ހިތަދޫ އުތުރު ދާއިރާގެ ބައި-އިލެކްޝަނަށް ކުރިމަތިލާ މުއްދަތު އިތުރުކޮށްފި

ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ގޮނޑި ހުސްވުމާ ގުޅިގެން ބާއްވާ ބައި-އިލެކްޝަނަށް ކުރިމަތިލުމަށް ދީފައިވާ މުއްދަތު، އިލެކްޝަންސް ކޮމިޝަނުން އިތުރުކޮށްފި އެވެ.

އެ ކޮމިޝަނުން ހޯމަ ދުވަހު ކުރި އިޢުލާނެއްގައި ބުނެފައި ވަނީ، އިންތިޚާބަށް ކުރިމަތިލުމުގެ ފުރުޞަތު މިހާރު 2026 މޭ 02 ވާ ހޮނިހިރު ދުވަހުގެ މެންދުރު ފަހު 15:00 އާ ހަމައަށް އިތުރުކޮށްފައިވާ ކަމަށެވެ.

މި އިންތިޚާބަށް ކުރިމަތިލުމުގެ ފުރުޞަތު އެންމެ ފުރަތަމަ ހުޅުވާލީ 2026 އެޕްރީލް 14 އިން ފެށިގެން އެޕްރީލް 29 ގެ ނިޔަލަށެވެ. ނަމަވެސް، ކޮމިޝަނުން މިހާރު ވަނީ އެ މުއްދަތު އިތުރުކުރުމަށް ނިންމާފައެވެ. ހިތަދޫ އުތުރު ދާއިރާގެ ބައި-އިލެކްޝަން ބޭއްވުމަށް ހަމަޖެހިފައި ވަނީ 2026 ޖޫން 06 ވާ ހޮނިހިރު ދުވަހު އެވެ.

މި ދާއިރާގެ ގޮނޑި ހުސްވެފައި ވަނީ، އެ ދާއިރާގެ މެންބަރުގެ ގޮތުގައި ހުންނެވި މުޙައްމަދު ސިނާންގެ މައްޗަށް ސާބިތު ދަރައްޏެއް އޮވެ، އެ ފައިސާ ނުދައްކާ އޮތުމުގެ ސަބަބުން އޭނާގެ މެންބަރުކަމުގެ ޝަރުޠު ގެއްލިފައިވާ ކަމަށް ސުޕްރީމް ކޯޓުން ޙުކުމް ކުރުމާ ގުޅިގެންނެވެ.

އިލެކްޝަންސް ކޮމިޝަނުން މަޢުލޫމާތު ދޭ ގޮތުގައި، އިންތިޚާބަށް ކުރިމަތިލާ ފަރާތްތަކުން ފޯމު ހުށަހަޅަންޖެހޭނީ ހިލާލީމަގުގައި ހުންނަ ޕޯޓް ކޮމްޕްލެކްސްގެ 5 ވަނަ ފަންގިފިލާގައި ހުންނަ އެ ކޮމިޝަނުގެ މައި އިދާރާއަށެވެ. އީ-މެއިލް މެދުވެރިކޮށް ފޯމު ހުށަހަޅާނަމަ، ހުރިހާ ފައިލެއްގެ ޖުމްލަ ސައިޒު 10 އެމް.ބީ އަށްވުރެ ބޮޑުވެގެން ނުވާނެ ކަމަށް ކޮމިޝަނުން ބުނެ އެވެ. އިންތިޚާބަށް ކުރިމަތިލާ ކޮންމެ ކެންޑިޑޭޓަކު 5،000 ރުފިޔާގެ އިދާރީ ފީއެއް ދައްކަންޖެހޭއިރު، ރަސްމީ އިންތިޚާބީ އޭޖެންޓަކުވެސް ކަނޑައަޅަންޖެހެ އެވެ.

މަޖިލިސް މެންބަރުކަމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުޠުތަކުގެ ތެރޭގައި، ދިވެހި ރައްޔިތަކަށްވުމާއި، ބޭރު ޤައުމެއްގެ ރައްޔިތަކަށް ނުވުމާއި، މުސްލިމަކު ކަމުގައިވުމާއި، ސުންނަތް ޖަމާޢަތުގެ މީހަކު ކަމުގައިވުން ހިމެނެ އެވެ. މީގެ އިތުރުން އުމުރުން 18 އަހަރު ފުރިފައިވުމާއި ބުއްދި ހަމައަށް ހުރި މީހަކަށް ވާންޖެހެ އެވެ. އަމިއްލަ ގޮތުން ކުރިމަތިލާ ފަރާތްތަކުން އެ ދާއިރާއެއްގެ ވޯޓުލުމުގެ ޙައްޤު ލިބިފައިވާ މަދުވެގެން 50 މީހުންގެ ތާއީދު އޮތްކަމުގެ ސޮއި ހުށަހަޅަންޖެހޭނެ އެވެ.

ޖޫން މަހުގެ 6 ވަނަ ދުވަހު ބާއްވާ މި އިންތިޚާބުގެ ވޯޓުލުން ކުރިއަށްދާނީ އެދުވަހުގެ ހެނދުނު 8:00 އިން ހަވީރު 4:00 އަށެވެ. ވޯޓު ގުނަން ފަށާނީ ވޯޓުލުން ނިމޭތާ 30 މިނެޓު ފަހުންނެވެ. އިލެކްޝަންސް ކޮމިޝަނުން ބުނި ގޮތުގައި މި އިންތިޚާބުގެ ރަސްމީ ނަތީޖާ އިޢުލާން ކުރާނީ 2026 ޖޫން 08 ވާ ހޯމަ ދުވަހު އެވެ. އިންތިޚާބަށް ކުރިމަތިލުމަށް ބޭނުންވާ ފޯމާއި އެހެނިހެން ލިޔުންތައް ކޮމިޝަނުގެ ވެބްސައިޓުން މިހާރު ޑައުންލޯޑު ކުރެވޭނެ އެވެ.

މިހާތަނަށް މި ދާއިރާއަށް ކުރިމަތިލާފައި ވަނީ ސަރުކާރު ހިންގާ ޕާޓީ، ޕީއެންސީގެ ފަރާތުން ދަރަނީގެ މައްސަލައިގައި ގޮނޑި ގެއްލުނު މުހައްމަދު ސިނާނެވެ. އަދި އިިދިކޮޅު މައި ޕާޓީ އެމްޑީޕީގެ ފަރާތުން ވާދަ ކުރައްވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސާދިގު (ސޯބެ) އެވެ.