މި ސަރުކާރުގެ ސިޔާސަތަކީ ދައުލަތަށް ލިބޭހާ ފައިސާއެއް ވެރިމީހާ ބޭނުންވާހާ ގޮތަކަށް ހަރަދު ކުރެވޭ ނިޒާމެއް ގާއިމް ކުރުން: އަލީ ހުސެއިން

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުގެ ސިޔާސަތަކީ އުފެއްދުންތެރިކަން ނެތިކޮށްލައި، ދައުލަތަށް ލިބޭހާ ފައިސާއެއް ވެރިމީހާ ބޭނުންވާހާ ގޮތަކަށް ހަރަދު ކުރެވޭ ނިޒާމެއް ގާއިމް ކުރުން ކަމަށް ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އަލީ ހުސެއިން ވިދާޅުވީ، ވެރިކަމުގެ ކުޑަ ދުވަސްކޮޅެއްގެ ތެރޭގައި ރައީސް މުއިއްޒުގެ ޕޮޕިއުލާރިޓީ ގެއްލިފައިވާ ކަމަށާއި، އެމަނިކުފާނަށް ރައްޔިތުންގެ ތާއީދު ނެތް ކަމަށެވެ. ސަރުކާރަށް ދެއަހަރާއި ބައި ވެގެންދިޔައިރު، ރަނގަޅު ސިޔާސަތެއް ނުގެނެވުނު ކަމަށާއި، ރާއްޖޭގެ އާމްދަނީ އިތުރު ކުރުމަށްޓަކައި ކާމިޔާބު އެއްވެސް މަސައްކަތެއް ކުރެވިފައިނުވާ ކަމަށެވެ. 

އެހެންކަމުން ކުރިއަށް އޮތްތަނުގައި ވެސް މިސަރުކާރަށް ކާމިޔާބު އަދި ރައްޔިތުންނާ ގައުމަށް ކުރިއެރުން ލިބޭނެ ކަމެއް ނުކުރެވޭނެ ކަމަށް އޭނާ ވިދާޅުވި އެވެ. 

މީހުން ބުނަނީ މިސާލަކަށް އާފަލަކުން އޮރެންޖު ދިޔަ ނުފެލޭނެއޭ. އެގޮތަށް ހަމަ ކިޔާތާ އަލަގަހަކުން ކެޔޮ ނެރެން ނުފަޅާނެއޭ. ހަމަ އަލަގަސްވާނީ އަލަގަހަކަށް އިނގޭތޯ. އެހެންވީމަ އެއަކުން ކެޔޮ ނިރެއް ނުފަޅާނެ. އެހެންވީމާ، އޭގެ ހުރިއެއްޗަށް ނުކުންނާނެ. އެހެންވީމާ، ދެ އަހަރާ ބައިވާއިރު އަޅުގަނޑުމެންނަށް އެބަ އެނގޭ އެހުރި ކެޕޭސިޓީ ކޮންކަމެއްކަން ހަގީގަތުގައި. މި ގައުމަށް ދިވެހިރާއްޖެއަށް އާމްދަނީ އިތުރުކުރެވޭނެ އެއްވެސް ކަމެއް މި ސަރުކާރަކަށް ކުރެވިފައިނުވޭ. އޭގެ އިތުރުން އަޅުގަނޑުމެންނަށްސ ފެންނަނީ އިސްރާފުތައް އިންތިހާއަށް ބޮޑު. ވައްކަންކުރުމާއި، ހަމަ ރޯމާދުވާލު އެސް .އެސް .އޯ .އީ ކުންފުނިތަކުން ކުރަންނުޖެހޭ ބޭކާރު ޚަރަދު އިންތިހާއަށް ކުރަމުންދާ ތަން އަޅުގަނޑުމެންނަށް ފެނޭ. އެކި ނަންނަމުގައި އެކިއެކި ނޫސްތަކަށާއި، އެގޮތްމިގޮތުން މީހުންނަށާ އެއްޗެއް ބޭނުންނުވާ މީހުންނަށް ވަޒީފާ ދިނުމަށާއި، ބޭނުންނުވާ ޕީއާރު ހިންގާށާއި، ބޭނުންނުވާ މާކެޓިންގ، މިސާލަކަށް އެމް.އޭ.ސީ.އެލްއިން ކޮންކަމަށް، ކޮން މާކެޓިންގ ނެއްތޯ ހިންގަންވީ؟ ކޯއްޗެއްތޯ އިޚްތިޔާރުކުރަންވީ؟ އެ ވާހަކަ އެމް.އޭ.ސީ.އެލްއާ ވާދަކުރާ އިތުރު ކުންފުންޏެއް އެބައޮތްތޯ ދިވެހިރާއްޖޭގައި ނެތެއް ނޫންތޯ؟

ގާނޫނީ ވަކީލު އަލީ ހުސައިން

ސަރުކާރުގެ ހަރަދުތައް އިންތިހާއަށް ބޮޑުކަން ހުރިހާ ރައްޔިތުންނަށް އެނގޭކަން ފާހަގަކުރައްވައި އަލީ ހުސެއިން ވިދާޅުވީ 2028 ގައި އޮންނަ ރިޔާސީ އިންތިޚާބާ ދިމާކޮށް 50،000 މީހުންނަށް ސަރުކާރުގެ ތެރެއިން ވަޒީފާ ދޭން ނިންމާފައިވާ ކަމަށެވެ. އަދި މިކަމުގެ ސަބަބުން ގައުމުގެ އުފެއްދުންތެރިކަން ނެތިގެންދާ ކަމަށް އޭނާ ވިދާޅުވި އެވެ. 

މަސައްކަތެއް ނެތި މީހުންނަށް ވަޒީފާ ދިނީމާ އޭގެ ސަބަބުން ދެ ގެއްލުމެއް އެބަލިބޭ. އެއީ މަސައްކަތްކުރާ މީހާ، މިސާލަކަށް އެހެން މަސައްކަތެއް ކުރީމާ، އެއިރުން ނެޝަނަލް ޕްރޮޑަކްޓިވިޓީ އިނގޭތޯ. އެހެންނޫނިއްޔާ އެއްކަލަ ބުނާހެން ނެޝަނަލް ޕްރޮޑަކްޝަނަށް އެ މިސާލަކަށް ގައުމުގައި އުފެއްދުންތެރިކަމަށް އެ މީހާ އެބަ ކޮންޓްރިބިއުޓްކުރޭ. މިހާރު އެ ކޮންޓްރިބިއުޝަން ނުލިބި އަނެއްކާ ދައުލަތުން އެ މީހަކަށް މި ހަގީގަތުގައި މުސާރަ ދޭ މި ފަށަނީ އިނގޭތޯ. ދިނީމާ މިވާގޮތަކީ، އެއްކަލަ އުފެއްދުންތެރި އަތަށް މި ނެތަނީ. އެހެންވީމާ، ދިވެހީންގެ ތެރޭގައި ތިބިއްޔާ އަތްފައި ހިރޭ ހުރިހާ އެންމެން ވަކިން ޚާއްސަކޮށް ސިޔާސީ ގޮތުން މުއިއްޒުއާ ދެކޮޅަށް ބަހެއް ނުބުނާ އެންމެން ދައުލަތުގެ ކުންފުނިތަކަށާއި، ސަރުކާރުގެ ވަޒީފާތަކަށް ނޫނިއްޔާ ކޮންމެވެސް ނޫހެއް ހިންގަނީ. އެހެން މި ދަންނަވާހެން އުފެއްދުންތެރިކަމެއް ނެތި ހަމައެކަނި ލީކޭޖުގެ ގޮތުގައި ދައުލަތަށް ލިބެންޏާ ލިބޭހާ ފައިސާއެއް ޚަރަދުކުރެވޭ ނިޒާމަކަށް އަޅުގަނޑުމެން މި ދަނީ.

ގާނޫނީ ވަކީލު އަލީ ހުސައިން

މީގެ އިތުރުން އަލީ ހުސެއިން ވިދާޅުވީ ދައުލަތަށް ލިބޭހާ ފައިސާއެއް ވެރިމީހާ ބޭނުންވާހާ ގޮތަކަށް ހަރަދު ކުރެވޭ ނިޒާމެއް އުފެދިގެން ދަނީ ޖަވާބުދާރީ ކުރެވޭނެ ނިޒާމެއް އެއްވެސް މިންވަރަކަށް ގައުމުގައި ނެތުމުން ކަމަށެވެ.

ނަމަވެސް މިއީ މިނިވަން މުއައްސަސާތައް ގިނަ ގައުމެއް ކަމަށާއި، ރައްޔިތުން މިއަދު ނުކުމެ އެ މުއައްސަސާތަކަށް ހަގީގީ މިނިވަންކަން ހޯދައިދޭން ޖެހޭ ކަމަށް އޭނާ ވިދާޅުވި އެވެ.