ގޮނޑި ގެއްލޭ އިސްލާޙު ބާތިލު ކުރުމަށް އެދި ހުށަހެޅި މައްސަލައިގެ ޙުކުމް ކުރުން ބުދަ ދުވަހު!
މަޖިލިސް މެންބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލްކުރުމަށް ހުށަހެޅި މައްސަލައިގެ ހުކުމް އިއްވުން ބުދަ ދުވަހުގެ ހެނދުނަށް ސުޕްރީމް ކޯޓުން ތާވަލުކޮށްފި. ހަތް ފަނޑިޔާރުންގެ ފުލް ބެންޗުން ބައްލަވާ މި މައްސަލައިގެ އަޑުއެހުންތައް ނިންމާލާފައި ވަނީ މައްސަލަ ބަލާ ބެންޗަށް ބަދަލުތަކެއް އައުމަށްފަހު އަލުން އަޑުއެހުންތައް ބޭއްވުމަށް ފަހު. މީގެ ކުރިން މި މައްސަލައިގައި ވަގުތީ އަމުރަކަށް އެދުނު ނަމަވެސް، ކޯޓުގެ ބެންޗަށް ދިމާވި ކަންތައްތަކާ ގުޅިގެން މައްސަލަ އޮތީ ގިނަ ދުވަސްތަކަކަށް މެދުކެނޑިފައި.
ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ޙާލަތްތައް ބަޔާންކޮށް ގާނޫނުއަސާސީއަށް ގެނައި އިސްލާހު ބާތިލްކުރުމަށް ސުޕްރީމް ކޯޓަށް ހުށައެޅި މައްސަލަ | ރާއްޖެ އެމްވީ
ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ޙާލަތްތައް ބަޔާންކޮށް ގާނޫނުއަސާސީއަށް ގެނައި އިސްލާހު ބާތިލްކުރުމަށް ސުޕްރީމް ކޯޓަށް ހުށައެޅި މައްސަލައިގެ ޙުކުމް ކުރުމުގެ އަޑުއެހުން ތާވަލުކޮށްފިއެވެ.
މި މައްސަލައިގައި ޙުކުމް ކުރުމަށް ހަމަޖެހިފައިވަނީ ބުދަ ދުވަހުގެ ހެނދުނު 10:15 ގައެވެ.
ސުޕްރީމް ކޯޓުގައި މި މައްސަލަ ބައްލަވަނީ އެ ކޯޓުގެ 7 ފަނޑިޔާރުންގެ ބެންޗުންނެވެ. އެގޮތުން މިހާރު ބެންޗުގައި ހިމެނިވަޑައިގަންނަވަނީ އުއްތަމަ ފަނޑިޔާރު ޢަބްދުލްޣަނީ މުޙައްމަދާއި، ފަނޑިޔާރު ޢާއިޝާ ޝުޖޫން މުޙައްމަދާއި، ފަނޑިޔާރު ޢަލީ ރަޝީދު ޙުސައިނާއި، ފަނޑިޔާރު ޑރ. މުޙައްމަދު އިބްރާހީމާއި، ފަނޑިޔާރު ޙުސައިން ޝަހީދާއި، ފަނޑިޔާރު ޢަބްދުﷲ ޙަމީދުގެ އިތުރުން ފަނޑިޔާރު މުޙައްމަދު ސަލީމެވެ.
މި މައްސަލައިގެ ފުރަތަމަ އަޑުއެހުން ސުޕްރީމް ކޯޓުގައި ކުރިއަށް ދިޔައީ 2025 ވަނަ އަހަރުގެ ފެބްރުއަރީ މަހުގެ 17 ވަނަ ދުވަހުއެވެ. އޭރު މައިގަނޑު 4 ސަބަބެއްގެ މައްޗަށް ބިނާކޮށް އަލީ ހުސައިންގެ ފަރާތުން މި މައްސަލަ ވަނީ ސުޕްރީމް ކޯޓަށް ހުށަހަޅާފައެވެ.
މީގެ އިތުރުން، ސުޕްރީމް ކޯޓަށް ހުށަހަޅާފައިވާ މައްސަލަ ކޯޓުން ނިންމުމުގެ ކުރިން ރައްޔިތުންގެ މަޖިލީހުގެ އެއްވެސް މެންބަރެއްގެ މަގާމުން ވަކިކުރުމާބެހޭ އެއްވެސް އިޖުރާއަތެއް ނުހިންގުމަށް އަމުރުކޮށްދީ ވަގުތީ އަމުރެއް ނެރެދިނުމަށްވެސް އޭރު އެދިފައި އޮތެވެ.
އެހެންނަމަވެސް ވަގުތީ އަމުރާމެދު ގޮތެއް ނިންމުމަށް އޮތް އަޑުއެހުން ފެށެން ކުޑަ ވަގުތުކޮޅަކަށް ވެފައި ވަނިކޮށް ސުޕްރީމް ކޯޓުގެ ފަނޑިޔާރުންތަކެއް ސަސްޕެންޑުކޮށް އޭރު ހިނގާދިޔަ ކަންތައްތަކާއެކު މިއަދާ ހަމައަށް އެ މައްސަލައިގެ އިތުރު އަޑުއެހުމެއް އޭރު ބާއްވާފައެއް ނުވެއެވެ.
އެހެންކަމުން 14 އޭޕްރީލްވީ އަންގާރަ ދުވަހު ކުރިއަށް ދިޔަ އަޑުއެހުމުގައި އައު ބެންޗަކާއެކު މައްސަލަ ފަށައި، މި މައްސަލައިގެ އަޑުއެހުންތައް ވަނީ އޭރު ނިންމާލާފައެވެ.
