ޕުޓިންއާ ބައްދަލު ކުރެއްވުމަށް، އީރާންގެ ފޮރިން މިނިސްޓަރު އަރާގްޗީ ރަޝިޔާ އަށް

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ ނިންމުމަށް ކުރަމުން އަންނަ މަސައްކަތުގެ ތެރެއިން، އީރާންގެ ފޮރިން މިނިސްޓަރު އައްބާސް އަރާގްޗީ ރަޝިޔާ އަށް ވަޑައިގެންފި އެވެ. 

އިރްނާ އިން ރިޕޯޓު ކޮށްފައިވާ ގޮތުގައި އަރާގްޗީ މިހާރު ވަނީ ރަޝިޔާގެ ސެއިންޓް ޕީޓަސްބާގް އަށް ވަޑައިގެންފަ އެވެ. މި ދަތުރުފުޅުގައި އަރާގްޗީ ދަތުރު ކުރެއްވި ފްލައިޓަށް ދީފައިވާ ކްލޯސައިން އަކީ، މިނާބް 168 އެވެ. މިއީ މިދިޔަ ފެބްރުވަރީ މަހުގެ 28 ވަނަ ދުވަހު އީރާންގެ މިނާބް ސިޓީގެ އެލިމެންޓްރީ ސްކޫލް އަކަށް އެމެރިކާ އާއި އިޒްރޭލް އިން ދިން ހަމަލާގައި ޝަހީދުވީ ކުޑަ ކުދިންގެ ހަނދާނުގައި ދީފައިވާ ނަމެކެވެ.

ރަޝިޔާ އަށް އަރާގްޗީ ކުރައްވާ ދަތުރުފުޅުގައި، އެ ޤައުމުގެ ރައީސް ވްލަޑިމިއަރ ޕުޓިންއާ ބައްދަލު ކުރައްވާނެ އެވެ. މިއީ ދެ ޤައުމުގައި އޮންނަ ގުޅުން އިތުރަށް ބަދަހި ކުރުމަށާއި، ސަރަހައްދީ އަދި ބައިނަލްއަޤުވާމީ މުހިންމު މަައްސަލަތަކާ ގުޅޭ ގޮތުން މަޝްވަރާ ކުރެއްވުމަށް ކުރައްވާ ދަތުރުފުޅެކެވެ. ޚާއްސަކޮށް ރަޝިޔާގެ ރައީސް ޕުޓިންއާ އެކު ބާއްވާ ބައްދަލުވުމުގައި ދެ ޤައުމުގެ އިސްތިރާތީޖީ ގުޅުމާ ގުޅޭ ގޮތުން ފުޅާ ދާއިރާއެއްގައި މަޝްވަރާ ކުރައްވާނެ ކަަމަށް ބެލެވެ އެވެ. 

އީރާން އިން ބުނި ގޮތުގައި މި ދަތުރުފުޅަކީ، ދެ ޤައުމުގެ ދެ މެދުގައި އޮންނަ ސިޔާސީ އަދި އިޤްތިޞާދީ ގުޅުންތައް އައު ހަރުފަތަކަށް ގެންދިޔުމަށް ކުރެވޭ މަސައްކަތުގެ ބައެކެވެ. އަދި މިއީ ދާދި ފަހުން ދުނިޔޭގެ މަސްރަހަށް އަންނަމުންދާ ބަދަލުތަކާ ގުޅިގެން ދެ ޤައުމުގެ މެދުގައި އޮންނަ އިތުބާރު ބަދަހި ކުރުމަށް ލިބޭ މުހިންމު ފުރުސަތެއްގެ ގޮތުގައި ވެސް އެ އެޖެންސީ އިން ވަނީ ސިފަ ކޮށްފަ އެވެ. 

މި ދަތުރުފުޅުގައި ބޭނުން ކުރި ކްލޯސައިންގެ ސަބަބުން، ގިނަ ބައެއްގެ ސަމާލުކަން ވަނީ މި ދަތުރުފުޅަށް ހުއްޓިފަ އެވެ. މިއީ ހަމަލާ ތަކުގައި ޝަހީދުވީ ކުޑަ ކުދިންގެ ހައްގުގައި ބައިނަލްއަޤުވާމީ މައިދާނުގައި އަޑު އުފުލުމުގެ ގޮތުން އީރާން އިން ބޭނުން ކުރި ރަމްޒީ އުސޫލެއް ކަމަށް ބެލެވެ އެވެ.