ހިތަދޫ އުތުރު ދާއިރާ ޕީއެންސީ ޕްރައިމަރީ ކާމިޔާބު ކުރި ކުރީގެ އެމްޕީ ސިނާނުގެ ޓިކެޓް އަތުލައިފި
ހިތަދޫ އުތުރު ދާއިރާގެ ޕީއެންސީ ޕްރައިމަރީ ކާމިޔާބު ކުރެއްވި މުހައްމަދު ސިނާން، އެހެން ބޭފުޅަކަށް ފުރުސަތު ދިނުމަށްޓަކައި އަމިއްލައަށް ނަން އަނބުރާ ގެންދަވައިފި. ސިނާން މިގޮތަށް ނިންމެވީ ދާއިރާގެ ރައްޔިތުންނާ މަޝްވަރާކުރުމަށްފަހު، މި ގޮނޑި ޕާޓީއަށް ކާމިޔާބުކުރުމަށް އެންމެ ފަހިވާނީ އައު ބޭފުޅަކު ނުކުމެގެން ކަމަށް ފެންނާތީ. މީގެ ކުރިން ބޭންކް ލޯނެއްގެ މައްސަލައިގައި ގޮނޑި ގެއްލުނު ސިނާންގެ މި ނިންމުން ޕީއެންސީގެ ލީޑަރޝިޕުން މިހާރު ވަނީ ބަލައިގެންފަ.
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ކުރީގެ މެންބަރު މުހައްމަދު ސިނާން. | ރައްޔިތުންގެ މަޖިލިސް
ހިތަދޫ އުތުރު ދާއިރާގެ ޕީއެންސީ ޕްރައިމަރީ ކާމިޔާބު ކުރެއްވި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ކުރީގެ މެންބަރު މުހައްމަދު ސިނާންގެ ޓިކެޓް ޕީއެންސީ އިން އަތުލައިފި އެވެ.
ބޭންކް ލޯނެއްގެ މައްސަލައިގައި ސިނާންގެ ގޮނޑި ގެއްލިފައިވާކަމަށް ސުޕްރީމް ކޯޓުން ކުރި ހުކުމަކާ ގުޅިގެން ސިނާންގެ ގޮނޑި ގެއްލިފައިވުމާއެކު މަޖިލީހުގެ އެ ދާއިރާގެ ގޮނޑި ވަނީ ހުސްވެފަ އެވެ. އެހެންކަމުން ޕީއެންސީ އިން ވެސް އެ ގޮނޑިއަށް ވާދަކުރުމަށް ޕްރައިމަރީއަށް ހުޅުވާލުމުން ސިނާން އަނެއްކާވެސް ކުރިމަތިލެއްވީއެވެ. އަދި އޭނާއާ ވާދަކުރެއްވީ މޫލެކެޑެ ދާއިރާގެ ކައުންސިލަރުގެ މަގާމުގައި ހުންނެވި އަހުމަދު ސައީދު (ސޮޑާ) އެވެ.
މި އިންތިޚާބުގެ ވޯޓުލުން ހޮނިހިރު ދުވަހު ކުރިއަށް ގެންގޮސްފައިވާއިރު ސިނާން ވަނީ ވޯޓުން ކުރި ހޯއްދަވާފަ އެވެ. އެއާއެކު ސިނާން ވަނީ އެ ޓިކެޓް ކަަށަވަރު ކުރައްވާފަ އެވެ.
މި ކަމާ ގުޅިގެން ޕީއެންސީގެ ލީޑަރޝިޕުން އޭނަ އަށް މަރުހަބާ ވެސް ކިޔާފައިވާއިރު ބުދަ ދުވަހު ސިނާން ވަނީ އެކްސް މެދުވެރިކޮށް އޭނާ އެ އިންތިޚާބުގައި ވާދަނުކުރައްވަން ނިންމަވާފައިވާ ކަމަށާ އެހެން މީހަކަށް ފުރުސަތު ދިނުމަށް ނިންމާފައިވާ ކަން ހާމަކުރައްވާފަ އެވެ.
ސިނާން ވިދާޅުވީ ފާއިތުވި 3 ދުވަހު ދާއިރާގެ ވަރަށް ގިނަ އަދަދެއްގެ ރައްޔިތުންނާއެކު ގާތުން ކުރެވުނު މަޝްވަރާތަކާއެކު މިފަހަރު މިގޮނޑި ޕާޓީއަށް ކާމިޔާބުވާން އެންމެ ފަހި ވާނީ އަޅުގަނޑު ފަހަތަށްޖެހި އެހެން އައު ބޭފުޅަކަށް ފުރުސަތު ދީގެން ކަމަށް ފެންނާތީ އެގޮތަށް ނިންމާފައިވާ ކަމަށެވެ.
މިގޮތައް ނިންމި ނަމަވެސް އެ ގޮނޑި ކާމިޔާބު ކުރުމަށްޓަކައި ޕާޓީން ނުކުންނަ ކެނޑިޑޭޓެއް އިންތިޚާބު ކޮށްދިނުމަށް އޭނާ ގެ ފުރިހަމަ ބައިވެރިވުމާއި ފުރިހަމަ ދައުރު އެންމެ ފުޅާކޮށް އޮންނާނެ ކަމުގެ ޔަގީންކަން އަރުވާ ކަމަށް ވެސް ސިނާން ވިިދާޅުވި އެވެ. އޭނާ ގެ މި ނިންމުން މިހާރު ޕާޓީގެ ރައީސް، ރައީސް ޑރ. މުހައްމަދު މުއިއްޒު އާ ލީޑަރޝިޕުން ބަލައިގަނެފައިވާ ކަމަށް ވެސް ސިނާން ވަނީ ވިދާޅުވެފަ އެވެ.
ގާނޫނު އަސާސީގައި ވާގޮތުން، ރައްޔިތުންގެ މަޖިލީހުގެ މެމްބަރަކު ހުކުމާއި އެއްގޮތަށް ސާބިތު ދަރަނި ދައްކަވަމުން ނުގެންދަވާ ނަމަ، އެ މެމްބަރެއްގެ ގޮނޑި ގެއްލޭނެ އެވެ. އެގޮތުން ޤާނޫނުއަސާސީގެ 73 ވަނަ މާއްދާގެ (ނ) ގެ 1 ވަނަ ނަންބަރުގައި ބަޔާންކޮށްފައިވާ ގޮތުގައި އަދާކުރާންޖެހޭ ސާބިތު ދަރަންޏެއް އޮތް މީހަކުނަމަ، ހުކުމާ އެއްގޮތަށް އެ ދަރަނި އަދާކުރަމުން ދާ މީހަކު ކަމުގައިވުމަކީ މަޖިލިސް މެމްބަރުންގެ ޝަރުތެކެވެ. ސިނާންގެ ގޮނޑި މީގެ ކުރިން ގެއްލުނީ އެ ޝަރުތު އުނިވުމާ ގުޅިގެންނެވެ. ނަމަވެސް ފަހުން އޭނާ ވަނީ އެ ލޯނު އަނބުރާ ދައްކަވާފަ އެވެ.
މި ދާއިރާއަށް އެމްޑީޕީ އިން ވެސް ވަނީ ކެމްޕޭނު ފަށާފަ އެވެ. އެގޮތުން އިދިކޮޅު އެމްޑީޕީގެ ޓިކެޓުގައި އިތުރު ބޭފުޅަކު ކުރިމަތިލައްވާފައި ނުވާތީ އެ ޓިކެޓު ކަށަވަރު ކުރެއްވީ އައްޑޫގެ ކުރީގެ މޭޔަރު އަބްދުﷲ ސޯދިގު (ސޯބެ) އެވެ.
