ހޮރްމޫޒް ކަނޑުއޮޅި އަލުން ހުޅުވާލެވޭ ގޮތަށް، އީރާން އިން އައު ހުށަހެޅުން ތަކެއް ހުށަހަޅައިފި

ހޮރްމޫޒް ކަނޑުއޮޅި އަލުން ހުޅުވާލުމަށާއި، ހަނގުރާމަ ހުއްޓާލުމާ ގުޅޭ ގޮތުން އީރާން އިން އެމެރިކާ އަށް އައު ހުށަހެޅުން ތަކެއް ހުށަހަޅާފައިވާ ކަމަށް އެމެރިކާގެ ނޫސް އެޖެންސީއެއް ކަމަށްވާ އެކްސިއޯސް އިން ރިޕޯޓު ކޮށްފި އެވެ.

އެމެރިކާގެ އޮފިޝަލަކާއި، އެކަމުގެ މައުލޫމާތު ހުރި އިތުރު ދެ މަސްދަރަކާ ހަވާލާދީ އެ ނޫހުން ބުނެފައި ވަނީ، އީރާން އިން މި ހުށަހެޅުމުގައި ނިއުކްލިއާ މަޝްވަރާތައް ފަހުގެ މަރުހަލާ އަކަށް ފަސް ކުރުމަށް ބަޔާން ކޮށްފައިވާ ކަމަށެވެ. 

އެކްސިއޯސް އިން ރިޕޯޓު ކޮށްފައިވާ ގޮތުގައި އީރާން އިން މި ހުށަހެޅުން އެމެރިކާ އަށް ހުށަހަޅާފައި ވަނީ ޕާކިސްތާން މެދުވެރިކޮށެވެ. މި ހުށަހެޅުމުގެ މައިގަނޑު ބޭނުމަކީ ހޮރްމޫޒް ކަނޑުއޮޅި އަލުން ހުޅުވާލުމާއި، އީރާންގެ ބަނދަރު ތަކަށް އެމެރިކާ އިން ކުރިމަތި ކޮށްފައިވާ ބްލޮކޭޑް ނުވަތަ ދަތި ކުރުމުގެ ފިޔަވަޅުތައް އުވާލުމެވެ. 

ނަމަވެސް، މިފަދަ އެއްބަސްވުމަކަށް އައުމަކީ އެމެރިކާގެ ރައީސް ޑޮނަލްޑް ޓްރަމްޕް އަށް ކުރިމަތި ވާނެ ގޮންޖެހުމެއް ކަމަށް އެ ނޫހުން ފާހަގަ ކޮށްފައިވެ އެވެ. އެއީ އީރާންގެ ބަނދަރު ތަކަށް އަޅާފައިވާ ފިޔަވަޅުތައް އުވާލައިފި ނަމަ، އީރާން އިން ރައްކާ ކޮށްފައިވާ ޔުރޭނިއަމް ސްޓޮކް ދޫކޮށްލުމަށާއި، ކުރިއަށް އޮތް 10 ވަރަކަށް އަހަރު ޔުރޭނިއަމް މުއްސަނދި ކުރުން ހުއްޓާލުމަށް ބާރު އެޅުމަށް ޓްރަމްޕް އަށް އޮތް ބާރު ނުވަތަ ލެވަރޭޒް ގެއްލިގެންދާނެ އެވެ. 

މި ހުށަހެޅުމާ ގުޅޭ ގޮތުން އެމެރިކާގެ ސަރުކާރުން އަދި ރަސްމީކޮށް އެއްޗެއް ބުނެފައި ނުވެ އެވެ. ނިއުކްލިއާ މައްސަލަ ފަސްކޮށް، އިޤްތިޞާދު އަދި ސަރަހައްދީ ހަމަޖެހުމަށް އިސްކަންދީގެން އީރާން އިން ހުށަހެޅި މި ހުށަހެޅުމަކީ މެދު އިރުމަތީގެ މަސްރަހަށް ބޮޑު ބަދަލެއް އަތުވެދާނެ ކަމެއް ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.