ނިމުނު އިންތިޚާބުގައި ޕީއެސްއެމް ފެނުނީ ޕީއެންސީގެ މީޑިއާ ވިންގް އެއްގެ ގޮތުގައި: މީކާއިލް
ދައުލަތުގެ މީޑިއާ، ޕީއެސްއެމް އިން ވަކި ފަރާތަކަށް ޖެހި، އިދިކޮޅު ޕާޓީތަކަށް ހަމަހަމަ ފުރުސަތު ނުދޭ ކަމަށް ބުނެ ރައްޔިތުންގެ މަޖިލީހަށް ގަރާރެއް ހުށަހަޅައި ބަހުސްކޮށްފި. މި ގަރާރުގައި ޕީއެސްއެމް އިން ގާނޫނާ ޚިލާފަށް ސަރުކާރު ޕްރޮމޯޓްކޮށް، އިންތިޚާބުތަކާ ގުޅޭ ސައްހަ ނޫން މައުލޫމާތު ފަތުރާފައިވާ ކަމުގެ ތުހުމަތު ވަނީ ކޮށްފަ. އެހެންކަމުން، ސިޔާސީ ނުފޫޒުން އެއްކިބާވެ، ހުރިހާ ޕާޓީތަކަކަށް ހަމަހަމަ ފުރުސަތު ދިނުމަށް މި ގަރާރުގައި ވަނީ ގޮވާލާފަ.
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް | މަޖިލިސް
އޭޕްރީލް މަހުގެ 4 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި، އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބުގެ އިތުރުން ރެފަރެންޑަމް ވޯޓުގައި ދައުލަތުގެ މީޑިއާ، ޕަބްލިކް ސަރވިސް މީޑިއާ ފެނިގެން ދިޔައީ ސަރުކާރު ހިންގާ ޕީއެންސީގެ މީޑިއާ ވިންގް އެއްގެ ގޮތުގައި ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ޕީއެސްއެމް އިން ސިޔާސީ ޕާޓީތަކުގެ މެދުގައި ތަފާތު ކޮށް، ރައްޔިތުންނަށް މައުލޫމާތު ފޯރުކޮށްދިނުމުގެ ފުރުސަތު، ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ދީފައި ނުވާތީ މަޖިލީހަށް ހުށަހަޅާފައިވާ ގަރާރުގެ ބަހުސް ވަނީ ކުރިއަށް ގެންގޮސްފަ އެވެ.
އެ ގަރާރަށް ބަހުސް ކުރައްވަމުން މީކާއިލް ވިދާޅުވީ މި ސަރުކާރު އައި ފަހުން ޕީއެސްއެމްގެ އެމްޑީން ގެ ގޮތުގައި ތިއްބެވި ބޭފުޅުން ތިން ފަހަރު ބަދަލު ވެއްޖެ ކަމަށެވެ. އެހެން ނަމަވެސް ބޮޑުންނަށް ގެންނަ ބަދަލަކުން ޕީއެސްއެމް އިން ކުރަމުންދާ ކަމަކަށް ބަދަލު ނާންނަ ކަމަށާ ޕީއެސްއެމް އަދި ވެސް ހަމަ އޮތީ ޕީއެސްއެމް ގެ ގޮތުގައި ކަމަށް މެންބަރު ވިދާޅުވި އެވެ.
އެގޮތުން މުޅި އިންތިޚާބުގައި ފެނިގެން ދިޔައީ ޕީއެސްއެމް އަކީ ޕީއެންސީގެ މީޑިއާ ވިންގް އެއްގެ ގޮތުގައި ބޭނުންކުރެވިގެން ދިޔަ މަންޒަރު ކަމަށް ވެސް މީކާއިލް ވިދާޅުވި އެވެ.
ވަކި އަތަކަށް ބުރަވެ، މުޅި އިންތިޚާބު އެކީ އެ ނިންމާލީ އާނއެކޭ ކެމްޕެއިންގަ. އެކަމު ނިމުނު އިރު ބުނީ ނޫނެކޭ. ޕީއެސްއެމް އަށް ވެސް ނޫނެކޭ. އަދި ވަކި ފަރާތަކަށް ޖެހިގެން ސިޔާސީ މަންފާ ހާސިލުކުރުމަށް، މާލީ މަންފާ ހާސިލު ކުރުމަށް ދިވެހިރާއްޖޭގެ މާލިއްޔަތުން ޚަރަދު ކޮށްގެން ޕީއެސްއެމްގެ މީޑިއާ އިން އެކި މީހުންނަށް ޕްރޮމޯޝަން ބެހުމާ، އެކި މީހުންނަށް ޕްރޮމޯޝަން ހިންގަދިނުމަށް ދިވެހި ރައްޔިތުން ބުނީ ނޫނެކޭ.ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް
އެ ގަރާރުގައި ބުނީ ޕީއެސްއެމްގެ މަގްސަދަކީ ގާނޫނުގައި ކަނޑައަޅާފައިވާ އާންމު އުސޫލުތަކާ ސިޔާސަތުތަކުގެ ތެރޭގައި ނުފޫޒުން އެއްކިބާވެފައިވާ އަދި އެޑިޓޯރިއަލް މިނިވަންކަން ލިބިފައިވާ ދިވެހިރާއްޖޭގެ އެންމެހައި ސަރަހައްދުތަކަށް ޚިދުމަތް ފޯރުކޮށްދޭ ގައުމީ މީޑިއާއެއްގެ ގޮތުގައި ދެމިއޮތުން ކަމަށެވެ.
އެގޮތުން ޕަބްލިކް ސަރވިސް މީޑިއާގެ ގާނޫނުގެ 5 ވަނަ މާއްދާގެ (ކ) ގައި ދައުލަތުގެ މީޑިއާގެ ސިޔާސަތުތަކުގެ ގޮތުގައި ރައްޔިތުންގެ މެދުގައި އެއްވެސް ތަފާތުކުރުމެއް ނެތި ޕަބްލިކް ސަރވިސް މީޑިއާގެ ޚިދުމަތް ފޯރުކޮށްދެމުން ދިއުމަށް މަސައްކަތް ކުރުމާ ޕަބްލިކް ސަރވިސް މީޑިއާ އިން ވަކިވަކި ފަރުދުންނާ އެކި ޖަމާއަތްތަކަށް ފުރުސަތު ދިނުމުގައި ވެސް ހަމަހަމަކަން ގާއިމް ކުރުމަށް މަސައްކަތްކުރުން ކަން ކަނޑައަޅައި ބަޔާން ކޮށްފައިވާ ކަމަށް ގަރާރުގައި ވެ އެވެ.
ގަރާރުގައި ބުނީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބާއްވާގޮތަށް ހަމަޖެއްސުމަށް ރައްޔިތުން ރުހޭތޯ ބެލުމަށް ރައްޔިތުންގެ ޚިޔާލު ހޯދުމުގެ އާންމު ވޯޓު ނަގައި ނިމުނު އިރުވެސް އެކަމާ ބެހޭ ފުރިހަމަ މައުލޫމާތު އެކަށީގެންވާ މިންވަރަށް ރައްޔިތުންނަށް ފޯރުކޮށްދިނުމުގެ ފުރުސަތު ދިވެހި ރައްޔިތުންގެ ޑިމޮކްރެޓިކް ޕާޓީ އަށް ލިބިފައި ނުވާ ކަމަށެވެ.
އޭގެ އިތުރުން 4 އޭޕްރީލް ގައި ބޭއްވުނު ލޯކަން ކައުންސިލް އިންތިޚާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބުގެ އެންމެ ގިނަ ވޯޓު ކާމިޔާބު ކޮށްފައިވަނީ ވެރިކަންކުރާ ޕާޓީން ކަމަށް ބުނެ ދައުލަތުގެ ބްރޯޑްކާސްޓަރު ޕަބްލިކް ސަރވިސް މީޑިއާ ގައި ޚަބަރު ޝާއިއުކޮށް، ކަނޑައެޅިގެން ސައްހަ ނޫން މައުލޫމާތު އާންމު ރައްޔިތުންނަށް ފޯރުކޮށްދީފައިވާ ކަން ވެސް ގަރާރުގައި ވަނީ ފާހަގަ ކޮށްފަ އެވެ.
