ސިނާންގެ ޓިކެޓް އަތުލާފައި ދިނީ ސޮޑާ އަށް
ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރުމަށް ޕީއެންސީގެ ޕްރައިމަރީ ކާމިޔާބުކުރެއްވި މުޙައްމަދު ސިނާން އިންތިޚާބުގައި ވާދަނުކުރަން ނިންމުމާ ގުޅިގެން، އެ ޕާޓީގެ ޓިކެޓް އަޙްމަދު ސަޢީދަށް ދިނުމަށް ވަނީ ނިންމާފައި. އިލެކްޝަންސް ކޮމިޝަނުން މިހާރު ވަނީ މި އިންތިޚާބަށް ކުރިމަތިލުމުގެ މުއްދަތު އިތުރުކޮށް، އިންތިޚާބު ބާއްވާ ތާރީޚަކީ 2026 ޖޫން 06 ކަމަށް ކަނޑައަޅާފައި.
ގޮނޑި ގެއްލުނު ހިތަދޫ އުތުރު ދާއިރާގެ ކުރީގެ މެންބަރު މުހައްމަދު ސިނާން (ކ) އަދި ޕްރައިމަރީގެ ޓިކެޓް ދޭން ނިންމި ސައީދު (ވ). | ސޯޝަލް މީޑިއާ
ރައްޔިތުންގެ މަޖިލީހުގެ އައްޑޫ ސިޓީ ހިތަދޫ އުތުރު ދާއިރާގެ ބައި-އިލެކްޝަންގައި ވާދަކުރުމަށް ޕީއެންސީގެ ޓިކެޓު ކާމިޔާބު ކުރެއްވި ކުރީގެ މެންބަރު މުޙައްމަދު ސިނާންގެ އަތުން ޓިކެޓް އަތުލުމަށް ފަހު، އެ ދާއިރާގެ މޫލެކެޑެ ދާއިރާގެ ކައުންސިލަރު އަޙްމަދު ސަޢީދު (ސޮޑާ) އަށް ޓިކެޓު ދޭން އެ ޕާޓީން ނިންމައިފި އެވެ.
ހިތަދޫ އުތުރު ދާއިރާގެ ގޮނޑި ހުސްވެފައި ވަނީ، 2024 ވަނަ އަހަރު ބޭއްވި އިންތިޚާބުގައި އެ ދާއިރާއަށް އިންތިޚާބުވި މުޙައްމަދު ސިނާންގެ މައްޗަށް ބޭންކް ލޯނެއްގެ ސާބިތު ދަރަންޏެއް އޮތްކަން ސާބިތުވެ، އެ ދަރަނި ޙުކުމާ އެއްގޮތަށް ދައްކަމުން ނުދާކަން ކޯޓަށް ސާބިތުވުމުންނެވެ. ސުޕްރީމް ކޯޓަށް ހުށަހެޅުނު މި މައްސަލައިގައި އެ ކޯޓުން ކުރި ޙުކުމާއެކު ސިނާންގެ މެންބަރުކަމުގެ ގޮނޑި ވަނީ ގެއްލިފަ އެވެ.
މި ގޮނޑިއަށް މެންބަރަކު އިންތިޚާބު ކުރުމަށް ބާއްވާ ބައި-އިލެކްޝަންގައި ޕީއެންސީގެ ފަރާތުން ވާދަކުރާނެ ކެންޑިޑޭޓަކު ހޮވުމަށް މިދިޔަ ހަފުތާ ބަންދުގައި ވަނީ ޕްރައިމަރީއެއް ބާއްވާފަ އެވެ. އެ ޕްރައިމަރީގައި ސިނާންއާ ވާދަކުރެއްވީ އަޙްމަދު ސަޢީދެވެ. މި އިންތިޚާބުގައި ސިނާން ވަނީ 226 ވޯޓު ހޯއްދަވައިގެން ޓިކެޓް ކަށަވަރު ކުރައްވާފަ އެވެ. ސަޢީދަށް ލިބިވަޑައިގަތީ 187 ވޯޓެވެ.
ޕްރައިމަރީ ކާމިޔާބު ކުރެއްވުމުން ޕީއެންސީގެ ލީޑަރޝިޕުން ސިނާނަށް މަރުހަބާ ކިޔާފައިވަނިކޮށް، ބުދަ ދުވަހު އޭނާ ވަނީ އެކްސް މެދުވެރިކޮށް ޓިކެޓް ދޫކޮށްލާކަން ހާމަކުރައްވާފަ އެވެ. ސިނާން ވިދާޅުވީ މި އިންތިޚާބުގައި ވާދަނުކުރެއްވުމަށާއި، އެހެން ބޭފުޅަކަށް ފުރުސަތު ދިނުމަށް ނިންމަވާފައިވާ ކަމަށެވެ. އެއާއެކު ޕީއެންސީން ވަނީ ޕްރައިމަރީގައި ދެވަނައަށް އެންމެ ގިނަ ވޯޓު ހޯއްދެވި އަޙްމަދު ސަޢީދަށް ޓިކެޓު ދިނުމަށް ނިންމާފަ އެވެ.
މި އިންތިޚާބުގެ ކަންކަން ކުރިއަށްދާ ގޮތަށް ބަލާއިރު، އިލެކްޝަންސް ކޮމިޝަނުން ވަނީ އިންތިޚާބަށް ކުރިމަތިލުމުގެ މުއްދަތު އިތުރުކޮށްފަ އެވެ. އެންމެ ފުރަތަމަ އޭޕްރީލް 14 އިން 29 އަށް ހުޅުވާލި ފުރުސަތު، މިހާރު ވަނީ 2026 މޭ 02 ވާ ހޮނިހިރު ދުވަހުގެ މެންދުރު ފަހު 15:00 އާ ހަމައަށް އިތުރުކޮށްފައެވެ.
ހިތަދޫ އުތުރު ދާއިރާގެ ބައި-އިލެކްޝަން ބޭއްވުމަށް އިލެކްޝަންސް ކޮމިޝަނުން ތާވަލުކޮށްފައިވަނީ 2026 ޖޫން 06 ވާ ހޮނިހިރު ދުވަހުއެވެ.
