"އަދަދު" ނޫހުގެ އޮފީހަށް ފުލުހުން ވަދެ އެ ނޫހުގެ ތަކެތި ގެންދިޔުން، ރާއްޖޭގައި ހުންނަވާ އިނގިރޭސި ސަފީރު ނިކް ލޯ ކުއްވެރި ކުރައްވައިފި
ރައީސް މުއިއްޒުގެ މައްޗަށް ތުހުމަތުތަކެއްކޮށް 'އަދަދު' ނޫހުން އާންމުކުރި ޑޮކިއުމެންޓްރީއާ ގުޅިގެން ފުލުހުން އެ ނޫހުގެ އޮފީސް ރެއިޑްކޮށް، މުވައްޒަފުންގެ ޕާސްޕޯޓު ހިފެހެއްޓި މައްސަލަ އިނގިރޭސި ސަފީރު ނިކޮލަސް ލޯ ކުށްވެރިކުރައްވައިފި. މި ފިޔަވަޅުތަކަކީ ކޮމަންވެލްތުގެ މިންގަނޑުތަކާ ފުށުއަރާ ކަންތައްތަކެއް ކަމަށާއި، ހަރުދަނާ ޑިމޮކްރަސީއަކަށް މިނިވަން މީޑިއާގެ މުހިންމުކަން ސަފީރު ފާހަގަކުރެއްވި. މި މައްސަލައިގައި ބައިނަލްއަގުވާމީ އެކި ޖަމިއްޔާތަކުން ވެސް ދަނީ ރާއްޖޭގެ ނޫސްވެރިކަމުގެ މިނިވަންކަމާ މެދު ކަންބޮޑުވުން ފާޅުކުރަމުން.
އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ނިކޮލަސް ޑޭވިޑް ލޯ، މުލިއާގޭގައި ބޭއްވި ހަފްލާ އެއްގެ ތެރެއިން | ރައީސް އޮފީސް
"އަދަދު" ނޫހުގެ ސޯޝަލް މީޑިއާ މަންސަތަކުގައި އާންމުކުރި"އައިޝާ" ޑޮކިއުމަންޓްރީއާ ގުޅިގެން، އެ ނޫހުގެ އޮފީހަށް ފުލުހުން ވަދެ ހިންގި ރެއިޑް އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ނިކޮލަސް ޑޭވިޑް ލޯ ކުށްވެރިކުރައްވައިފި އެވެ.
އެކްސްގައި ކުރެއްވި ޕޯސްޓެއްގައި ނިކް ލޯ ވިދާޅުވީ އަދަދު ނޫހުގެ އޮފީހަށް ފުލުހުން ވަދެ ހިންގި ރެއިޑާ ގުޅިގެން ދާދިފަހުން ފެންމަތިވެފައިވާ ރިޕޯޓްތަކަކީ ކަންބޮޑުވާންޖެހޭ ކަންތައްތަކެއް ކަމަށެވެ. އަދި ދިވެހި ފުލުހުން ހިންގި މި ރެއިޑަކީ ކޮމަންވެލްތުގެ މިންގަނޑުތަކަށް އަމަލުކުރުމަށް ދިވެހިރާއްޖެ އިން ވެފައިވާ އެއްބަސްވުންތަކާ ވެސް ފުށުއަރާ ކަމެއް ކަމަށް އޭނާ ވިދާޅުވި އެވެ.
މީގެ އިތުރުން ސަފީރު ވިދާޅުވީ ހަރުދަނާ ޑިމޮކްރަސީ އެއް ދެމެހެއްޓުމަށްޓަކައި މިނިވަން އަދި މުސްތަގިއްލު މީޑިއާއެއް އޮތުމަކީ ކޮންމެހެން ބޭނުންތެރި ކަމެއް ކަމަށެވެ.
މިދިޔަ މަހުގެ 28 ވަނަ ދުވަހު އާންމުކުރި އެ ޑޮކިއުމެންޓްރީއާ ގުޅިގެން ފުލުހުން ވަނީ ޖިނާއީ ތަހުގީގެއް ފަށައިފަ އެވެ. އެއާ އެކު އަޅަން ފަށާފައިވާ ފިޔަވަޅުތަކުގެ ތެރޭގައި ކޯޓު އަމުރެއްގެ ދަށުން އަދަދު ނޫހުގެ އޮފީސް ބަލައި ފާސްކުރުމުގެ އޮޕަރޭޝަނެއް ކުރިއަށް ގެންގޮސް، އެ ނޫސް ހިންގަން ބޭނުންކުރާ އިލެކްޓްރޯނިކް ގިނަ ވަސީލަތްތައް ފުލުހުން ވަނީ ގެންގޮސްފަ އެވެ.
އަދި އެ ނޫހުގެ ސީއީއޯ ހުސެން ފިޔާޒު މޫސާއާއި އެޑިޓަރު ހަސަން މުހައްމަދުގެ ޕާސްޕޯޓު ހިފެހެއްޓުމަށް ކޯޓު އަމުރު ނެރެ، އެ މީހުން ފުލުހަށް ހާޒިރުވާން ޗިޓު ވަނީ ފޮނުވާފަ އެވެ.
ނިކް ލޯގެ އިތުރުން ބޭރުގެ އެކި ނޫސް ޖަމިއްޔާތަކުން ވެސް ދަނީ އަދަދު ނޫހަށް ފުލުހުން ވަދެ ހިންގި އޮޕަރޭޝަނާ ގުޅިގެން ކަންބޮޑުވުން ފާޅުކުރަމުންނެވެ. މި ފިޔަވަޅުތަކަކީ ރާއްޖޭގެ މީޑިއާގެ މިނިވަންކަމާއި އަދި ހިޔާލުފާޅުކުރުމުގެ މިނިވަންކަމަށް އޮތް ބޮޑު ނުރައްކަލެއްކަށް ބައިނަލްއަގުވާމީ ޖަމިއްޔާތަކުން ދަނީ ފާހަގަކުރަމުންނެވެ.
އަދަދު ނޫހުން އާންމުކުރި ޑޮކިއުމެންޓްރީގައި ރައީސް މުއިއްޒުގެ މައްޗަށް ބަދު އަހުލާގީ އަމަލުތަކުގެ ތުހުމަތުތައް ކުރެވިފައިވާއިރު، މި މައްސަލައިގައި ސަރުކާރުން އަޅަމުންދާ ފިޔަވަޅުތަކަކީ ނޫސްވެރިކަމުގެ މިނިވަންކަމަށް އޮތް ބޮޑު ނުރައްކަލެއް ކަމަށް ގިނަ ބަޔަކު ދަނީ ބުނަމުންނެވެ.
