އީރާން އިން ރަތް ރޮނގު ކަނޑައަޅައި، ޕާކިސްތާން މެދުވެރިކޮށް އެކަން އަންގައިފި

އީރާން އިން ޤަބޫލު ނުކުރާނެ ކަންތައް ތަކެއް ނުވަތަ، ރަތް ރޮނގު ތަކެއް ކަނޑައަޅައި، އެމެރިކާގެ ހުށަހެޅުންތަކާ ގުޅޭ ގޮތުން އީރާން އިން މުހިންމު މެސެޖެއް ފޮނުވައިފި އެވެ.

އީރާންގެ ފޮރިން މިނިސްޓަރު އައްބާސް އަރާގްޗީ މި މެސެޖުތައް އެމެރިކާ އަށް ފޮނުވާފައި ވަނީ، ޕާކިސްތާން މެދުވެރިކޮށް ކަމަށް އެ ޤައުމުގެ ދައުލަތުގެ މީޑިއާ އިން ވަނީ ރިޕޯޓު ކޮށްފަ އެވެ.  

އީރާންގެ ރިވޮލިއުޝަނަރީ ގާޑް ކޯޕްސްއާ ގާތް ގުޅުމެއް އޮަންނަ ފާރްސް ނިއުސް އެޖެންސީ އިން ބުނި ގޮތުގައި، މި މެސެޖު ތަކަކީ އިސްލާމީ ޖުމްހޫރިއްޔާގެ ބައެއް މުހިންމު އުސޫލު ތަކާއި، ރަަތް ރޮނގު ތަކެވެ. އޭގެ ތެރޭގައި އީރާންގެ ނިއުކްލިއާ މައްސަލަ އާއި، ބައިނަލްއަޤުވާމީ ކަނޑުގެ ދަތުރުފަތުރުގެ މުހިންމު ސަރަހައްދެއް ކަމަށް ހޮރްމޫޒް ކަނޑުއޮޅިއާ ބެހޭ ކަންކަން ވެސް ހިމެނެ އެވެ. 

މި މައްސަލައާ ގުޅޭ ގޮތުން މައުލޫމާތު ހުރި މަސްދަރު ތަކުން ބުނާ ގޮތުގައި، ފޮރިން މިނިސްޓަރު އަރާގްޗީ މި މެސެޖުތައް ފޮނުވާފައި ވަނީ އީރާން އިން ކަނޑައަޅާފައިވާ ރަތް ރޮނގުގެ އިންތަކުގެ ތެރެއިންނެވެ. އަދި މިއީ އެ ޤައުމުގެ ފޮރިން މިނިސްޓްރީގެ ޑިޕްލޮމެޓިކް ޒިންމާ ތަކުގެ ދާއިރާގެ ތެރެއިން ކުރިއަށް ގެންދިޔަ ކަމެއްކަން އެ ފަރާތް ތަކުން ވަނީ ފާހަގަ ކޮށްފަ އެވެ. 

އީރާންގެ މީޑިއާ ތަކުން އިތުރަށް ބުނެފައިވާ ގޮތުގައި، ޕާކިސްތާން މެދުވެރިކޮށް ފޮނުވި މި މެސެޖު ތަކަކީ އެމެރިކާއާ އެކު ކުރިއަށްދާ އެއްވެސް މަޝްވަރާތަކާ ގުޅުން ހުރި މެސެޖު ތަކެއް ނޫނެވެ. މިއީ ސަރަހައްދީ މަސްރަހު އޮތް ގޮތަށް ސާފު ކޮށްދިނުމަށްޓަކައި އީރާން އިން އިސް ނަަގައިގެން ކުރިއަށް ގެންދިޔަ ޙަރަކާތެއް ކަމަށް ވެސް އެ ޤައުމުން ވަނީ ބުނެފަ އެވެ. 

މި މެސެޖު ތަކުގެ ބޭނުމަކީ ސަރަހައްދީ ހަަމަ ނުޖެހުން ތަކުގެ ތެރޭގައި އީރާން އިން ދޫ ނުދޭނެ ކަންތައްތަކަކީ ކޮބައިކަން އެމެރިކާ އަށް ސާފުކޮށްދިނުމަށެވެ. ޚާއްސަކޮށް ނިއުކްލިއާ ޕްރޮގްރާމް އާއި، ކަނޑުގެ ސަލާމަތާ ގުޅޭ ގޮތުން އެމެރިކާ އިން ކުރާ ޑިމާންޑު ތަކަށް އީރާން އިން އިޖާބަ ނުދޭނެކަން މި މެސެޖު ތަކުން ހާމަވާ ކަމަށް މަސްރަހު ދިރާސާ ކުރާ ފަރާތް ތަކުން ބުނެ އެވެ.