އައިޝާ ޑޮކިއުންމެންޓަރީ އަކީ ދޮގެއް، އެ ވާހަކަތައް ދެއްކި ހުރިހާ ފަރާތްތަކާ ދެކޮޅަށް ދައުވާ ކޮށްދިނުމަށް އެދެން: ރައީސް މުއިއްޒު
'އަދަދު' ނޫހުން އާންމުކުރި 'އައިޝާ' ޑޮކިއުމެންޓްރީގައި ހިމެނޭ ތުހުމަތުތަކަކީ ކަނޑައެޅިގެން ދޮގު ވާހަކަތަކެއް ކަމަށް ރައީސް މުއިއްޒު ވިދާޅުވެއްޖެ. ނޫސްވެރިންގެ ބައްދަލުވުމެއްގައި އެމަނިކުފާނު ވަނީ އެ ވީޑިއޯގައި ހިމެނޭ ދޮގު މައުލޫމާތުތަކާ ގުޅިގެން، އެކަމުގައި ބައިވެރިވި ހުރިހާ ފަރާތްތަކާ ދެކޮޅަށް ދައުވާކޮށްދިނުމަށް ކަމާބެހޭ އިދާރާތަކުގައި އެދިވަޑައިގެންފައި.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ރައީސް ޑރ.މުހައްމަދު މުއިއްޒު ވާހަކަފުޅު ދައްކަވަނީ. | ރައީސް އޮފީސް
އަދަދު ނޫހުން ގެނެސްދިން އައިޝާ ޑޮކިއުންމެންޓަރީ އަކީ ކަނޑައެޅިގެން ދޮގެއް ކަމަށާއި، އެ ވާހަކަތައް ދެއްކި ހުރިހާ ފަރާތްތަކާ ދެކޮޅަށް ދައުވާ ކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެންފި އެވެ.
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އަދަދު ނޫހުގެ ނޫސްވެރިޔާ ވަނީ އައިޝާ ޑޮކިއުންމެންޓަރީއާ ގުޅޭގޮތުން ސުވާލު ކޮށްފަ އެވެ.
އެގޮތުން އެއޮފީހުގައި މިދިޔަ އަހަރު ކުރީ ކޮޅު މަސައްކަތް ކުރި އަންހެން މުވައްޒަފަކު މަނިކުފާނަށް ވަރަށް ސީރިއަސް ތުހުމަތުތަކެއް ކޮށްފައިވާ ކަމާއި، ބައެއް ހެކި ތަކާއެކު ޑޮކިއުޕްމަންޓްރީއެއްގެ ސިފައިގައި ގެނެސްވެސް ދީފައިވާކަން ނޫސްވެރިޔާ ފާހަގަކުރި އެވެ. އެ ތުހުމަތުތަކުގެ ތެރޭގައި ހިމެނޭ މަނިކުފާނު ކައިވެނިން ބޭރުން އެ އަންހެން މީހާއާއެކު ގުޅުމެއް ބޭއްވި ކަމާއި، މަނިކުފާނަށް ޚާއްސަ އޮފީހުގައި ހުންނަ ކެބިންގައި އެކަހެރިކޮށް އެތައް ފަހަރެއްގެ މަތީން ބައްދަލުކުރި ކަމަށް ތުހުމަތު ކުރެވޭ ކަމަށެވެ. އޭގެ އިތުރުން މަނިކުފާނުގެ ޕީއޭ ހައްސާން މެދުވެރިކޮށް ތަފާތު އެކި މެސެޖްތައް އަންހެން މީހާއަށް ފޯރުކުރި ކަމަށާއި، ފައިސާ ދިން ކަމަށް އަންހެން މީހާ ތުހުމަތުކޮށްފައިވާކަން ފާހަގަކުރި އެވެ. މިތުހުމަތުތަކުގެ ތެރޭގައި އޭނާ އިއުތިރާފެއް ވެސް ހިމެނޭ ކަމާއި، މަނިކުފާނުގެ ރަސްމީ ހައިސިއްޔުތުން އަދި އަމިއްލަ ހައިސިއްޔަތުން ބޭރުން އެ އަންހެން މީހާ ތުހުމަތު ކުރާ އެއްވެސް ކަމެއް ނުހިނގާ ކަމުގެ ޔަގީންކަން މިވަގުތު ދެވިދާނެތޯ ސުވާލު ކުރި އެވެ.
މި ސުވާލަށް ރައީސް މުއިއްޒު ވިދާޅުވީ އެއީ ކަނޑައެޅިގެން ދޮގެއް ކަމަށެވެ. އަދި ދޮގު ވާހަކަތައް ފެތުރި އެންމެނާ ދެކޮޅަށް ދައުވާ ކޮށްދިނުމަށް ކަމާބެހޭ ހުރިހާ އިދާރާތަކުގެ ކިބައިން އެދޭ ކަމަށް އެމަނިކުފާނު ވިދާޅުވި އެވެ.
އަދަދު ނޫހުން ތިވިދާޅުވީ ތިބޭފުޅުން ހެއްދެވި ވީޑިއޯއެއްގެ ވާހަކަ. ކަނޑައެޅިގެން ދޮގު ވާހަކަ ހިމެނޭ ގޮތަށް ތިބޭފުޅުން ވީޑިއޯ އެއް ހެއްދެވި ކަމަށް ތި އިއުތިރާފްވެވަޑައިގެންނެވީ. މިފަދަ ދޮގު ވާހަކަ ދެއްކި ހުރިހާ ފަރާތްތަކާ ދެކޮޅަށް އަޅުގަނޑު ދައުވާ ކުރުން އެދެން ކަމާބެހޭ ހުރިހާ ފަރާތްތަކުގެ ކިބައިން. ދެން ތިބޭ ފުޅުންނަކީ ދޮން އަމާގެ ވީޑީއޯ ވެސް ހެއްދެވި ބޭފުޅުން ތެދެއްތޯ. އެކަހަލަ ވީޑިއޯ އެއް ހެއްދެވި ދާނެ އަނެއްކާ ވެސް ތިބޭފުޅުންނަށް. އެހެންވީމަ އަޅުގަނޑު ހައިރާނެއް ނުވޭ ތިހެން ވިދާޅުވީމަކާއެއް.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް އޮފީހުގެ ތެރޭގައި ހިނގި ކަމަށް ބުނާ މިހާދިސާގެ މައްޗަށް އަދަދު ނޫހުން ވަނީ އައިޝާ ނަމުގައި ޑޮކިއުމެންޓްރީއެއް 28 މާޗް 2026 ގައި އާއްމު ކޮށްފަ އެވެ. އެއާއެކު ވަރަށް ބޮޑަށް ޑޮކިއުމެންޓްރީ އާއްމުވެގެން ދިޔަ އެވެ. އަދި މިހާރު ޑޮކިއުމެންޓްރީގެ މައްސަލަ ކޮންޓްރޯލް ކޮމިޝަނުން ވެސް ދަނީ ބަލަމުންނެވެ.
