ދެ ވަނަ ބުރުގެ މަޝްވަރާ ތަކަށް ހުކުރު ދުވަހުގެ ރޭ އަރާގްޗީ ޕާކިސްތާން އަށް ވަޑައިގެންނެވުމުގެ ފުރުސަތު ބޮޑު ކަމަށް ބުނެފި

އެމެރިކާ އާއި އީރާންއާ ދެމެދު ކުރިއަށް ގެންދަން މަސައްކަތް ކުރަމުން އަންނަ ދެ ވަނަ ބުރުގެ މަޝްވަރާ ތަކުގައި ބައިވެރިވެ ވަޑައިގެންނެވުމަށް، އީރާންގެ ފޮރިން މިނިސްޓަރު އައްބާސް އަރާގްޗީ ހުކުރު ދުވަހުގެ ރޭ ޕާކިސްތާނަށް ވަޑައިގެންނެވުމުގެ ފުރުސަތު ބޮޑު ކަމަށް ބުނެފި އެވެ. 

ޕާކިސްތާންގެ ސަރުކާރުގެ މަސްދަރަކާ ހަވާލާދީ އަލް އަރަބިއްޔާގައި ބުނެފައި ވަނީ، ހުކުރު ދުވަހުގެ ރޭ އީރާންގެ ކުޑަ ވަފުދަކާ އެކު އަރާގްޗީ، ޕާކިސްތާންގެ ވެރި ރަށް އިސްލާމްއާބާދަށް ވަޑައިގެންނެވުމުގެ ފުރުސަތު ވަރަށް ބޮޑު ކަމަށެވެ. 

މި މަޝްވަރާ ތަކަށް އެމެރިކާގެ ލޮޖިސްޓިކްސް އަދި ސެކިއުރިޓީ ޓީމު މީގެ ކުރިން ވަނީ ޕާކިސްތާންގެ ވެރި ރަށް އިސްލާމްއާބާދަށް ހިނގައްޖެ ކަމަށް ރޮއިޓާސްގައި ވަނީ ބުނެފަ އެވެ. މިއީ ޕާކިސްތާންގެ ސަރުކާރުގެ މަސްދަރުތަކާ ހަވާލާދީ ކޮށްފައިވާ ރިޕޯޓެކެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމަ ނިންމުމަށް، މެދުވެރިއެއްގެ ދައުރު އަދާ ކުރަމުން އަންނަނީ ޕާކިސްތާން އިންނެވެ. ޕާކިސްތާންގެ ވެރިރަށް އިސްލާމްއާބާދުގައި މީގެ ކުރިން ވަނީ ފުރަތަމަ ބުރުގެ މަޝްވަރާ ތަކެއް ބާއްވައިފަ އެވެ. ނަމަވެސް، އެ މަޝްވަރާ ތަކުން ވެސް ހަނގުރާމަ ނިންމުމަށް ދާއިމީ އެއްބަސްވުމަކަށް އާދެވިފައި ނުވެ އެެވެ. ދެ ވަނަ ބުރުގެ މަޝްވަރާ ތަކަށް ވަފުދެއް ފޮނުވުމަށް މިހާތަނަށް އީރާން އިން ވަނީ އިންކާރު ކޮށްފަ އެވެ.

އެމެރިކާ އާއި އީރާނުން އެންމެ ފުރަތަމަ ވަނީ ދެ ހަފުތާގެ މުއްދަތަކަށް ހަނގުރާމަ މެދު ކަނޑާލުމަށް އެއްބަސްވެފަ އެވެ. އެ އެއްބަސްވުމުގެ މުއްދަތު ހަމަވާން ކުޑަ ވަގުތު ކޮޅަކަށް ވެފައި ވަނިކޮށް، އެމެރިކާާގެ ރައީސް ޑޮނަލްޑް ޓްރަމްޕް ވަނީ އެ މުއްދަތު އިތުރު ކޮށްފައިވާ ކަމަަށް އިއުލާން ކުރައްވައިފަ އެވެ.