އެމެރިކާގެ ޝަރުތު ތަކަަށް އެއްބަސްވެވޭ ހުށަހެޅުން ހުށަހަޅަން އީރާން އިން ދަނީ ތައްޔާރުވަމުން: ޓްރަމްޕް

އެމެރިކާގެ ޝަރުތު ތަކަށް އެއްބަސްވެވޭ ފަދަ ހުށަހެޅުމެއް ހުށަހަޅަން އީރާން އިން ދަނީ ތައްޔާރު ވަމުން ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ހުކުރު ދުވަހު ޓްރަމްޕް ރޮއިޓާސް އަށް މިހެން ވިދާޅުވެފައިވާއިރު، އިތުރަށް އޭނާ ވިދާޅުވީ ޕާކިސްތާންގައި ވަރަށް އަވަހަށް މަޝްވަރާތައް ފެށޭނެ ކަމަށް ވެސް އުންމީދު ކުރައްވާ ކަމަށެވެ. 

ފޯނުން ދެއްވި އިންޓަވިޔުގައި ޓްރަމްޕް ވިދާޅުވީ، އީރާން އިން އަންނަނީ ހުށަހެޅުމެއް ހުށަހަޅަން ތައްޔާރު ވަމުން ކަމަށާއި، އެކަން ވަރަށް ރަނގަޅަށް ބަލަން ޖެހޭ ކަމަށެވެ. ނަމަވެސް، އެއީ ކޮން ކަހަލަ ހުށަހެޅުމެއްކަން މިހާތަނަށް ސާފުވެފައި ނުވާ ކަމަށް ވެސް ޓްރަމްޕް ވިދާޅުވި އެވެ. 

އެމެރިކާ އިން މަޝްވަރާ ކުރަމުން އަންނަނީ ކޮން ފަރާތަކާތޯ ސުވާލު ކުރުމުން ޓްރަމްޕް ވިދާޅުވީ، އެކަން ހާމަ ކުރައްވަން ބޭނުން ނުވާ ކަމަށެވެ. ނަމަވެސް، އެމެރިކާ އިން މަޝްވަރާ ކުރަމުން އަންނަނީ މިހާރު އީރާންގެ ވެރިކަމުގެ ބާރުގައި ތިއްބެވި ފަރާތްތަކާ އެކު ކަމަށް ޓްރަމްޕް ވިދާޅުވި އެވެ. 

އެމެރިކާގެ ރިޔާސީ ގަނޑުވަރު، ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ހުކުރު ދުވަހު ނޫސްވެރިންނާ ވާހަކަ ދައްކަވަމުން ވިދާޅުވީ، ޕާކިސްތާންގައި އީރާންގެ ފޮރިން މިނިސްޓަރު އައްބާސް އަރާގްޗީއާ ބައްދަލު ކުރެއްވުމަށް، ސްޓީވް ވިޓްކޮފް އާއި ޖެރާޑް ކުޝްނާ ފޮނުވުމަށް ޓްރަމްޕް ވިސްނަވާ ކަމަށެވެ. 

އެމެރިކާ އާއި އީރާންއާ ދެމެދު ވަނީ ފުރަތަމަ ބުރުގެ މަޝްވަރާ ތަކެއް ކުރިއަށް ގެންގޮސްފަ އެވެ. ނަމަވެސް އެ މަޝްވަރާ ތަކުން އެއްވެސް ކާމިޔާބެއް ލިބިފައި ނުވާއިރު، ދެ ވަނަ ބުރުގެ މަޝްވަރާ ތަކާ މެދު ވަނީ ނުތަނަވަސްކަން އުފެދިފަ އެވެ.