ކޭޕާކް ފެލްޓްތައް ގަތީ ދިވެހިން ކަމަށް ސަރުކާރަށް ގަބޫލު ނުކުރެވޭ، ކޭޕާކް ފެލެޓްތަކުގެ އޮޑިޓެއް ހަދަން ޖެހޭ: ކޭޕާކް ޔޫނިއަން

ކޭޕާކް ފެލްޓްތައް ގަތީ ދިވެހިން ކަމަށް ސަރުކާރަށް ގަބޫލު ނުކުރެވޭ ކަމަށާއި، އެ މައްސަލަ އަށް ހައްލު ހޯދާ ދިނުމަށް ކޭޕާކް ފެލެޓްތަކުގެ އޮޑިޓެއް ހަދަން ޖެހޭ ކަމަށް ކޭޕާކް ޔޫނިއަން އިން ބުނެފި އެވެ.

އެ ޔޫނިއަން އިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޤާނޫނީ ވަކީލް އަލީ ހުސެއިން ވިދާޅުވީ ކޭޕާކް ފެލްޓް ގަތް ދިވެހިންގެ ހައްގުތައް ގެއްލިފައިވާ ކަމަށް ފާހަގަކުރައްވާފަ އެވެ. އެ ތަނުން ފްލެޓް ގަތީ ދިވެހިން ކަމަށް ސަރުކާރަށް ގަބޫލު ނުކުރެވޭހެން ސަރުކާރުގެ އަމަލުތަކުން ފެންނަ ކަމަށާއި، މިއަދާއި ހިސާބަށް ވެސް އެތަނުން އެ އެޕާޓްމަންޓްތައް ގަތް ފަރާތްތަކަށް އެ ތަންތަން ލިބިފައި ނުވާތީ އެކަމާއި މެދު ސަރުކާރުން އެކަށީގެންވާ ފިޔަވަޅު ތަކެއް އަޅާދީފައި ނުވާ ކަމަށް އޭނާ ވިދާޅުވި އެވެ.

ނަމަވެސް އެހެނިހެން ފްލެޓް ސްކީމްތަކުން ފްލެޓް ގަންނަ މީހުންނަށް ފްލެޓް ނުލިބުމުންނާއި އެހެނިހެން ގޯތި ގެދޮރުގެ ސިޔާސަތު ތަކާއި ގުޅިގެން ގެއްލުން ލިބޭ މީހުންނަށް ހައްލެއް ހޯދައިދިނުމަށް ދައުލަތުން މަސައްކަތް ކުރަމުންދާ ކަމަށް އަލީ ހުސައިން ވިދާޅުވި އެވެ. ކޭޕާކް ފްލެޓްތަކާއި މެދު ތަފާތު މޭރުމަކުން އަމަލު ކުރަން ޖެހޭ ސަބަބާއި މެދު އޭނާ ވަނީ ސުވާލު އުފައްދަވާފަ އެވެ.

"މައްސަލަތައް އެބަ ހުރި މިކަމުގައި. އެބަ ޖެހޭ މިކަމުގެ އޮޑިޓެއް ހަދަން. އޭސީސީ އިން ކަމަށް ވިޔަސް. ނޫނީ އޭޖީ އޮފީސް މެދުވެރިކޮށް ވިޔަސް. އެ އޮޑިޓް ހެދޭނީ ދިވެހި ދައުލަތަށް. އަޅުގަނޑުމެން އަމިއްލަ އަށް އޮޑިޓެއް ހެދިޔަސް އޭގެ ގާނޫނީ ހައިސިއްޔަތާއި މެދު ސުވާލު އުފެދޭނެ،. ފުލުހުންގެ އިދާރާ އިން ވެސް ވަނީ ވަރަށް ގިނަ ތަހުގީގުކޮށްފަ. އެހެންވީމަ އެކަން ކުރެވޭނީ ދައުލަތަށް." އަލީ ހުސައިން ވިދާޅުވި އެވެ.

އެ ނޫސްވެރިންގެ ބައްދަލުވުމުގައި ވާހަކަދައްކަވަމުން ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް ވިދާޅުވީ ކޭޕާކް ފްލެޓްތަކުގެ މައްސަލަ އަށް ކޮންމެވެސް ހައްލެއް ހޯދައި ދޭން ޖެހޭ ކަމަށެވެ. ކޭޕާކް ފްލެޓްތައް ގަނެފައި ވަނީ ސައްހަ އެގްރީމެންޓެއްގެ ދަށުން ކަމަށް ވާއިރު މިދިޔަ 10 އަހަރުގެ ތެރޭގައި ވެސް އެ ފްލެޓްތައް ގަތް އާއްމުންނަށް އެދެވޭ ޖަވާބެއް ނުލިބޭ ކަމަށް ޝަރީފް ވިދާޅުވި އެވެ. ޝަރީފް ވަނީ އެތައް ގޮތަކުން މަސައްކަތް ކޮށްގެން ވެސް ކޭޕާކް ފްލެޓް ގަތް މީހުންނަށް އުއްމީދެއް ލިބިފައި ނުވާތީ އެކަމުގެ ކަންބޮޑުވުން ހިއްސާކުރައްވާފަ އެވެ.

2016 ވަނަ އަހަރު ހަންބޯއާ ހަވާލު ކުރި ކޭޕާކް ފްލެޓްގެ މަސައްކަތް އަދި ވެސް ނުނިމޭތީ އެ ފްލެޓްތައް ގަތް ފަރާތްތަކަށް ވަނީ އެތައް ގެއްލުމަކާއި ކުރިމަތިލާން ޖެހިފަ އެވެ. ކޭޕާކު ފުލެޓުތައް އޮޅުވާލައިގެން ގިނަ އަދަދެއްގެ މީހުންނަށް ވިއްކާފައި ވާތީ ހަސަން މަމްދޫހު (މަންޑޭ)ގެ މައްޗަށް ކްރިމިނަލް ކޯޓުގައި 94 ދައުވާ ވަނީ ސާބިތު ވެފަ އެވެ. އަދި އޭނާ އަށް 397 އަހަރުގެ ޖަލު ހުކުމެއް ވަނީ އިއްވާފަ އެވެ. ނަމަވެސް ފްލެޓް ގަތް މީހުންނަށް މިއަދާއި ހަމަ އަށް ވެސް މި މައްސަލައިގެ ވާނުވާ ސާފުވެފެއް ނުވެ އެވެ.