ޝަރަފުއްދީން ސްކޫލްގައި އަންހެން ކުއްޖަކަށް ބުލީކުރުން: ލޭސް ގަނޑަކުން ކުއްޖާގެ ކަރަށް ވާންކޮށް ބިރު ދެއްކި!
އައްޑޫ ސިޓީގެ ޝަރަފުއްދީން ސްކޫލްގެ ކްލާސްރޫމެއްގެ ތެރޭގައި ޓީޗަރަކު ނެތް ވަގުތެއްގައި، ފިރިހެން ދަރިވަރުންތަކެއް އަންހެން ކުއްޖެއްގެ ކަރުގައި ލޭސްފޮތިގަނޑެއް އޮޅައި ބުލީކުރި މައްސަލައެއް ފެންމަތިވެފައި ވާއިރު، މި ހާދިސާއާ ގުޅިގެން އެ ކުއްޖާއަށް ނަފްސާނީ އަދި ޖިސްމާނީ އަނިޔާތަކެއް ލިބިފައިވޭ.
ކުއްޖަކަށް ބުލީކޮށްގެން ކުއްޖާ މާޔޫސްވެފައިވާ މަންޒަރު ފެންނަ ފޮޓޯ އެއް | ގޫގުލް
އައްޑޫ ސިޓީހެ ޝަރަފުއްދީން ސްކޫލްގައި ކިޔަވަމުންދާ އަންހެން ދަރިވަރަކަށް ބުލީކޮށް، ފުރައްސާރަ ކުރި މައްސަލަ އެއް ފެންމަތިވެއްޖެ އެވެ.
ރާއްޖެ އެމްވީ އަށް އިތުބާރު ހުރި މަސްދަރަކުން މައުލޫމާތު ދީފައިވާ ގޮތުގައި ބުލީގެ ޝިކާރައަކަށް ވެފައިވާ އަންހެން ކުއްޖާ އަށް މިފަދަ ކަންކަން ދިމާވާކަން އާއިލާ އަށް އެނގިފައި ވަނީ ނިމިދިޔަ ހަފްތާގެ ތެރޭގަ އެވެ. ކަން ހިނގައި ދިޔަ ގޮތް ރާއްޖެ އެމްވީ އާއި ހިއްސާކުރަމުން ކުއްޖާ އާއި އާއިލީ ގޮތުން ގުޅުން އޮންނަ މީހަކު ބުނީ ނިމިދިޔަ ހަފްތާގައި ސްކޫލްގެ ބޭނުމަށް ދަރިވަރުންނަށް ލޭސް ފޮތްޗާއި ހާޑްބޯޑް ފަދަ މެޓީރިއަލް އެއް ގެންދިއުމަށް އަންގާފައިވާ ކަމަށެވެ.
ކްލާސްރޫމްގައި ޓީޗަރަކު ނެތް ވަގުތު އެ އަންހެން ކުއްޖާ ކިޔަވަމުންދާ ކުލާހުގައި ކިޔަވާ ފިރިހެން ކުއްޖަކު އެ އަންހެން ކުއްޖާގެ ކަރުގައި، ސްކޫލް ޕްރޮޖެކްޓަށް ގެންދިޔަ ލޭސްގަނޑު އަޅުވާފައިވާ ކަމަށް މި ނޫހަށް މައުލޫމާތު ދިން މީހާ ކިޔާދިނެވެ. އަދި އެ ވަގުތު އެތަނުގައި ހުރި އެހެން ފިރިހެން ދަރިވަރަކު "އިތުރަށް ކަރަށް ވާން" ވާ ގޮތަށް އަމަލުކުރުމަށް ހިތްވަރު ދެމުން ދިޔަ ކަމަށް ވެސް ވަނީ އެނގިފަ އެވެ. އެ ގޮތަށް ކުއްޖާގެ ކަރަށް ވާން ވާގޮތަށް ލޭސްގަނޑު އޮޅާފައި ވަނީ ކުއްޖާގެ ފަހަތުން ކަމަށް ވުމާއި އެކު، އެކަމުގެ ސަބަބުން ކުއްޖާ ހާސްވެ އުނދަނގޫވެގެން ދޫކޮށްލަން އެދެމުން ދިޔަ ކަމަށް ވެސް މި ނޫހަށް ވަނީ އެނގިފަ އެވެ. އަމިއްލަ އަށް ދިފާއުގައި މަސައްކަތްކޮށް ވީއްލިގަނެވޭ ގޮތް ވީ އިރުކޮޅެއް ފަހުން ކަމަށާއި އޭރު އެ ކުއްޖާ އަށް ވަރަށް ބޮޑަށް ތަދު ވުމުގެ އިތުރުން ދިމާވި ހާދިސާގެ ސަބަބުން ވަރަށް ބޮޑަށް ސިހުން ލިބިފައިވާކަމަށް ވެސް ރާއްޖެ އެމްވީ އަށް މައުލޫމާތު ދިން ފަރާތުން ވަނީ ބުނެފަ އެވެ.
މި ހާދިސާ ހިނގި ވަގުތު ސްކޫލްގައި މުދައްރިސަކު ނެތީ އެއް މުދައްރިސަކު އެ ދުވަހު ސްކޫލްގައި ނެތުމުން އެ ވަގުތު ކްލާސްރޫމް ހުސްކޮށް އޮތުމުން ކަމަށް މި ނޫހަށް މައުލޫމާތު ދިން މީހާ ވަނީ ބުނެފަ އެވެ. މި ހާދިސާ ހިނގި ދުވަހު އެ އަންހެން ކުއްޖާގެ އަތުގައި އުލަކުން ޖެހުމުގެ ސަބަބުން ކުއްޖާ ރޮމުންދާ ކަމަށް ބުނެ ސްކޫލުން ވަނީ ކުއްޖާގެ ބެލެނިވެރިންނަށް ގުޅާފަ އެވެ.
ސްކޫލުން ކުއްޖާ ގެއަށް ގެނެސް ކުއްޖާ އާއި އިތުރަށް ސުވާލު ކުރި ކުރުމުން ބެލެނިވެރިންނަށް ކުއްޖާ އަށް ބުލީގެ އަމަލުތަކާއި ކުރިމަތިލާކަން އެނގުނު ކަމަށާއި އެ ހިސާބުން ސްކޫލަށް މައްސަލަ ހުށަހެޅިކަން ރާއްޖެއެމްވީ އަށް އިތުބާރު ހުރި މަސްދަރަކުން ވަނީ މައުލޫމާތު ލިބިފަ އެވެ.
"މިއީ އަސްލު ވަރަށް ސީރިއަސް މައްސަލަ އެއް. ކުއްޖެއްގެ ކަރަށް ވާން ވާ ގޮތަށް މި ގޮތަށް އަމަލުކުރުމަކީ ބަލައިގަނެވޭ ކަމެއް ނޫން."އޭނާ ވަނީ ބުނެފަ އެވެ.
މި އަންހެން ކުއްޖާއަށް ބުލީކުރުމުގައި ނުފޫޒު ގަދަ ފަރާތެއްގެ ދަރިފުޅު ހިމެނުމާއި އެކު ބުލީ ކުރުމުގެ މައްސަލަ ހުށަހެޅި ނަމަވެސް އެކަން އެންމެ ސީރިއަސްކޮށް ނުބަލަނީ ކަމަށް ބައެއް ބެލެނިވެރިން ވަނީ ބުނެފަ އެވެ. ނަން ހާމަ ނުކުރުމަށް ޝަރުތުކޮށް ރާއްޖެ އެމްވީ އަށް މައުލޫމާތު ދިން ބެލެނިވެރިއަކު ވަނީ މި ހާދިސާ ހިނގި ދުވަހު، އެ އަންހެން ކުއްޖާގެ އަތަށް ތަދުވާގޮތަށް ކުއްޖާގެ އަތުގައި އުލަކުން ޖައްސާފައިވާ ކަމަށާއި މި ބުލީގެ އަމަލުތައް ދިމާވަނީ އެއް ދަރިވަރުންތަކެއްގެ ފަރާތުން ކަން ހާމަކޮށްފަ އެވެ. އަދި މި މައްސަލަ ސްކޫލްގެ ސަމާލުކަމަށް އައުމުން ބުލީ ކުރި ފިރިހެން ކުއްޖާ އިށީނދެ ހުންނަ ތަން ބުލީގެ ޝިކާރައަކަށްވި ކުއްޖާ އާއި ދުރު ތަނަކަށް ބަދަލުކޮށްފައިވާކަން މި ނޫހަށް ވަނީ އެނގިފަ އެވެ. ނަމަވެސް އެ ނޫން ފިޔަވަޅެއް ސްކޫލުން އެ ކުއްޖާ އާއި މެދު އަޅާފައިވާކަން އެނގޭކަށް ނެތެވެ.
މި ނޫހަށް އިތުރަށް ލިބުނު މައުލޫމާތުތަކުން އެނގިފައިވާ ގޮތުގައި މި ހަފްތާގެ ތެރޭގައި ވެސް މި ކުދިންގެ ފަރާތުން އެ އަންހެން ކުއްޖާ އަށް ފުރައްސާރަ އާއި ހަޑި ހުތުރު ބަހުން މުއާމަލާތު ކުރުމާއި ވަނީ ކުރިމަތިލާން ޖެހިފަ އެވެ. އެގޮތުން ކުލާހުގައި މުދައްރިސަކު ހުރި ވަގުތު ވެސް އިޖުތިމާއީ މިންގަނޑާއި ޚިލާފު ހަޑި ހުތުރު އިޝާރާތްތައް އަންހެން ކުއްޖާ އަށް ނިސްބަތްވާ ގޮތަށް ކުރުން ފަދަ ކަންކަން ވަނީ ދިމާވެފަ އެވެ.
ޝަރަފުއްދީން ސްކޫލްގައި މީގެ ކުރިން ވެސް ބުލީގެ މައްސަލަތައް ފެންމަތިވެފައި އެބަހުއްޓެވެ. ޚާއްސަކޮށް ގިނަ އަދަދެއްގެ ކުދިން ކިޔަވާ ސްކޫލްތަކުގައި މި ފަދަ މައްސަލަތައް ނުބެލުމަކީ ކުދިންގެ ރައްކާތެރިކަމާއި މެދު ކަންބޮޑުވާ އާއްމުންގެ ވަރަށް ބޮޑު ޝަކުވާއެކެވެ.
