ދިރާސާ ކުރާ ލިޔުންތައް ބެލުމުގެ އިންތިޒާމު ޕްރޮސެކިއުޓަރ ޖެނެރަލް އޮފީހުގައި ޝަރުތުތަކާއެކު ހަމަޖައްސައިފި
ހެކި ރައްކާތެރިކުރުމުގެ އަމުރުގެ ދަށުން ދިފާއަށް ބަލައި ދިރާސާކުރެވޭނެ ލިޔުންތައް ޕްރޮސެކިއުޓަރ ޖެނެރަލްގެ އޮފީހުގައި ބެލޭނެ އިންތިޒާމު އެ އޮފީހުން މިހާރު ވަނީ ހަމަޖައްސައިފައި. ސުޕްރީމް ކޯޓުގެ ނިންމުމަކާ ގުޅިގެން އެކުލަވައިލި މި އުސޫލުގެ ދަށުން، ކޯޓުން އަމުރުކޮށްފި ނަމަ ޚާއްސަ ފޯމެއް މެދުވެރިކޮށް އެ ފުރުސަތަށް އެދި ހުށަހެޅޭނެ. މި އިންތިޒާމު ކުރިއަށްގެންދާނީ ކޯޓު އަމުރުގައި ބަޔާންކޮށްފައިވާ މިންވަރަށް، އެކަމަށް ޚާއްސަކުރެވިފައިވާ ތަނެއްގައި.
ޕްރޮސެކިއުޓަރ ޖެނެރަލް އޮފީސް | ރާއްޖެއެމްވީ
ހެކި ރައްކާތެރިކުރުމުގެ އަމުރުގެ ދަށުން ޝަރުތުތަކާއެކު ދިރާސާ ކުރާ ލިޔުންތައް ބެލުމުގެ އިންތިޒާމު ޕްރޮސެކިއުޓަރ ޖެނެރަލްގެ އޮފީހުގައި ހަމަޖައްސާފައިވާ ކަމަށް އެ އޮފީހުން ބުނެފި އެވެ.
ޕްރޮސެކިއުޓަރ ޖެނެރަލް އޮފީހުން ބުނީ މި އިންތިޒާމު ހަމަޖެއްސީ ފަސޭހަ އަދި ލުއި އިންތިޒާމެއްގެ ދަށުން ހެކި ރައްކާތެރިކުރުމުގެ އަމުރުގެ ދަށުން މައްސަލަ ބައްލަވާ ފަނޑިޔާރު ކަނޑައަޅުއްވާ ޝަރުތުތަކާއެކު ބަލައި ދިރާސާކުރުމުގެ ފުރުސަތު ދިފާޢަށް ލިބިދޭ ލިޔުންތައް ބެލޭނެ ގޮތަށް ކަމަށެވެ. މި އިންތިޒާމު، މިމަހުގެ ފަންސަވީހުން ފެށިގެން ހަމަޖައްސައިފައިވާ ކަމަށް އެ އޮފީހުން ބުންޏެވެ.
ދިވެހިރާއްޖޭގެ ސުޕްރީމް ކޯޓުގެ ނަންބަރު ދެހާސް ސައްބީސް ސީ އޭ ނުވަ ވަނަ ޤަޟިއްޔާގެ ނިންމުމުގައި ހެކި ރައްކާތެރިކުރުމުގެ އަމުރުގެ ދަށުން ރައްކާތެރިކުރެވޭ ލިޔުންތައް ކޯޓުގައި ބަލައި ދިރާސާކުރުމުގެ އިންތިޒާމު ހަމަޖެއްސުމަށް ކޯޓުތަކަށް ދަތިވާނަމަ ކަނޑައެޅޭ ހަރުދަނާ އުސޫލުތަކާއި ޝަރުތުތަކާއެކު ޕްރޮސެކިއުޓަރ ޖެނެރަލްގެ އޮފީސް ނުވަތަ ކޯޓަށް ޤަބޫލުކުރެވޭ ދައުލަތުގެ އިދާރާއެއްގައި އެ އިންތިޒާމު ހަމަޖެއްސުމަށް އެންގުމުގެ އިޚްތިޔާރު މައްސަލަ ބައްލަވާ ފަނޑިޔާރަށް ލިބިގެންވާކަމަށް ބަޔާންކޮށްފައިވެ އެވެ.
އެހެންކަމުން އެ ޤަޟިއްޔާގައި ބަޔާންކޮށްފައިވާ މަޤްސަދު ޙާސިލުވާނޭހެން މި އިންތިޒާމު ހަމަޖައްސާފައިވާ ކަމަށް ޕްރޮސެކިއުޓަރ ޖެނެރަލް އޮފީހުން ބުންޏެވެ.
މިކަން ކުރިއަށްގެންދާނީ ހެކި ރައްކާތެރިކުރުމުގެ އަމުރުގެ ދަށުން ޝަރުތުތަކާއެކު ޕްރޮސެކިއުޓަރ ޖެނެރަލްގެ އޮފީހުގައި ހެކިތައް ބަލައި ދިރާސާކުރުމުގެ ފުރުސަތު ދިނުމުގައި ޢަމަލުކުރާނެ ގޮތުގެ އުސޫލުގައި ބަޔާންކޮށްފައިވާ ގޮތުގެ މަތިންނެވެ.
މި އުސޫލުގެ ދަށުން ދަޢުވާލިބޭ ފަރާތަށް ލިޔުންތައް ދެއްކުމުގެ އިންތިޒާމު އެ އޮފީހުން ހަމަޖެއްސުމަށް ކޯޓަކުން އަމުރުކޮށްފިނަމަ އެ އިންތިޒާމު ހަމަޖެއްސުމަށް އެދި ހުށަހަޅާނީ މިކަމަށް ޚާއްސަކޮށްފައިވާ ފޯމުންނެވެ. އެ ފޯމަކީ ހެކި ރައްކާތެރިކުރުމުގެ އަމުރުގެ ދަށުން ޕްރޮސެކިއުޓަރ ޖެނެރަލްގެ އޮފީހުގައި ހެކި ބަލައި ދިރާސާކުރުމަށް އެދި ހުށަހަޅާ ފޯމެވެ.
އެ އުސޫލާއި ފޯމު ޕްރޮސެކިއުޓަރ ޖެނެރަލް އޮފީހުގެ ވެބްސައިޓުން ލިބޭނެ ކަމަށް އެ އޮފީހުން ބުންޏެވެ.
މި އުސޫލުގެ ދަށުން ދިރާސާކުރުމުގެ ފުރުސަތު ދެވޭނީ ކޯޓު އަމުރުގައި ބަޔާންކޮށްފައިވާ ހެކިތައް އެކަމަށް ޚާއްސަކުރެވިފައިވާ ތަނެއްގައި އެ އަމުރުގައި ބަޔާންކޮށްފައިވާ މިންވަރަށް ކަމަށް ޕްރޮސެކިއުޓަރ ޖެނެރަލް އޮފީހުން ބުނެފައިވެ އެވެ.
