އީރާންގެ އެއާލައިންތަކާ އެކު ވިޔަފާރި ކުރާ ކުންފުނި ތަކަށް އެމެރިކާ އިން ދަތި ކުރާނެ ކަމުގެ އިންޒާރު ދީފި

އީރާންގެ އެއާލައިންތަކާ އެކު ވިޔަފާރި ކުރާ ކުންފުނި ތަކަށް އެމެރިކާގެ ދަތި ކުރުންތަކާ ކުރިމަތިލާން ޖެހިދާނެ ކަމަށް އެމެެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވެއްޖެ އެވެ.

ހޯމަ ދުވަހު ބެސެންޓް އެކަން އިއުލާާން ކުރެއްވީ އެކްސްގައި ކުރެއްވި ޕޯސްޓެއްގަ އެވެ. އެ ޕޯސްޓުގައި އޭނާ ވަނީ ވޯލް ސްޓްރީޓް ޖާނަލްގައި ބަޔާން ކޮށްފައިވާ ވާހަކަތައް ވެސް ހިއްސާ ކޮށްފަ އެވެ. 

ދަތި ކުރުމުގެ ލިސްޓުގައި ހިމެނޭ އީރާންގެ އެއާލައިންތަކާ އެކު ވިޔަފާރި ކުރުމަކީ އެމެރިކާގެ ދަތި ކުރުންތަކާ ކުރިމަތިލާން ޖެހިދާނެ ކަމެއް ކަމަށް ބެސެންޓް ވިދާޅުވި އެވެ. އަދި ސަރުކާރު ތަކުން އެ ސަރަަހައްދުގައި އޮންނަ ކުންފުނި ތަކުން އެ އެއާކްރާފްޓް ތަކަށް ޚިދުމަތް ނުދިނުމަށް ބޭނުންވާ ހުރިހާ ފިޔަވަޅު ތަކެއް އަޅަން ޖެހޭ ކަމަށް ވެސް އޭނާ ވިދާޅުވި އެވެ. 

އެގޮތުން ޖެޓް ފިއުލް އާއި، ކޭޓަރިން އާއި ލޭންޑިން ފީ އަދި މެއިންޓެނަންސް ހިމެނޭ ކަމަށް ވެސް ބެސެންޓް ވަނީ ވިދާޅުވެފަ އެވެ. 

އިޤްތިޞާދީ ހަނގުރާމަ ކަމަށް ނަން ދީފައިވާ ހަރަކާތުގެ ދަށުން އީރާން އަށް އެންމެ ބޮޑު ދަތި ކުރުން ތަކެއް އަޅުވާނެ ކަމަށާއި، އީރާންގެ ފަރާތްތަކާ ވިޔަފާރު ކުރާ ނުވަތަ އެހީތެރިވާ ތިން ވަނަ ފަރާތްތަކާ ދެކޮޅަށް ފިޔަވަޅު އެޅުމަށް އެއްވެސް ދެބަސްވުމެއް ނޯންނާނެ ކަމަށް ވެސް ބެސެންޓް ވިދާޅުވި އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމައިގެ ސަބަބުން، އީރާންގެ ވައިގެ ސަރަހައްދު ބަންދު ކުރި ނަމަވެސް، މަޑު މަޑުން އަންނަނީ ދަތުރުތައް ފަށަމުންނެވެ. އީރާންއާ ދެކޮޅަށް އެމެރިކާ އިން އަޅާފައިވާ ދަތި ކުރުމުގެ ފިޔަވަޅު ތަކުގެ ސަބަބުން އެ ޤައުމުގެ އިޤްތިޞާދަށް ބޮޑެތި އަސަރު ތަކެއް ކޮށްފައިވެ އެވެ. ޚާއްސަކޮށް ތެލާއި ގޭސް ވިއްކުމުން ލިބޭ އާމްދަނީ އަށް ބޮޑެތި ހުރަސް ތަކެއް ކުރިމަތިވެފައިވެ އެވެ.