުމަކީ އެއީ ރައީސް މުއިއްޒުގެ ވެރިކަމެއްގައި ނުފެންނާނެ ކަމެއް ކަމަށް ވިދާޅުވީ ރައީސް އަމިއްލަފުޅަށެވެ. ތަރުޖަމާނެވެ. މަނިކުފާނާއި، ރައީސް އާއި މިވެރިކަން ހިންގާ ޕީއެންސީގެ ސްޓޭންޑް ހަނދާން ނެތުނީތޯ އެވެ؟ 

ވެރިކަމަށް ވަޑައިގެންނެވީ އިންޑިއާ އާއި އެކު އެތައް އެއްބަސްވުމެއް ހުރި ކަމަށް ބުނެ ފެތުރި ދޮގު ވާހަކަތައް މަތީގަ އެވެ. އިންޑިއާ އާއި އެކު ވެފައިވާ 100 އެއްބަސްވުމެއްގެ ވާހަކަ ވެރިކަމަށް ވަޑައިގެން ވެސް ކުރެއްސެވި އެވެ. އެ ކަންކަން ހާމަ ނުކުރާ ކަމަށް ބުނެ ރައްޔިތުންގެ ހިތުގައި ބިރުވެރިކަން އުފެއްދި އިރު ތިޔަ ވިދާޅުވާ ގައުމީ ސަލާމަތާއި ދައުލަތުގެ ސިއްރު ކޮބާތޯ އެވެ. ސީރިއަސްލީ ތަރުޖަމާނު، ވަރަށް ސެލެކްޓިވް ނޫންތޯ އެވެ؟

ޗާގޯސް މައްސަލައިގައި ދިވެހި ސަރުކާރުން ފޮނުވި ސިޓީ އެއް އާއްމު ކުރުމަށް ގޮވާލި ގޮވާލުމަށް ވާގިވެރިވި އިރު ތިޔަ ވިދާޅުވި ދައުލަތުގެ ސިއްރާއި، ގައުމީ ސަލާމަތް ކޮބާތޯ އެވެ. އޭރު ތިޔަ ވިދާޅުވި ފޮރިން އިންވޭޝަންގެ ވާހަކަ ކޮބާތޯ އެވެ؟ ނިންމާލުމުގެ ކުރިން ސެލެކްޓިވް ވިސްނުމުގެ އެއް މިސާލު ދިނުމަށް ފަހު ނިންމާލާނާމެވެ.

"ކޮންޓްރޯލް ކޮމިޝަން" އޭ ބުނާތީ ސަރުކާރުން ނިކަން ނުރުހުންވެ އެވެ. އެހެން ނޫސްވެރިއަކު ވިދާޅުވެއްޖެއްޔާ އެ ނަމުގެ ދެލިގަނޑު ރަނގަޅު ކޮށްދެއްވަމު އެވެ. ރައީސް ބޭއްވި ނޫސްވެރިންގެ ބައްދަލުވުމުގައި އަދަދު ނޫހުގެ ސްކީލާން ޑޮކިއުމެންޓްރީ އަށް "ދޮން އަމާ ޑޮކިއުމެންޓްރީ" ވިދާޅުވުން އޯކޭ ދެއްތޯ އެވެ؟ ވަނަމުން ގޮވުމާއި ކުރުނަން ގޮވުން އާއްމުންނާއި ނޫސްވެރިންނަށް މަނާ ކުރަން ވާނީ ފުރަތަމަ އިސް ސަފުން ފެށިގެން އިސްލާހުވުމަށް ފަހުގައި ދެއްތޯ އެވެ. އެހެން ނޫނީ މިކަަހަލަ ކަންކަމުގައި ފެންނަނީ އެއް ޒާތެއްގެ ކަންކަމުގައި ތަންކޮޅެއް ސެލެކްޓިވް މޭރުމަކުން ބަސް ބުނާ މަންޒަރެވެ. ސީރިއަސްލީ އެވެ!