އަރާގްޗީގެ ޕާކިސްތާން ދަތުރުފުޅާ ނިއުކްލިއާއާ އެއްވެސް ގުޅުމެއް ނެތް ކަމށް އީރާން އިން ބުނެފި

އީރާންގެ ފޮރިން މިނިސްޓަރު އައްބާސް އަރާގްޗީ ޕާކިސްތާން އަށް ވަޑައިގަތުމާއި، ނިއުކްލިއާ މަޝްވަރާތަކާ އެއްވެސް ގުޅުމެއް ނެތް ކަމަށް އީރާންގެ ސެމީ އޮފިޝަލް ނޫސް އެޖެންސީ ތަސްނީމް އިން ރިޕޯޓު ކޮށްފި އެވެ. 

އަރާގްޗީ ހަފުތާ ބަންދުގައި ޕާކިސްތާންގެ ބޮޑު ވަޒީރު ޝެހްބާޒް ޝަރީފް އާއި އެހެނިހެން އޮފިޝަލުންނާ ބައްދަލުކޮށް ހަނގުރާމަ ނިންމުމަށް އަމަލީ ގޮތުން ތަންފީޒު ކުރެވޭނެ ހަރުދަނާ އުސޫލެއް ކަނޑައެޅުމުގެ މަޝްވަރާތައް ވަނީ ބާއްވައިފަ އެވެ. އެ މަޝްވަރާތައް ކުރިއަށް ގެންދިޔުމަށް އަރާގްޗީ ޕާކިސްތާންގެ ވެރި ރަށް، އިސްލާމްއާބާދަށް ވަޑައިގެންފައިވާ ކަމަށް ތަސްނީމް އިން ބުނެފައިވެ އެވެ. 

ތަސްނީމް އިން ބުނީ އަރާގްޗީ އަނބުރާ ޕާކިސްތާން އަށް ވަޑައިގެންނެވީ ކުރިން ކުރިއަށް ގެންދިޔަ މަޝްވަރާތައް ކުރިއަށް ގެންދިޔުމަށް ކަމަށެވެ. އެ މަޝްވަރާތަކާ ނިއުކްލިއާ މައްސަލައާ އެއްވެސް ގުޅުމެއް ނެތް ކަމަށް ވެސް ވަނީ ބުނެފަ އެވެ. 

މީގެ ކުރިން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާން އިން އޭނާގެ ޝަރުތުތައް ފުރިހަމަވާ ގޮތަށް ހުށަހެޅުން ހުށަހަޅާފައިވާ ކަމަށެވެ. ޓްރަމްޕްގެ ޝަރުތު ތަކުގެ ތެރޭގައި އީރާާންގެ ނިއުކްލިއާ ޕްރޮގްރާމް ހުއްޓުވުން ހިމެނެ އެވެ.

ހޮނިހިރު ދުވަހު އަރާގްޗީ އޮމާން އަށް ވަޑައިގެންނެވުމަށް ފަހު، ޓްރަމްޕް ވަނީ އޭނާގެ ސަފީރުން ޕާކިސްތާން އަށް ކުރައްވަން އޮތް ދަތުރުފުޅު ވެސް ކެންސަލް ކުރައްވައިފަ އެވެ. އަރާގްޗީގެ މި ދަތުރުފުޅުގައި ސަރަހައްދީ ހަނގުރާމަ ނިންމުމަށް ސުލްޙައިގެ މަޝްވަރާތައް ކުރިއަށް ގެންދަވަނާ އެވެ. މި މަޝްވަރާ ތަކުގައި ޕާކިސްތާން އާއި އޮމާންގެ އޮފިޝަލުން ވެސް ބައިވެރިވެފައިވެ އެވެ.