ފަނޑިޔާރުންތަކެއްގެ މައްޗަށް ޖިނާއީ ތުހުމަތެއްކޮށް ތަހުގީގެއް ހިންގާކަމަށް ބުނިތާ އަހަރަކަށްވުރެ ގިނަ ދުވަސް، އޭސީސީ ބަހަބަރު!
ސުޕްރީމް ކޯޓުގެ ތިން ފަނޑިޔާރެއްގެ ޖިނާއީ މައްސަލައެއް އޭސީސީން ބަލަން ފެށުމާއެކު އެ ބޭފުޅުން ސަސްޕެންޑު ކުރި ނަމަވެސް، އަހަރަކަށްވުރެ ގިނަ ދުވަސްވީއިރުވެސް އެއްވެސް ސުވާލެއް ކޮށްފައިނުވޭ. މި މައްސަލައިގެ ތަހުގީގު ކުރިއަށް ނުގޮސް އޮއްވައި އޭގެ ތެރެއިން ދެ ފަނޑިޔާރަކު މަގާމުން ވަކިކޮށްފައިވަނީ ޖަވާބުދާރީވުމުގެ ފުރުސަތުވެސް ނުދީ. ތަހުގީގުގެ އަދާހަމަ ހޯދުމަށް ފަނޑިޔާރުން ކުރެއްވި މަސައްކަތަށްވެސް އޭސީސީން އެދެވޭ އިޖާބައެއް ދީފައެއް ނުވޭ.
ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރު އާއި އަލީ މަހާޒް އަލީ ޒާހިރު
ސުޕްރީމް ކޯޓުގެ ފަނޑިޔާރުންތަކަކާ ގުޅޭގޮތުން ޖިނާއީ މައްސަލަތަކެއް ބަލަމުންދާކަމަށް އެންޓި ކޮރަޕްޝަން ކޮމިޝަން (އޭސީސީން) ބުނިތާ އަހަރަކަށްވުރެ ގިނަ ދުވަސްވެފައިވާއިރު، އެންމެ ކުޑަމިނުން އެ މައްސަލައިގެ ތުހުމަތުގައި އޭސީސީން މިހާތަނަށް އެ މައްސަލަ ރައްދުވާ ފަރާތްތަކާ ސުވާލެއްވެސް ކޮށްލާފައިނުވާކަމަށް މައުލޫމާތު ލިބިއްޖެއެވެ.
ސުޕްރީމް ކޯޓުގެ އޭރުގެ ފަނޑިޔާރުން ކަމަށްވާ ހުސްނުއްސުއޫދު އާއި މަހާޒް އަލީ ޒާހިރު އާއި އަޒްމިރާލްދާ ޒާހިރުގެ މައްސަލަ އޭސީސީ އިން ތަހުގީގު ކުރަން ފެށީ ފެބްރުއަރީ 2025 ގައެވެ.
އޭސީސީން އެކަން އޭރު ޖޭއެސްސީއަށް އެންގުމާއެކު ވަގުތުން ފަނޑިޔާރުން ސަސްޕެންޑު ކުރިއެވެ. އެއީ މެމްބަރުން ޕާޓީ ބަދަލުކުރުމުން ގޮނޑި ގެއްލޭކަމަށް ބަޔާންކުރާ އިސްލާޙު ބާތިލުކޮށްދޭން އެދި ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުން ފެށެން ކުޑަ ވަގުތުކޮޅަކަށްވެފައި ވަނިކޮށެވެ.
އޭސީސީ އިން އޭރު މި މައްސަލައާ ގުޅޭގޮތުން ހަމައެކަނި ބުނެފައި ވަނީ ތަހުގީގު ކުރަމުންދަނީ ފަނޑިޔާރުންގެ ޖިނާއީ މައްސަލައެއް ކަމަށެވެ. ނަމަވެސް އޭގެ ތަފުސީލެއް ނުދެ އެވެ. ފަނޑިޔާރުންނަށް ކުރެވޭ ތުހުމަތުވެސް އޭސީސީން ހާމަކުރީ ފަނޑިޔާރުން ލިއުމުން ހުށަހަޅައިގެން ކޮމިޝަނުގައި އެދުމުންނެވެ.
މައުލޫމާތު ލިބޭ ގޮތުގައި އޭސީސީން މިހާތަނަށްވެސް މި މައްސަލައިގެ ތަހުގީގަށް އެންމެ ކުޑަމިނުން އެބޭފުޅުންނާ ސުވާލެއްވެސް ކޮށްލާފައި ނުވެއެވެ. އަދި އެބޭފުޅުން އަމިއްލައަށް މައްސަލައިގެ ތަހުގީގުގެ އަޕްޑޭޓެއް ހޯއްދެވުމަށް މަސައްކަތް ކުރިނަމަވެސް މިއަދާ ހަމައަށްވެސް އެކަމުގެ އަދާހަމަ މައުލޫމާތެއް އޭސީސީގެ ފަރާތުން ފޯރުކޮށްދީފައެއް ނުވެއެވެ.
ފަނޑިޔާރުންގެ މައްޗަށް ކުރެވޭ ތުހުމަތުތައް ތަހުގީގު ނުކުރެވި އެގޮތުގައި އޮއްވައި އޭގެ ތެރެއިން ދެ ފަނޑިޔާރަކު ވަނީ މަޤާމުންވެސް ވަކިކޮށްފައެވެ. އެގޮތުން މި މައްސަލައިގައި ފަނޑިޔާރު އަޒްމިރަލްދާ އާއި މަހާޒު ވަކިކުރިއިރު މަޖިލީހުން އެބޭފުޅުންނަށް ޖަވާބުދާރީވުމުގެ ފުރުސަތު ވެސް ދެއްވާފައިނުވެއެވެ.
