އީރާނުގެ އެންމެ ފަހުގެ ހުށަހެޅުމާ މެދު ޓްރަމްޕް ހިތްހަމައެއް ނުޖެހޭ

އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމަ ހުއްޓާލުމަށް، އީރާން އިން އެންމެ ފަހުން ހުށަހަޅާފައިވާ ހުށަހެޅުމާ މެދު އެމެރިކާގެ ރައީސް ޑޮނަލްޑް ޓްރަމްޕް ހިތްހަމަ ޖެހި ވަޑައި ނުގަންނަވާ ކަމަށް އެމެރިކާގެ އޮފިޝަލަކު ބުނެފި އެވެ. 

އީރާން އިން ހުށަހެޅި އެންމެ ފަހުގެ ހުށަހެޅުމުގައި ބުނެފައި ވަނީ، ހަނގުރާމަ ނިމެންދެން އަދި ގަލްފުން އުޅަނދު ފަހަރު ދަތުރު ކުރުމާ ބެހޭ ކަންކަން ހައްލު ވަންދެން އީރާންގެ ނިއުކްލިއާ ޕްރޮގްރާމްއާ ބެހޭ މަޝްވަރާތައް ފަސް ކުރަން ޖެހޭނެ ކަމަށެވެ. ނަމަވެސް، މިއީ އެމެރިކާ އަށް ޤަބޫލު ކުރެވޭނެ ކަމެއް ނޫނެވެ. އެމެރިކާ އިން އެންމެ ފުރަތަމަ ދުވަހުން ފެށިގެން ވެސް ބުނަމުން އަންނަނީ، އީރާންގެ ނިއުކްލިއާ މައްސަލަ ހައްލު ކުރަން ޖެހޭނެ ކަމަށެވެ. 

އެމެރިކާގެ އޮފިޝަލުން ބުނެފައިވާ ގޮތުގައި ހޯމަ ދުވަހު އެމެެރިކާގެ ރައީސް ޓްރަމްޕް ވަނީ، އޭނާގެ މަޝްވަރާދޭ ބޭފުޅުންނާ ބައްދަލު ކުރައްވައިފަ އެވެ. އަދި އެ ބައްދަލުވުމުގައި، އީރާންގެ ހުށަހެޅުމާ މެދު ހިތްހަމަ ނުޖެހޭ ކަމަށް ޓްރަމްޕް ހާމަ ކުރައްވާފައިވާ ކަމަށް ވެސް އެ އޮފިޝަލު ވަނީ މައުލޫމާތު ދީފަ އެވެ. 

އެކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސްގެ ތަރުޖަމާނަކު ވިދާޅުވެފައި ވަނީ އެމެރިކާ އިން މީޑިއާގެ ޒަރިއްޔާ އިން މަޝްވަރާ ނުކުރާނެ ކަމަށެވެ. އަދި އެމެރިކާގެ ރަތް ރޮނގުތައް ކަށަވަރުކޮށް ހާމަ ކޮށްފައިވާނެ ކަމަށް ވެސް އޭނާ ވިދާޅުވެފައިވެ އެވެ. އެމެރިކާ އާއި އިޒްރޭލް އެކުވެގެން އީރާންއާ ދެކޮޅަށް ހަނގުރާމަ ފަށާފައި ވަނީ މިދިޔަ ފެބްރުވަރީ މަހުގެ 28 ވަނަ ދުވަހު އެވެ. 

2025 ވަނަ އަހަރު އީރާން އާއި އެމެރިކާ ހިމެނޭ ގޮތުން އެހެން ޤައުމުތަކާ ދެމެދު ވެފައިވާ އެއްބަސްވުމަކުން އީރާންގެ ނިއުކްލިއާ ޕްރޮގްރާމް އަށް ބޮޑެތި ހުރަސް ތަކެއް އެޅިގެން ދިޔަ އެވެ. އީރާން އިން އަބަދު ވެސް ބުނަމުން އަންނަނީ އެ ޤައުމުގެ ނިއުކްލިއާ ޕްރޮގްރާމް އަކީ ސުލްޙަވެރި އަދި އެ ޤައުމުގެ ރައްޔިތުންގެ ބޭނުން ތަކަށް ހިންގާ ޕްރޮގްރާމެއް ކަމަށެވެ. ނަމަވެސް، ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި ވަނީ އެ އެއްބަސްވުމުން ވަކިވެފަ އެވެ. 

ސުލްޙަ ޤާއިމު ކުރުމުގެ މަސައްކަތްތައް އަލުން ފެށުމުގެ އުންމީދުތައް ކުޑަވެގެން ދިޔައީ، އެމެރިކާގެ ރައީސް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް އާއި ޓްރަމްޕްގެ ދަރިކަލުން ޖެރާޑް ކުޝްނާ ޕާާކިސްތާން އަށް ކުރައްވަން އޮތް ދަތުރުފުޅު ޓްރަމްޕް ކެންސަލް ކުރެއްވުމާ އެކު އެވެ. އީރާންގެ ފޮރިން މިނިސްޓަރު އައްބާސް އަރާގްޗީ ވަނީ، މިދިޔަ ދުވަސް ތަކުގެ ތެރޭގައި ދެ ފަހަރެއްގެ މަތިން ޕާކިސްތާނަށް ވަޑައިގެންފަ އެވެ. އަދި އޭގެ ފަހުން ހޯމަ ދުވަހު ވަނީ ރަޝިޔާ އަށް ވެސް ވަޑައިގެންފަ އެވެ.