ކަރަންސީ ސްވޮޕްގެ ފެސިލިޓީގެ މުއްދަތު އިތުުރުކޮށް ނުދިނުމުން އަނބުރާ ދައްކާފައި އިތުރު 4.9 ބިލިއަން ރުފިޔާ ނަގައިފި
އިންޑިއާ ސަރުކާރުން ރާއްޖެއަށް ކަނޑައެޅި 30 ބިލިއަން ރުޕީސްގެ ކަރަންސީ ސްވޮޕް ފެސިލިޓީގެ ސަބަބުން، ރާއްޖޭގެ އިގްތިސާދީ ހަމަޖެހުން ދެމެހެއްޓުމަށް ސަރުކާރުން ކުރާ މަސައްކަތްތަކަށް ބޮޑު އެހީތެރިކަމެއް ލިބިގެންދާނެ ކަމަށް ސަރުކާރުން ބުނޭ. ސަރުކާރުން ފުރަތަމަ ނެގި 400 މިލިއަން ޑޮލަރުގެ ސްވޮޕް އަނބުރާ ދެއްކީ މުއްދަތު އިތުރުކޮށް ނުދިނުމުން.
މޯލްޑިވްސް މަނިޓަރީ އޮތޯރިޓީ (އެމްއެމްއޭ). | ސޯޝަލް މީޑިއާ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ރިޒާވް ބޭންކް އޮފް އިންޑިއާ (އާރްބީއައި) އާ ދެމެދު ވެފައިވާ "ފްރޭމްވޯކް އޮން ކަރަންސީ ސްވޮޕް އެރޭންޖްމަންޓް ފޯ ސާކް ކަންޓްރީޒް 2024-2027" ގެ ދަށުން، ޔޫއެސް ޑޮލަރު/ޔޫރޯ ސްވޮޕް ވިންޑޯ މެދުވެރިކޮށް 2024 ވަނަ އަހަރުގެ އޮކްޓޫބަރު މަހު ނެގި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ އަނބުރާ ދެއްކުމުގެ މުއްދަ އިންޑިއާ ސަރުކާރުން އިތުރުކޮށް ނުދިނުމުން އެބައި ދައްކާ ހަލާސް ކުރުމަށްފަހު 318 މިލިއަން ޑޮލަރުގެ އިތުރު ސްވޮޕެއް ނަގައިފި އެވެ.
2024 ވަނަ އަހަރުގެ އޮކްޓޫބަރު މަހު ނެގި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ އެމްއެމްއޭ އިން އަނބުރާ ދައްކައި ޚަލާސްކޮށްފައިވާ ކަމަށް ސަރުކާރުން ބުނީ ބުރާސްފަތި ދުވަހު އެވެ. ސަރުކާރުން ބުނީ އިންޑިއަން ރުޕީސް (އައިއެންއާރް) ސްވޮޕް ވިންޑޯގެ ތެރެއިން 30 ބިލިއަން ރުޕީ ނުވަތަ 4,919,559,066 (ހަތަރު ބިލިއަން ނުވަސަތޭކަ ނަވަރަ މިލިއަން ފަސްލައްކަ ފަންސާން ނުވަހާސް ފަސްދޮޅަސް ހަ ރުފިޔާ) ނެގުމުގެ ފުރުސަތު އިންޑިއާ ސަރުކާރުން ފަހިކޮށްދީފައިވާ ކަމަށެވެ.
ފޮރިން މިނިސްޓްރީ ބަޔާނުގައިވާ ގޮތުން ކުރީގެ ސްވޮޕަށް 400 މިލިއަން ޑޮލަރު ދެއްކުމުން އިތުރު ސްވޮޕެއް ދީފައިވަނީ އިންޑިއާ ރުޕީސް އިންނެވެ. މިއީ ޑޮލަރުން ބަލާނަމަ 318 މިލިއަން ޑޮލަރެވެ.
ސަރުކާރުން ބުނެފައިވަނީ މިއީ މެދުއިރުމަތީގެ މަސްރަހަށް އަންނަމުންދާ ބަދަލުތަކާއެކު ރާއްޖޭގެ އިގްތިސާދީ ހަމަޖެހުން ދެމެހެއްޓުމަށް ސަރުކާރުން ގެންގުޅޭ ސިޔާސަތުތަކަށް މި 30 ބިލިއަން ރޫޕީގެ ސްވޮޕް ފެސިލިޓީގެ ސަބަބުން ބޮޑު އެހީތެރިކަމެއް ލިބިގެންދާނެ އެވެ.
މީގެ އިތުރުން، 2019 ވަނަ އަހަރު ސްޓޭޓް ބޭންކް އޮފް އިންޑިއާ މެދުވެރިކޮށް ބަޖެޓަށް އެހީވުމުގެ ގޮތުން ހޯދާފައިވާ 150 މިލިއަން ޑޮލަރުގެ ޓްރެޜަރީ ބިލްގެ ތެރެއިން 50 މިލިއަން ޑޮލަރު ސަރުކާރުން މިހާތަނަށް ވަނީ ދައްކާފަ އެވެ.
މި 30 ބިލިއަން ރޫޕީގެ ސްވޮޕް ފެސިލިޓީ ހަމަޖެހިގެން ދިއުމަކީ ދިވެހިރާއްޖެ އާއި އިންޑިއާއާ ދެމެދު އޮތް ބަދަހި ގުޅުން ރަމްޒުކޮށްދޭ ކަމެއް ކަމަށް ސަރުކާރުން ބުނެފައިވެ އެވެ. ނަމަވެސް އިންޑިއާގެ ކަރަންސީ ސްވޮޕް ފެސިލިޓީގެ މުއްދަތު އިތުރުކޮށްދިނުމަށް ދިވެހިރާއްޖެއިން އެދިފައިވާ އެދުމަށް، އެ ނިޒާމު ހިންގުމަށް ކަނޑައަޅާފައިވާ އުސޫލުތަކާއި ގަވާއިދުތަކުގެ ސަބަބުން ހުރަސްތަކެއް ކުރިމަތިވެ އެކަމަށް އިންޑިއާ ސަރުކާރުން ލުޔެއް ދީފައި ނުވެ އެވެ.
ކަރަންސީ ސްވޮޕް ފެސިލިޓީގެ މުއްދަތު އަނެއްކާވެސް އިތުރުކޮށްދިނުމަށް ރާއްޖެއިން ދާދިފަހުން ވަނީ އިންޑިއާގައި އެދިފައެވެ. ނަމަވެސް، އިންޑިއާ ސަރުކާރުން މި ހުށަހެޅުން ދިރާސާކުރަމުންދާއިރު، އެ ފެސިލިޓީގެ މިހާރުގެ އުސޫލުތަކާއި ޝަރުތުތައް ހުރިގޮތުން އެކަމަށް ހުއްދަ ދިނުމަކީ ވަރަށް ދަތި ކަމެއް ކަމަށް މައުލޫމާތު ލިބެއެވެ. މީގެ ތެރޭގައި ފައިސާ ނެގުމުގެ ދެ މަރުހަލާގެ ދެމެދުގައި އޮންނަންޖެހޭ މުއްދަތާއި، އެންމެ ގިނަވެގެން މުއްދަތު އިތުރުކުރެވޭނެ އަދަދު ހަމަވެފައިވުން ހިމެނެ އެވެ.
