އޭރު ސަޅި، މިހާރު ހުތުރު، ތީތި ކަޑަ!

ސޯޝަލް މީޑިޔާގައި އެންމެ ފަތުއަޑުކިޔާފައި މިހާރު ފެތުރޭ އެއް ޕޯސްޓްތަކަކީ ދެ އަންހެނެއްގެ ދެމެދުގައި ބަދަލު ކުރެވޭ ރައްދުތަކެވެ. އެކަކީ ރައީސް ޔާމީނަށް ކުރިން މަރުދިން އަދި މިހާރު މުއިއްޒުގެ ވެރިކަމާއެކު މުއިއްޒަށް މާ ގަދައަށް ތާއީދު ކުރާ މީހެކެވެ. އަނެކަކީ އޭރުވެސް މިހާރުވެސް ޔާމީން ފަޅީގައި ހުރި މީހެކެވެ. ރައްދު ފެށުނީ މިހާރު ކުރާ މުޒާހަރާތަކާއި ގުޅިގެންނެވެ. ޕީއެންއެފްއިން ކުރާ މުޒާހަރާތަކުގެ ހުތުރު ވާހަކައާއި އަންހެނުން އެހެން އުޅުން ރީތިނޫންކަމަށް ބުނެ ކުރިން ޔާމީނަށް ތާއީދުކޮށް މިހާރު މުއިއްޒު ފަޅީގައި ހުރި މީހާ ފޭސްބޫކްގައި ކުރާ ޕޯސްޓެކެވެ. އެއަށް ޔާމީން ފަޅީގައި ހުރި މީހާ ދޭ ރައްދު ގުޅުވާލަނީ ޕީއެންސީއަށް ވަގަށް މީހުން ވެއްދުމަށް އެތައް ބައެއްގެ ނަމުގައި ފޯމުތަކުގައި އިނގިލީގި ނިޝާން ޖެހި މީހަކު، އެފަދަ ވާހަކައެއް ދައްކަން މާ ހުތުރުކަން ބޮޑު ވާހަކައެވެ.

ފެށިގެން މިއުޅެނީ އެއްކަމެއް ކުރިން ކުރި ބައެއްގެ މެދުގައި ފެށިގެން އުޅޭ ވަރުގަދަ ބަހުގެ ހަނގުރާމައެކެވެ. ކުރިން ރަނގަޅުވެ ރީތިވެގެން އުޅުނީވެސް އެމީހުން އެމީހުންނަށެވެ. ކަމުދިޔައީވެސް އެމީހުންނަށެވެ. އޭރުގެ ސަރުކާރާ ދެކޮޅަށް ކުރި މުޒާހަރާތަކުގެ ފޯރި ހިއްޕުވާލާ މީހުން އެއްކުރުމަށްދިން ހިތްވަރުތަކެވެ. އެކަމަށް ބޭނުން ކުރަމުންދިޔަ ބަސްތަކާއި މައިންދަރިން އެއްތާކު ތިބެގެން ބަލާލަން ނުކެރޭ ޒާތުގެ މަންޒަރުތަކާއި އަދުތަކެވެ. ހިތުން ސަޅި، ބައިމީހުން ގަޔާވި އެމީހުންގެ "ނަލަ" ބަހުރުވައެވެ. އެއްވާމެއްގައި ގޮވި ގޮވެލި ފައްޗާއި ދައްކަމުންދިޔަ ފޮޓޯތަކާއި ވީޑިއޯތައް ހަމަ އެހާމެ ފައްކަލެވެ. ވެރިންނަށާއި ވެރިމީހާއަށް މުޚާތަބު ކުރަމުންދިޔަ ނަންތަކާއި ދެއްކި ކާޓޫނުތައްވެސް އޯކޭއެވެ. ނެރުނު މާލިތަކާއި ވެރިންގެ މޫނު ހިމަނައިގެން އަޅައިގެންދިޔަ މާސްކްތައްވެސް އެމީހުންނަށް އެހާމެ ބަރާބަރެވެ.

މިކަމުގައި މިހާރުގެ ޕީއެންސީ އޭރުގެ ޕީޕީއެމްގެ ވަކި ފަޑިއެއް ނެތެވެ. އެކަމުގައި އުޅުނު އާދައިގެ މީހެއް ހަރުމީހެއް އިސްތިސްނާއެއް ނުވެއެވެ. ޚުދު މިހާރު ރައީސުލް ޖުމްހޫރިއްޔާއަކަށް ހުންނެވި ޑރ މުއިއްޒުވެސް ހުނިޖަހާލާފައި ނަގާ އެއް ފަރާތްކުރެވޭވަރަށްވުރެ ބޮޑަށް އެކަމުގައި ޝާމިލްވެގެން އުޅުއްވިއެވެ. ކޮންމެ ރެއަކު ކުރިއަށްދިޔަ މުޒާހަރާތައް ކޮވިޑްގެ އާލަމީ ވަބައިގެ ނުރައްކަލަކަށްވެސް ބަލާކަށް ބޭނުމެއް ނުވިއެވެ. އެއްވަނީ އެއްވާނެ ތާކަށެވެ ގޮވަނީ ގޮވާނެ އެއްޗެކެވެ. ދެއްކީ ދައްކާނެ އެއްޗެކެވެ. ނެރުނީ ނެރޭނެ މާއްޔެކެވެ. ބޭނުންކުރީ ހިތަށް އެރިއްޔާ އެރި މާސްކެކެވެ. ދައުރުކުރީ ހިތުހުރި ވީޑިއޯ އަކާއި ފޮޓޯއެކެވެ.

މުއިއްޒަށްވެސް އަދި ޕީއެންސީގެ އިސްސަފުގައި މިހާރުތިބި ކުރީގެ ޕީޕީއެމް އިސްވެރިންނަށް އެކަން ވަރަށް ސަޅިއެވެ. ރަށްރަށުގައިތިބި އާއްމުންނަށް އެވެރިންގެ މަޖާގަނޑު ނުލާހިކު ކަމުދިޔައެވެ. އާއްމުންނާ ސަރުކާރާ ޖެއްސުމަށް ބޭނުންކުރި އެއުކުޅުތައް ބަރާބަރެވެ. އެވާހަކަތައް ވައިގައި ހިފިއެވެ. ސަރުކާރާ އޭރުގެ ވެރިންނާމެދު ރައްޔިތުންގެ ހިތްތަކުގައި ހަމަ ރަނގަޅަށް ނަފްރަތު އުފެއްދުނެވެ. ކާމިޔާބުވިއެވެ. ބޮޑުކާމިޔާބެކެވެ. ވެރިކަން ބަދަލު ކުރެވުނީއެވެ.

ބަދަލުވީ މިހާރުއެވެ. ކިޔުނު އެއްޗެހީގެ ސަޅިކަމުގެ ވާހަކަ ދައްކާން ނުކެރުނީ މިހާރުއެވެ. ކުރެވުނު ކަންތައްތަކުގެ މަތިން މިހާރު ރޭކާލައިފިއެވެ. އަރާ ހަމަކުރީމައެވެ. ފޭހުނު އިލޮށިގަނޑު ލޮލަށް އަމާޒުވީމައެވެ. ލެވި ހަޅޭކާއި ދެއްކި މަންޒަރުތައް އެނބުރި އައިސް މީހާ ވާށާލީމައެވެ. ތިމާގެ ވެރިކަމުގައި ކުރެވޭ ކަންކަމުގެ ހަޑި ފޮރުވާން އުނދަގޫވާން ފެށީމައެވެ. ބައިމީހުން ބައިމީހުންނަށް ތަޅާފޮޅުންތައް އިތުރުވާން ފެށީމައެވެ. ހާމަނުވާން ޖެހޭ ވާހަކަތައް ބުޅާގޯނިން ބޭރުވީމައެވެ. އެންމެ ހައިބަތުބޮޑު އިމާރާތުގެ ހަތަުރުފާރު އެތެރޭގައި ހިނގާ ސިއްރު ކަންކަން އެހެން މީހުނާ ހަމައަށް ތިލަވެ ފަޅާއަރަން ފެށީމައެވެ.

މިހާރަކު ކަމަކު ނުދެއެވެ. އާއްމު މިންގަނޑުތަކާ ޚިލާފް ވަނީއެވެ. ރައީސް މުއިއްޒުގެ ބަހުންނަމަ ދީނާ ދުރު މީހުން ކުރާ ޒާތުގެ ކަންކަމަށް ވަނިއެވެ. މީހުންގެ އަބުރާއި ޒާތަށް އެރެނީއެވެ. ޅަދަރިންނަށް އެނގެން ނުވާވަރަށް ހުތުރު ވާހަކަތައް ދެއްކެނީއެވެ. އެކަމަކު އެއީ މިހާރުއެވެ. ކުރިން އޯކޭވެ ސަޅިވި ކަންކަން އޭގެ އަނެއްކޮޅަށް ޖެހީމައެވެ.

ކޮންމެއަކަސް މިހާރު ކުރިއަށްދާ މުޒާހަރާތަކާއި ސަރުކާރަށް ކިޔާ ފާޑުތައް އެއްގޮތަކަށްވެސް ސަރުކާރުގެ ބޮޑުންނަށާއި ޚުދު ރައީސް މުއިއްޒަކަށް ކަމަކު ނުދިޔައެވެ. އެއްވުންވެސް ކަމަކު ނުދެއެވެ. އޭރުގެ ސަޅިކަން މިހާރު ހުތުރެވެ. ކޮށްގެން ވާނެ ކަމެއް ނޫންކަމަށާއި އެކަމުން އެހެން މީހުންނަށް ގެއްލުންވެ އަދި ހަމަނުޖެހުންތަކަށް ބާރު ލިބިދޭކަމަށް ބުނެ މުށުތެރޭގައި އޮތް ހިއުމަންރައިތްސް ކޮމިޝަނުންވެސް ބޮޑު ބަޔާނަކުން އެންގީއެވެ. ކުރިން ސަޅިކަން ހުތުރުވީއެވެ. އެކަމަކު މިހާރުގެ ބަހުންނަމަ ތީތި ކަޑައެވެ.